ನವದೆಹಲಿ: ಭಾರತದಲ್ಲಿ ಏಪ್ರಿಲ್ ವೇಳೆಗೆ ಮೂರನೇ ಕೊರೊನಾ ಅಲೆ ಕೊನೆಯಾಗದಿದ್ದರೆ ದಕ್ಷಿಣ ಅಫ್ರಿಕಾದಲ್ಲಿ 2022ರ ಇಂಡಿಯನ್ ಪ್ರೀಮಿಯರ್ ಲೀಗ್ ಆಯೋಜಿಸುವ ಸಾಧ್ಯತೆ ದಟ್ಟವಾಗಿದೆ ಎಂದು ಪತ್ರಿಕೆಯೊಂದು ವರದಿ ಮಾಡಿದೆ. ಶ್ರೀಲಂಕಾ ಕೂಡ ನಗದು ಸಮೃದ್ಧ ಲೀಗ್ ಆಯೋಜನೆಗೆ ಮತ್ತೊಂದು ಆಯ್ಕೆಯಾಗಿದೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
14ನೇ ಆವೃತ್ತಿ ಚಾಲ್ತಿಯಲ್ಲಿರುವಾಗಲೇ ಕೋವಿಡ್ ಕಾರಣಕ್ಕೆ ಐಪಿಎಲ್ ಸ್ಥಗಿತಗೊಳಿಸಿ ಸೆಪ್ಟೆಂಬರ್ನಲ್ಲಿ ಯುಎಇನಲ್ಲಿ 2ನೇ ಹಂತ ಮುಗಿಸಲಾಯಿತು. ಈ ಟೂರ್ನಿಯಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಚಾಂಪಿಯನ್ ಆಗಿ ಹೊರಹೊಮ್ಮಿದೆ. ಇದೀಗ 10 ತಂಡಗಳ ವಿನೂತನ ಮಾದರಿಯ ಶ್ರೀಮಂತ ಲೀಗ್ ಅನ್ನು ದಕ್ಷಿಣ ಆಫ್ರಿಕಾದಲ್ಲಿ ನಡೆಸಲು ಬಿಸಿಸಿಐ ಚಿಂತಿಸಿದೆ ಎನ್ನಲಾಗುತ್ತಿದೆ.
'ನಾವು ಎಲ್ಲಾ ಸಮಯದಲ್ಲೂ ಯುಎಇ ಮೇಲೆ ಅವಲಂಬಿತವಾಗಲು ಆಗುವುದಿಲ್ಲ. ಹಾಗಾಗಿ ಈ ಬಾರಿ ಹೊಸ ಆಯ್ಕೆಗಳನ್ನು ಅನ್ವೇಷಣೆ ಮಾಡಲು ನಿರ್ಧರಿಸಿದ್ದೇವೆ. ದಕ್ಷಿಣ ಆಫ್ರಿಕಾದ ಸಮಯದ ವ್ಯತ್ಯಾಸ ನಮ್ಮ ಆಟಗಾರರಿಗೆ ಸರಿಹೊಂದುತ್ತದೆ' ಎಂದು ಬಿಸಿಸಿಐ ಅಧಿಕಾರಿಗಳು ಪತ್ರಿಕೆಗೆ ಪ್ರತಿಕ್ರಿಯಿಸಿದ್ದಾರೆ.
ಲಖನೌ ಮತ್ತು ಅಹ್ಮದಾಬಾದ್ ಫ್ರಾಂಚೈಸಿಗಳ ಸೇರ್ಪಡೆಯೊಂದಿಗೆ 2022ರ ಐಪಿಎಲ್ ತುಂಬಾ ದೀರ್ಘವಾಗಲಿದೆ. ಒಂದು ವೇಳೆ ಭಾರತದಿಂದ ಲೀಗ್ ಹೊರಗೆ ನಡೆಸಲು ನಿರ್ಧರಿಸಿದರೆ ದಕ್ಷಿಣ ಆಫ್ರಿಕಾದಲ್ಲಿ ಐಪಿಎಲ್ 2ನೇ ಬಾರಿ ನಡೆದಂತಾಗುತ್ತದೆ. ಭಾರತದಲ್ಲಿ ಲೋಕಸಭೆ ಚುನಾವಣೆ ಆಯೋಜನೆಗೊಂಡಿದ್ದರಿಂದ 2009ರಲ್ಲಿ ದ.ಆಫ್ರಿಕಾದಲ್ಲಿ 2ನೇ ಆವೃತ್ತಿಯ ಐಪಿಎಲ್ ನಡೆಸಲಾಗಿತ್ತು.
ಎರಡನೇ ಟೆಸ್ಟ್‌ಗಾಗಿ ತಂಡವು ತಂಗಿದ್ದ ಸ್ಥಳವು ಹಲವಾರು ಎಕರೆಗಳಲ್ಲಿದ್ದು, ಆಟಗಾರರಿಗೆ ಅಗತ್ಯವಾಗಿರುವ ಸೌಲಭ್ಯಗಳು ಸುಲಭವಾಗಿ ಲಭ್ಯವಾಗಲಿದೆ ಎಂದು ಆ ಅಧಿಕಾರಿ ದಕ್ಷಿಣ ಆಫ್ರಿಕಾವನ್ನು ಆಯ್ಕೆ ಮಾಡಿಕೊಂಡಿರುವುದಕ್ಕೆ ಕಾರಣವೆಂದು ತಿಳಿಸಿದ್ದಾರೆ.
ಆದರೆ, ಕೋವಿಡ್ ರೂಪಾಂತರಿ ಒಮಿಕ್ರಾನ್ ಮೊದಲು ಕಾಣಿಸಿಕೊಂಡಿದ್ದ ದಕ್ಷಿಣ ಆಫ್ರಿಕಾದಲ್ಲಿ ನಡೆಯಬೇಕಿದ್ದ ಟಿ20 ಸರಣಿಯನ್ನು ಬಿಸಿಸಿಐ ಮುಂದೂಡಿದೆ. ಆದರೆ ಪ್ರಸ್ತುತ ಸೋಂಕು ಪ್ರಕರಣಗಳು ಕಡಿಮೆಯಾಗುತ್ತಿರುವುದರಿಂದ 2022ರ ಲೀಗ್ಗೆ 'ರೈಂಬೋ ನೇಷನ್' ಸರಿಯಾದ ಆಯ್ಕೆ ಎನ್ನಲಾಗುತ್ತಿದೆ. ಒಂದು ವೇಳೆ ಇಲ್ಲಿಯೂ ಸಾಧ್ಯವಾಗದಿದ್ದರೆ ಶ್ರೀಲಂಕಾ ಬಿಸಿಸಿಐ ಮುಂದಿರುವ ಮತ್ತೊಂದು ಆಯ್ಕೆಯಾಗಿದೆ.
ಇದನ್ನೂ ಓದಿ:5 ವರ್ಷಗಳ ನಂತರ ಐಪಿಎಲ್ಗೆ ಮರಳುವ ಸುಳಿವು ಕೊಟ್ಟ ಮಿಚೆಲ್ ಸ್ಟಾರ್ಕ್
