ಜಗತ್ಸಿಂಗಪುರ್​​: ಪ್ರೇಮಿಗಳ ದಿನದಂದು ವಿದ್ಯಾರ್ಥಿನಿಯರು ಬಾಯ್​ ಫ್ರೆಂಡ್​ ಜೊತೆ ಕಾಲೇಜಿಗೆ ಬನ್ನಿ. ಬಾಯ್​ ಫ್ರೆಂಡ್​ ಇರದೇ ಕಾಲೇಜಿಗೆ ಬರಲು ಮಂದಾದರೆ ಅವರಿಗೆ ಪ್ರವೇಶಕ್ಕೆ ಅನುಮತಿ ಇಲ್ಲ. ಹೀಗೊಂದು ವಿಚಿತ್ರ ರೀತಿಯ ನೋಟಿಸ್​ ಅನ್ನು ಒಡಿಶಾದ ಜಗತ್ಸಿಂಗ್​​ಪುರ್​ನ​ ಸ್ವಾಮಿ ವಿವೇಕಾನಂದ ಮೆಮೋರಿಯಲ್​ ಸ್ವಾಯತ್ತ ಕಾಲೇಜು ಎಸ್​ವಿಎಂ ಕಾಲೇಜ್​ ಹೊರಡಿಸಿದ್ದು, ವಿದ್ಯಾರ್ಥಿಗಳನ್ನು ಬೆಚ್ಚಿಬೀಳಿಸಿದೆ. ಈ ನೋಟಿಸ್​ಗೆ ಅಧಿಕೃತವಾಗಿ ಕಾಲೇಜು ಪ್ರಿನ್ಸಿಪಾಲ್​ ಕೂಡ ಸಹಿ ಮಾಡಿದ್ದಾರೆ ಎಂಬ ಆರೋಪ ಕೇಳಿಬಂದಿದೆ. ಆದರೆ, ಈ ಬಗ್ಗೆ ಸುದ್ದಿಯಾಗುತ್ತಿದ್ದಂತೆ ಪ್ರಿನ್ಸಿಪಾಲರು ಈ ನೋಟಿಸ್​ಗೆ ತಾವು ಸಹಿ ಹಾಕಿಲ್ಲ. ಇದು ದುರುದ್ದೇಪೂರ್ವಕವಾಗಿ ಮಾಡಿರುವ ಕೃತ್ಯ ಎಂದು ತಮ್ಮ ಮೇಲಿನ ಆರೋಪವನ್ನು ತಳ್ಳಿಹಾಕಿದ್ದಾರೆ.

ಏನಿದು ನೋಟಿಸ್: 'ಪ್ರೇಮಿಗಳ ದಿನವಾದ ಫೆಬ್ರವರಿ 14ರೊಳಗೆ ಎಲ್ಲಾ ಯುವತಿಯರು ಕನಿಷ್ಟ ಪಕ್ಷ ಒಬ್ಬ ಬಾಯ್​ಫ್ರೆಂಡ್​ ಅನ್ನು ಹೊಂದಿರಬೇಕು. ಇದು ರಕ್ಷಣೆ ದೃಷ್ಟಿಯಿಂದ ಮಾಡಲಾಗಿದೆ. ಬಾಯ್​ ಫ್ರೆಂಡ್​ ಹೊಂದಿಲ್ಲದ ವಿದ್ಯಾರ್ಥಿನಿಯರಿಗೆ ಕಾಲೇಜಿನ ಆವರಣದಲ್ಲಿ ಯಾವುದೇ ಕಾರಣಕ್ಕೂ ಪ್ರವೇಶ ಇಲ್ಲ. ಕಾಲೇಜಿಗೆ ಪ್ರವೇಶ ಮಾಡುವ ಮುನ್ನ ಯುವತಿಯರು ತಮ್ಮ ಬಾಯ್​ಫ್ರೆಂಡ್​ ಜೊತೆಗಿನ ಇತ್ತೀಚಿನ ಫೋಟೋವನ್ನು ತೋರಿಸಬೇಕು. ಪ್ರೀತಿ ಹಂಚಿ..' ಎಂಬ ನೋಟಿಸ್​ ಎಸ್​ವಿಎಂ ಕಾಲೇಜಿನಿಂದ ಹೊರ ಬಿದ್ದಿದ್ದು, ಸಾಮಾಜಿಕ ಜಾಲತಾಣದಲ್ಲಿ ಸಿಕ್ಕಾಪಟ್ಟೆ ವೈರಲ್​ ಆಗಿದೆ. ಈ ಸುದ್ದಿ ತಿಳಿಯುತ್ತಿದ್ದಂತೆ ಕಾಲೇಜು ಆಡಳಿತ ಮಂಡಳಿ ಕೂಡ ಈ ಬಗ್ಗೆ ಪ್ರತಿಕ್ರಿಯಿಸಿದೆ. ಈ ಸಂಬಂಧ ಕಾಲೇಜು ಪ್ರಾಂಶುಪಾಲರು ಸೋಮವಾರ ಸಂಜೆ ಜಗತ್ಸಿಂಗ್​ಪುರ್​ ಪೊಲೀಸ್​ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.

ನೋಟಿಸ್​ನಲ್ಲಿ ಪ್ರಿನ್ಸಿಪಾಲರ ಸಹಿ ಹೊಂದಿದ್ದು, ಎಸ್​ವಿಎಂ ಕಾಲೇಜು ಮತ್ತು ಇಲ್ಲಿನ ಪ್ರಾಂಶುಪಾಲರು ಸುದ್ದಿಯಾಗಿದ್ದಾರೆ. ಪ್ರೇಮಿಗಳ ದಿನದಂದು ವಿದ್ಯಾರ್ಥಿನಿಯರು ಬಾಯ್​​ಫ್ರೆಂಡ್​ ಜೊತೆ ಬರಬೇಕು. ಹಳೆಯ ಗೆಳೆಯನ ಜೊತೆಯಾದರೂ ಬರಬೇಕು ಎಂಬ ನೋಟಿಸ್​ಗೆ ಅನೇಕ ವಿದ್ಯಾರ್ಥಿಗಳ ಅಸಮಾಧಾನಕ್ಕೆ ಕಾರಣವಾಗಿದ್ದು, ಇದು ಕಾಲೇಜಿನ ಹೆಸರು ಕೆಡಿಸಬೇಕು ಎಂದು ಮಾಡಿರುವ ಕೃತ್ಯ ಎಂಬುದು ಮೇಲ್ನೋಟಕ್ಕೆ ಸಾಬೀತಾಗಿದೆ.

ಈ ಘಟನೆ ಕುರಿತು ಮಾತನಾಡಿರುವ ಕಾಲೇಜಿನ ಪ್ರಾಂಶುಪಾಲರಾದ ವಿಜಯ್​ ಕುಮಾರ್​​ ಪತ್ರ, ನನ್ನ ಹೆಸರಿನಲ್ಲಿ ತಪ್ಪಾದ ನೋಟಿಸ್​ ಅನ್ನು ಹಂಚಲಾಗಿದೆ. ಇದು ಸಂಪೂರ್ಣವಾಗಿ ಸುಳ್ಳಾಗಿದೆ. ಈ ಸುದ್ದಿ ಕುರಿತು ಮಾತನಾಡುವುದು ಕೂಡ ಸರಿಯಲ್ಲ. ನನಗೆ ತಿಳಿಯದಂತೆ ಯಾರೋ ಈ ಕೆಲಸ ಮಾಡಿದ್ದಾರೆ. ಇದು ನಮ್ಮ ಕಾಲೇಜಿನಿಂದಲೂ ಅಲ್ಲ. ನೋಟಿಸ್​ನಲ್ಲಿರುವ ಲೆಟರ್​ ಹೆಡ್​ ಆಗಲಿ, ನಂಬರ್​ ಆಗಲಿ ನಮ್ಮ ಕಾಲೇಜಿನದ್ದಲ್ಲ ಎಂದು ಸ್ಪಷ್ಟನೆ ನೀಡಿದ್ದಾರೆ.

ಘಟನೆ ಕುರಿತು ಪ್ರತಿಕ್ರಿಯಿಸಿರುವ ಎಸ್​ವಿಎಂ ಕಾಲೇಜು ವಿದ್ಯಾರ್ಥಿನಿ ರಶ್ಮಿತಾ ಬೆಹ್ರಾ, ಈ ವೈರಲ್​ ನೋಟಿಸ್​ ಅನ್ನು ನಾವೆಲ್ಲಾ ನೋಡಿದ್ದೇವೆ. ಇದು ನಿಜ ಎಂಬಂತೆ ಕಾಡುತ್ತಿದೆ. ಯಾರೋ ಬೇಕು ಅಂತಲೇ ದುರುದ್ದೇಶದಿಂದ ಈ ನೋಟಿಸ್​ ಅನ್ನು ವೈರಲ್​ ಮಾಡಿದ್ದಾರೆ. ನಮ್ಮ ಕಾಲೇಜು ಮತ್ತು ಪ್ರಿನ್ಸಿಪಾಲರಿಗೆ ಕೆಟ್ಟ ಹೆಸರು ತರಬೇಕು ಎಂಬ ಉದ್ದೇಶದಿಂದ ಈ ಕೃತ್ಯ ಮಾಡಿದ್ದಾರೆ ಎಂದು ಹೇಳಿದ್ದಾರೆ. 2021ರಲ್ಲೂ ಕೂಡ ಇದೇ ರೀತಿಯ ನೋಟಿಸ್​ ಆಗ್ರಾ ಕಾಲೇಜ್​ ಮತ್ತು ಚೆನ್ನೈನ ಎಸ್​ಆರ್​ ವಿಶ್ವವಿದ್ಯಾಲಯದಲ್ಲಿ ವೈರಲ್​ ಆಗಿದ್ದವು.

ಇದನ್ನೂ ಓದಿ: ಹೈದರಾಬಾದ್ ಕೇಂದ್ರೀಯ​ ವಿವಿಯಲ್ಲಿ ನಿಷೇಧಿತ ಬಿಬಿಸಿ ಸಾಕ್ಷ್ಯಚಿತ್ರ ಪ್ರದರ್ಶನ