ಖೈರತಾಬಾದ್‌ನಲ್ಲಿ 63 ಅಡಿ ಎತ್ತರದ ಗಣೇಶ ಮೂರ್ತಿ ಪ್ರತಿಷ್ಠಾಪನೆ: ನೇರಪ್ರಸಾರ

ದೇಶದೆಲ್ಲೆಡೆ ಗಣೇಶ ಹಬ್ಬಕ್ಕೆ ಇಂದು ಚಾಲನೆ ದೊರೆತಿದೆ. ತೆಲಂಗಾಣ ರಾಜಧಾನಿ ಹೈದರಾಬಾದ್‌ ನಗರದ ಪ್ರಸಿದ್ಧ ಖೈರತಾಬಾದ್​ ಮಹಾಗಣಪತಿ ಮಹೋತ್ಸವ ಅದ್ಧೂರಿಯಾಗಿ ಆರಂಭಗೊಂಡಿದೆ. ಜಾಗತಿಕವಾಗಿ ಗುರುತಿಸಲ್ಪಟ್ಟಿರುವ ಇಲ್ಲಿನ​ ಗಣೇಶ ವಿಗ್ರಹವು ಅದರ ಎತ್ತರ ಮತ್ತು ಅಲ್ಲಿ ಬಳಸುವ ಲಡ್ಡಿನ ಗಾತ್ರದಿಂದ ಬಹಳ ವಿಶೇಷ. ಪ್ರತಿ ವರ್ಷ ಗಣೇಶ ಮಂಡಳಿಯವರು ಗಣಪತಿ ಮೂರ್ತಿಯ ಎತ್ತರವನ್ನು ಹೆಚ್ಚಿಸುತ್ತಾ ಹೋಗುತ್ತಾರೆ. ಈ ವರ್ಷ 63 ಅಡಿ ಎತ್ತರದಲ್ಲಿ ಗಣೇಶನ ವಿಗ್ರಹ ಸ್ಥಾಪಿಸಲಾಗಿದೆ. 

ಬಾಲಗಂಗಾಧರ ತಿಲಕ್​ ಅವರಿಂದ ಪ್ರೇರಣೆಗೊಂಡು, ಸಿಂಗಾರಿ ಶಂಕರಯ್ಯ ಎಂಬವರು 1954ರಲ್ಲಿ ಒಂದು ಅಡಿ ಎತ್ತರದ ಗಣೇಶ ಮೂರ್ತಿಯನ್ನು ಖೈರತಾಬಾದ್​ ದೇವಸ್ಥಾನದಲ್ಲಿ ಪ್ರತಿಷ್ಠಾಪಿಸಿ, ಗಣೇಶ ಚೌತಿ ಆಚರಿಸಿದ್ದರು. ನಂತರ ವರ್ಷಂಪ್ರತಿ ಒಂದೊಂದೇ ಅಡಿ ಹೆಚ್ಚಿಸುತ್ತಾ 2014ರವರೆಗೆ 60 ಅಡಿ ಎತ್ತರದ ಗಣೇಶ ವಿಗ್ರಹ ಸ್ಥಾಪಿಸಿ, ಚತರ್ಥಿ ಆಚರಿಸಲಾಗುತ್ತಿದೆ. 2019ರಲ್ಲಿ 61 ಅಡಿ ಎತ್ತರದ ಗಣೇಶ ಮೂರ್ತಿ ಮಾಡಿ ಹಬ್ಬ ಆಚರಿಸಲಾಗಿತ್ತು. ಈ ವರ್ಷ 63 ಅಡಿ ಎತ್ತರದ ದಶಮುಖ ವಿದ್ಯಾಗಣಪತಿಯ ವಿಗ್ರಹವನ್ನಿಡಲಾಗಿದ್ದು, ಅದ್ಧೂರಿಯಾಗಿ ಆಚರಣೆ ನಡೆಯುತ್ತಿದೆ. ಗಣೇಶನಿಗೆ 75 ಅಡಿ ಉದ್ದದ ಕೈಯಿಂದ ನೇಯ್ದ ಕೈಮಗ್ಗ  ದಾರ, 75 ಅಡಿ ಉದ್ದದ ಗರಿಕಾ ಮಾಲೆ ಅರ್ಪಿಸಲಾಗಿದೆ.