IPL: ಹಳೆಯ ಬ್ಯಾಟಿಂಗ್ ವಿಡಿಯೋ ನೋಡಿ ಫಾರ್ಮ್​​​ಗೆ ಮರಳಿದೆ- ಇಶಾನ್ ಕಿಶನ್​

author img

By

Published : Oct 6, 2021, 10:04 AM IST

ishan-kishan

ಕಳಪೆ ಬ್ಯಾಟಿಂಗ್ ಫಾರ್ಮ್​​ನಿಂದಾಗಿ ಕಳೆದ ಪಂದ್ಯದಿಂದ ಕೈಬಿಡಲಾಗಿದ್ದ ಇಶಾನ್ ಕಿಶನ್ ನಿನ್ನೆ ನಡೆದ ಆರ್​ಆರ್ ವಿರುದ್ಧದ ಪಂದ್ಯದಲ್ಲಿ ಅಬ್ಬರಿಸಿದರು. 25 ಎಸೆತದಲ್ಲಿ ಅರ್ಧಶತಕಗಳಿಸಿ ತಂಡದ ಗೆಲುವಿನ ರೂವಾರಿಯಾದರು.

ಶಾರ್ಜಾ (ದುಬೈ): ಕಳಪೆ ಫಾರ್ಮ್​ನಿಂದಾಗಿ ಟೀಕೆಗೆ ಗುರಿಯಾಗಿದ್ದ ಮುಂಬೈ ಇಂಡಿಯನ್ಸ್ ತಂಡದ ಆಟಗಾರ ಇಶಾನ್ ಕಿಶನ್ ನಿನ್ನೆಯ ಪಂದ್ಯದಲ್ಲಿ ಅಬ್ಬರಿಸಿದ್ದಾರೆ. ಕೇವಲ 25 ಎಸೆತಗಳಲ್ಲಿ 5 ಬೌಂಡರಿ ಮತ್ತು ಭರ್ಜರಿ 3 ಸಿಕ್ಸರ್​ಗಳ ನೆರವಿನಿಂದ ಅಜೇಯ 50 ರನ್​ಗಳಿಸಿ ಕಳಪೆ ಫಾರ್ಮ್​​​ ಟೀಕೆಗೆ ಉತ್ತರ ನೀಡಿದ್ದಾರೆ.

ಮುಂಬರುವ ಟಿ-20 ವಿಶ್ವಕಪ್​​​ಗೆ ಆಯ್ಕೆಯಾಗಿರುವ ಇಶಾನ್ ಫಾರ್ಮ್​ ಬಗ್ಗೆ ಚರ್ಚೆ ಆರಂಭವಾಗಿತ್ತು. ಜತೆಗೆ ಅವರ ಆಯ್ಕೆ ಕುರಿತಂತೆ ಟೀಕೆಗಳು ಕೇಳಿಬಂದಿದ್ದವು. ಹೀಗಾಗಿ ಕಿಶನ್ ಮತ್ತೆ ಫಾರ್ಮ್​ಗೆ ಮರಳಲು ಕ್ರಿಕೆಟ್ ದಿಗ್ಗಜರ ಮೊರೆ ಹೋಗಿದ್ದರು. ಕಳೆದ ಆರ್​ಸಿಬಿ ವಿರುದ್ಧದ ಪಂದ್ಯದಲ್ಲಿ 12 ಎಸೆತಗಳನ್ನು ಎದುರಿಸಿ ಕೇವಲ 9 ರನ್​ಗಳಿಸಿ ಔಟ್​ ಆಗಿದ್ದರು. ಪಂದ್ಯದ ಸೋಲಿನ ಬಳಿಕ ಆರ್​ಸಿಬಿ ನಾಯಕ ವಿರಾಟ್ ಜೊತೆಯೂ ಮಾತುಕತೆಯಲ್ಲಿ ಮುಳುಗಿದ್ದರು.

ಇದಾದ ಬಳಿಕ ಮುಂಬೈ ತಂಡದ ನಾಯಕ ರೋಹಿತ್ ಶರ್ಮಾ, ಪೊಲಾರ್ಡ್​, ಹಾರ್ದಿಕ್ ಪಾಂಡ್ಯ ಜೊತೆಯೂ ಬ್ಯಾಟಿಂಗ್ ಕುರಿತ ಸಲಹೆ ಪಡೆದಿದ್ದರು. ಅಲ್ಲದೆ ಕಳಪೆ ಫಾರ್ಮ್​ನಿಂದ ಕಳೆದ ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧದ ಪಂದ್ಯದಿಂದ ಕಿಶನ್​ ಹೊರಗುಳಿಯಬೇಕಾಯಿತು.

ಆದರೆ ನಿನ್ನೆಯ ಪಂದ್ಯದಲ್ಲಿ ಅಬ್ಬರದ ಬ್ಯಾಟಿಂಗ್ ನಡೆಸಿ ತಂಡಕ್ಕೆ ಬಲ ನೀಡಿದ್ದಾರೆ. ಈ ನಡುವೆ ಪಂದ್ಯದ ಬಳಿಕ ಮಾತನಾಡಿರುವ ಅವರು, 'ನಾನು ಈ ಬಗ್ಗೆ ಪೊಲಾರ್ಡ್​ ಬಳಿ ಕೇಳಿದಾಗ ನೀನು ಕಳೆದ ಸೀಸನ್​​​ನಲ್ಲಿ ಏನು ಮಾಡಿದೆ ಎಂದು ಸುಮ್ಮನೆ ನೋಡು ಎಂದಿದ್ದರು. ಅದರಂತೆ ನಾನು ನನ್ನ ಬ್ಯಾಟಿಂಗ್‌ನ ಕೆಲವು ಹಳೆಯ ವಿಡಿಯೋಗಳನ್ನು ನೋಡಿದೆ, ಅದು ನನಗೆ ಸ್ವಲ್ಪ ಆತ್ಮವಿಶ್ವಾಸವನ್ನು ನೀಡಿತು' ಎಂದಿದ್ದಾರೆ.

ಇದರ ಜೊತೆ ಕಳೆದ ಪಂದ್ಯದಲ್ಲಿ ಇಶಾನ್ ಮೂರನೇ ಕ್ರಮಾಂಕದಲ್ಲಿ ಮೈದಾನಕ್ಕಿಳಿದರೆ, ನಿನ್ನೆಯ ರಾಜಸ್ಥಾನ್ ವಿರುದ್ಧದ ಪಂದ್ಯದಲ್ಲಿ ನಾಯಕ ರೋಹಿತ್ ಜೊತೆ ಆರಂಭಿಕರಾಗಿ ಬ್ಯಾಟಿಂಗ್ ಆರಂಭಿಸಿದ್ದರು.

ಇದನ್ನೂ ಓದಿ: ಕಿಶನ್​ ಅಬ್ಬರದ ಅರ್ಧಶತಕ: ರಾಜಸ್ಥಾನ್ ವಿರುದ್ಧ ಮುಂಬೈಗೆ 8 ವಿಕೆಟ್​ಗಳ ಜಯ, ಪ್ಲೇ ಆಫ್ ಆಸೆ ಜೀವಂತ

ETV Bharat Logo

Copyright © 2024 Ushodaya Enterprises Pvt. Ltd., All Rights Reserved.