ಅಂದುಕೊಂಡಂತೆ ಗುರಿ ತಲುಪಿದ ಆಸ್ಟ್ರೇಲಿಯಾ; ಮೌನಕ್ಕೆ ಜಾರಿದ ಟೀಂ ಇಂಡಿಯಾ ಅಭಿಮಾನಿಗಳು

10ವರ್ಷಗಳಿಂದ ಪ್ರಶಸ್ತಿ ಗೆದ್ದಿಲ್ಲ ಎಂಬ ಬರ ಈ ಆವೃತ್ತಿಯ ವಿಶ್ವಕಪ್​ನಲ್ಲಿ ನೀಗುತ್ತದೆ ಎಂದು ಕೊಂಡಿದ್ದ ಭಾರತದ ಅಭಿಮಾನಿಗಳ ನಿರೀಕ್ಷೆ ಹುಸಿಯಾಗಿದೆ. ಮೊದಲ ಇನ್ನಿಂಗ್ಸ್​ನಲ್ಲಿ ಭಾರತ ಟಾಸ್​ ಸೋತು ಬ್ಯಾಟಿಂಗ್​ ಬಂದು ಸಾಧಾರಣ ಪ್ರದರ್ಶನ ನೀಡಿ 240 ರನ್​ ಗಳಿಸಿದಾಗಲೇ ಅಭಿಮಾನಿಗಳು ದೇವರ ಮೊರೆ ಹೋಗಿದ್ದರು. 241 ರನ್​ ತಂಡ ಉಳಿಸಿಕೊಳ್ಳಲು ಆಟಗಾರರ 100 ಪಟ್ಟು ಶ್ರಮದ ಜೊತೆಗೆ ಅಭಿಮಾನಿಗಳ ಪ್ರಾರ್ಥನೆಯೂ ಸೇರಿತ್ತು. ಆದರೆ ಈ ಎರಡೂ ಕೆಲಸ ಮಾಡಲಿಲ್ಲ. ಆಸ್ಟ್ರೇಲಿಯಾದ ನಾಯಕ ಪ್ಯಾಟ್​ ಕಮಿನ್ಸ್​ ಶನಿವಾರ ಮಾಧ್ಯಮಗೋಷ್ಟಿ ಉದ್ದೇಶಿಸಿ "ಮೈದಾನದಲ್ಲಿ ಭಾರತದ ಪರ ಅಭಿಮಾನಿಗಳ ಅಲೆ ಜೋರಾಗಿಯೇ ಇರುತ್ತದೆ. ಆದರೆ ಆ ಅಲೆಯನ್ನು ಮೌನವಾಗಿಸುವುದೇ ನಮ್ಮ ಗುರಿ" ಎಂದು ಹೇಳಿದ್ದರು. ಅದರಂತೆ ಕಮಿನ್ಸ್​ ಪಡೆ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ಭಾರತದ ವಿರುದ್ಧ 6 ವಿಕೆಟ್​ಗಳಿಂದ ಗೆಲುವು ದಾಖಲಿಸಿತು. ಹಾಗೇ ಏಕದಿನ ವಿಶ್ವಕಪ್​ನಲ್ಲಿ 6ಬಾರಿ ಗೆದ್ದು ಬೀಗಿತು. 1975ರ ನಂತರ 6 ಬಾರಿ ಫೈನಲ್​ಗೇರಿದ ತಂಡ ಪ್ರತಿ ಬಾರಿಯೂ ಚಾಂಪಿಯನ್​ ಆಗಿ ಹೊರಹೊಮ್ಮಿದೆ. 2013ರಲ್ಲಿ ಇಂಗ್ಲೆಂಡ್​ನಲ್ಲಿ ನಡೆದ ಚಾಂಪಿಯನ್ಸ್​ ಟ್ರೋಫಿಯನ್ನು ಗೆದ್ದ ನಂತರ ಭಾರತ ಯಾವುದೇ ಐಸಿಸಿ ಟ್ರೋಫಿಯನ್ನು ಗೆಲ್ಲುವಲ್ಲಿ ಯಶಸ್ವಿ ಆಗಿಲ್ಲ. ಅಲ್ಲಿಂದ ಬಹುತೇಕ 9 ಐಸಿಸಿ ಟ್ರೋಫಿಗಳನ್ನು ಭಾರತ ಕಳೆದುಕೊಂಡಿದೆ. ಈ ಬಾರಿಯ ವಿಶ್ವಕಪ್​ ಭಾತರತದಲ್ಲೇ ನಡೆಯುತ್ತಿರುವುದರಿಂದ ತಂಡದ ಮೇಲೆ ಹೆಚ್ಚಿನ ವಿಶ್ವಾಸ ಇತ್ತು. ಅಲ್ಲದೇ ಭಾರತ ತಂಡ 2023ರ ವಿಶ್ವಕಪ್​ನಲ್ಲಿ ಅದ್ಭುತ ಪ್ರದರ್ಶನ ನೀಡಿತ್ತು. ಲೀಗ್​ ಹಂತದಲ್ಲಿ ಸತತ 9 ಪಂದ್ಯಗಳನ್ನು ಗೆದ್ದಿದ್ದಲ್ಲದೇ, ಸೆಮೀಸ್​ನಲ್ಲಿ ಕಿವೀಸ್​ ವಿರುದ್ಧವೂ ಗೆದ್ದು ಫೈನಲ್​ ಪ್ರವೇಶಿಸಿತ್ತು. ಭಾರತದ ಸ್ಥಿರ ಪ್ರದರ್ಶನ ಕಂಡ ಎಲ್ಲರಿಗೂ ಕೂಡ ಟ್ರೋಫಿ ಗೆಲ್ಲುವ ಫೇವ್​ರೇಟ್​ ತಂಡ ಟೀಮ್​ ಇಂಡಿಯಾ ಆಗಿತ್ತು. ಆದರೆ, ಫೈನಲ್​ನಲ್ಲಿ ಭಾರತ ಎಡವಿತು.