ಹೈದರಾಬಾದ್, ತೆಲಂಗಾಣ: ಸುಂದರವಾದ ಕಾರುಗಳನ್ನು ನೋಡಿದಾಗ ಅವುಗಳು ನಮ್ಮ ಮನೆಯಲ್ಲಿರಬೇಕು ಅಂತನಿಸೋದು ಸಹಜ. ಹಾಗಂತ ನಾವು ಎಲ್ಲ ಕಾರುಗಳನ್ನು ಖರೀದಿಸಲು ಸಾಧ್ಯವೇ?. ಇಲ್ಲವಲ್ಲ. ಇಲ್ಲೊಬ್ಬ ಹುಡುಗನಿಗೆ ಕಾರು ಕ್ರೇಜ್ ಇದೆ. ಅವುಗಳನ್ನು ಖರೀದಿಸಲು ಅಸಾಧ್ಯವಾದರೂ ಅವುಗಳನ್ನು ತಾನೇ ತಯಾರಿಸಿದ್ದಾನೆ. ಅದು ಪೇಪರ್ನಲ್ಲಿ!.
ಮೇಲಿನ ಚಿತ್ರವನ್ನು ನೋಡಿದರೆ ಇದೇನು ಸಾಲಾಗಿ ಇಷ್ಟು ಕಾರುಗಳು ನಿಂತಿವೆಯಲ್ಲ ಅನ್ನಿಸಬಹುದು. ಅವೆಲ್ಲ ಪೇಪರ್ನಿಂದ ಮಾಡಿದ ಕಾರುಗಳ ಆಕೃತಿ. ತೆಲಂಗಾಣದ ಮಹೆಬೂಬ್ನಗರದ ಯುವಕ ಇವುಗಳ ಪಿತಾಮಹ. ಬಿಟೆಕ್ ಶಿಕ್ಷಣ ಪಡೆದಿರುವ ಈತನಿಗೆ ಕಾರುಗಳು ಎಂದರೆ ಪಂಚಪ್ರಾಣ. ಖರೀದಿಸಲು ಸಾಧ್ಯವಾಗದ ಕಾರಣ ಅವುಗಳನ್ನು ಪೇಪರ್ನಲ್ಲಿ ತಾನೇ ತಯಾರಿಸಿ ಖುಷಿ ಪಡುತ್ತಿದ್ದಾನೆ.
ಯುವಕ ಅನಸ್ ಫೈಝಿ ಸುಮಾರು 355 ವಿವಿಧ ಮಾದರಿಯ ಕಾರುಗಳನ್ನು ರೂಪಿಸಿದ್ದಾನೆ. ಕಾರುಗಳು ಮಾತ್ರವಲ್ಲ, ಬೈಕ್‌ಗಳು, ಪೊಲೀಸ್, ಮಿಲಿಟರಿ ವಾಹನಗಳು, ಆ್ಯಂಬುಲೆನ್ಸ್ಗಳು ಫೈಝಿಯ ಪೇಪರ್ ಗ್ಯಾರೇಜ್ನಲ್ಲಿವೆ.
ಫೈಝಿ ಬಳಿಯಿವೆ 355 ಕಾರುಗಳ ಆಕೃತಿ: ಚಿಕ್ಕವನಿದ್ದಾಗಿನಿಂದಲೂ ಫೈಝಿಗೆ ಕಾರಿನ ಬಗ್ಗೆ ಅತೀವ ಆಸೆ ಇದೆ. ನೋಡಿದಂತಹ ಕಾರುಗಳನ್ನು ಖರೀದಿಸಲು ಸಾಧ್ಯವಿಲ್ಲದ ಕಾರಣ ತಾನೇ ಕಾಗದದಿಂದ ತಯಾರಿಸಿ ಖುಷಿಪಡುತ್ತಿದ್ದಾನೆ. ಕ್ರಮೇಣ ಇದು ಹವ್ಯಾಸವಾಗಿ, 355 ಕಾರುಗಳ ಮಾದರಿಗಳನ್ನು ರೂಪಿಸಿದ್ದಾನೆ. 9 ವರ್ಷದ ವಯಸ್ಸಿನಿಂದ ಈ ಗೀಳು ಅಂಟಿಸಿಕೊಂಡಿದ್ದಾನೆ.
ಹೊಸ ಮಾದರಿಯ ಕಾರನ್ನು ಕಂಡಾಗ ಅವುಗಳ ಅಳತೆಯನ್ನು ತಿಳಿದುಕೊಂಡು ನಂತರ ಆಕೃತಿಯನ್ನು ಬಿಡಿಸುತ್ತಾನೆ. ಅವುಗಳಿಗೆ ಕಾರಿನದ್ದೇ ಬಣ್ಣ ಮಾಡಿ, ಕತ್ತರಿಸಿ, ಮಾದರಿಯನ್ನು ರೂಪಿಸುತ್ತಾನೆ. ನೋಡಿದರೆ ಅದು ನಿಜವಾದ ಕಾರೇ ಅನ್ನಿಸಬೇಕು ಹಾಗಿರುತ್ತೆ ಈತನ ಕೈಚಳಕ. ಎಲ್ಲ ಕಾರುಗಳು 3 ಸೆಂ.ಮೀ ನಿಂದ 7 ಸೆಂ.ಮೀ ಉದ್ದವಿರುತ್ತದೆ. ಪ್ರತಿ ಕಾರನ್ನು ತಯಾರಿಸಲು 2 ರಿಂದ 20 ಗಂಟೆಗಳು ತೆಗೆದುಕೊಳ್ಳುತ್ತದೆ. ಓದಿನ ಮಧ್ಯೆ ಈ ಹವ್ಯಾಸವನ್ನು ಅನಸ್ ಫೈಝಿ ಬೆಳೆಸಿಕೊಂಡಿದ್ದಾನೆ.
ಐಫೆಲ್ ಟವರ್ ಮಾಡುವ ಗುರಿ: ಇಷ್ಟಲ್ಲದೇ, ಐಫೆಲ್ ಟವರ್ ಮತ್ತು ಬುರ್ಜ್ ಖಲೀಫಾದಂತಹ ವಿಶ್ವದ ಅತಿ ಎತ್ತರದ ಕಟ್ಟಡಗಳ ಮಾದರಿಗಳನ್ನು ಕಾಗದದಿಂದ ತಯಾರಿಸಿದ್ದಾನೆ ಈತ. ಭವಿಷ್ಯದಲ್ಲಿ ವಿಮಾನಗಳು, ಹೆಲಿಕಾಪ್ಟರ್‌ಗಳು, ದೋಣಿಗಳು ಮತ್ತು ಜಲಾಂತರ್ಗಾಮಿ ನೌಕೆಗಳನ್ನು ರೂಪಿಸುವ ಗುರಿಯನ್ನು ಫೈಝಿ ಹೊಂದಿದ್ದಾನೆ. ತನ್ನ ಈ ಪ್ರತಿಭೆ ಪ್ರದರ್ಶಿಸಲು ಇನ್ನೂವರೆಗೂ ಯಾವುದೇ ವೇದಿಕೆ ಸಿಕ್ಕಿಲ್ಲ ಎಂದು ಬೇಸರ ವ್ಯಕ್ತಪಡಿಸಿದ್ದಾನೆ ಫೈಝಿ.
ಅವಕಾಶ ಸಿಕ್ಕರೆ ಮಕ್ಕಳಿಗೆ ಪೇಪರ್ನಿಂದ ಇಂತಹ ಆಟಿಕೆಗಳನ್ನು ಹೇಗೆ ಮಾಡಬೇಕು ಎಂಬುದನ್ನು ತಿಳಿಸಿಕೊಡುವುದಾಗಿ ಹೇಳಿದ್ದಾನೆ. ಈ ರೀತಿ ಮಾಡುವುದರಿಂದ ಮಕ್ಕಳಲ್ಲಿನ ಸೃಜನಶೀಲತೆ ಬೆಳಕಿಗೆ ಬರುತ್ತದೆ. ಮೆದುಳು ಕೂಡ ಚುರುಕಾಗುತ್ತದೆ ಎಂಬುದು ಫೈಝಿಯ ಅಭಿಪ್ರಾಯ.
ಓದಿ: ಮಂಗಳವಾರದ ಚಿನಿವಾರ ಮಾರುಕಟ್ಟೆ: ಚಿನ್ನ-ಬೆಳ್ಳಿ ದರದಲ್ಲಿ ಕೊಂಚ ಏರಿಕೆ
