ಪಾಟ್ನಾ (ಬಿಹಾರ) : ರಾಜಕೀಯದ ಪ್ರಯೋಗಶಾಲೆಯಾಗಿರುವ ಬಿಹಾರ, ಈಗ ಮತ್ತೊಂದು ಮನ್ವಂತರಕ್ಕೆ ತೆರೆದುಕೊಂಡಿದೆ. ದೇಶದಲ್ಲೇ ಮೊದಲ ಜಾತಿಗಣತಿ ನಡೆಸಿದ ಅಲ್ಲಿನ ಸರ್ಕಾರ, ಈಗಿದ್ದ ಮೀಸಲಾತಿ ಕೋಟಾವನ್ನು ಶೇ.60 ರಿಂದ ಶೇ.75ಕ್ಕೆ ಹೆಚ್ಚಿಸಿತ್ತು. ವಿಧಾನಸಭೆ ಅಂಗೀಕರಿಸಿದ ಮಹತ್ವದ ಮಸೂದೆಗೆ ರಾಜ್ಯಪಾಲರೂ ಅಂಕಿತ ಹಾಕಿದ್ದಾರೆ. ಈ ಸಂಬಂಧ ಶೀಘ್ರದಲ್ಲೇ ಗೆಜೆಟ್​ ಅಧಿಸೂಚನೆ ಹೊರಬೀಳಲಿದೆ.

ಬಿಹಾರ ವಿಧಾನಸಭೆಯು ಅಂಗೀಕರಿಸಿರುವ ಹೊಸ ಮೀಸಲಾತಿ ಅನ್ವಯ ಪರಿಶಿಷ್ಟ ಜಾತಿಗಳು (ಎಸ್‌ಸಿ), ಪರಿಶಿಷ್ಟ ಪಂಗಡಗಳು (ಎಸ್‌ಟಿ), ಅತ್ಯಂತ ಹಿಂದುಳಿದ ವರ್ಗಗಳು (ಇಬಿಸಿ) ಹಾಗೂ ಇತರ ಹಿಂದುಳಿದ ವರ್ಗಗಳಿಗೆ (ಒಬಿಸಿ) ನೀಡುವ ಮೀಸಲಾತಿಯನ್ನು ಈಗಿನ ಶೇ 50ರಿಂದ ಶೇ 65ಕ್ಕೆ ಹೆಚ್ಚಳವಾಗಲಿದೆ. ಆರ್ಥಿಕವಾಗಿ ಹಿಂದುಳಿದ ವರ್ಗಗಳಿಗೆ (ಇಡಬ್ಲ್ಯುಎಸ್) ಶೇ 10ರಷ್ಟು ರಿಸರ್ವೇಶನ್​ ಸಿಗಲಿದೆ.

ಮಸೂದೆಗೆ ರಾಜ್ಯಪಾಲರು ಓಕೆ: ಸಮಾಜದ ದುರ್ಬಲ ವರ್ಗಗಳಿಗೆ ಸರ್ಕಾರಿ ಉದ್ಯೋಗ ಹಾಗೂ ಶಿಕ್ಷಣ ಸಂಸ್ಥೆಗಳಲ್ಲಿ ಮೀಸಲಾತಿ ಪ್ರಮಾಣವನ್ನು ಹೆಚ್ಚಿಸುವ ಸಲುವಾಗಿ, ಬಿಹಾರ ವಿಧಾನಸಭೆಯು ನವೆಂಬರ್​ 8 ರಂದು ಮೀಸಲಾತಿ ತಿದ್ದುಪಡಿ ಮಸೂದೆಯನ್ನು ಸರ್ವಾನುಮತದಿಂದ ಅಂಗೀಕರಿಸಿತ್ತು. ಬಳಿಕ ಅದನ್ನು ರಾಜ್ಯಪಾಲರಿಗೆ ಕಳುಹಿಸಿತ್ತು. ಮಹತ್ವದ ಮಸೂದೆಗೆ ಗವರ್ನರ್​ ರಾಜೇಂದ್ರ ಅರ್ಲೇಕರ್ ಅನುಮೋದನೆ ನೀಡಿದ್ದಾರೆ. ರಾಜ್ಯಪಾಲರು ಸಹಿ ಮಾಡಿ ಮಸೂದೆ ವಾಪಸ್ ಸರ್ಕಾರಕ್ಕೆ ಕಳುಹಿಸಲಿದ್ದಾರೆ. ಈ ಸಂಬಂಧ ಶೀಘ್ರದಲ್ಲೇ ಸರ್ಕಾರ ಗೆಜೆಟ್ ಅಧಿಸೂಚನೆ ಪ್ರಕಟಿಸಲಿದೆ.

ಮೀಸಲಾತಿ ಹೇಗಿದೆ: ಈಗ ಬಿಹಾರದಲ್ಲಿ ಮೀಸಲಾತಿಯನ್ನು ಶೇ.60 ರಿಂದ 75ಕ್ಕೆ ಹೆಚ್ಚಿಸಲಾಗಿದೆ. ಇದರಿಂದ ಇಬಿಸಿಗೆ ಶೇ 18 ರಿಂದ 25% ಕ್ಕೆ ಹೆಚ್ಚಳವಾದರೆ, ಹಿಂದುಳಿದ ವರ್ಗಕ್ಕೆ ಶೇ 12 ರಿಂದ 18%, ಪರಿಶಿಷ್ಠ ಜಾತಿಗೆ 16% ರಿಂದ 20%, ಪರಿಶಿಷ್ಟ ಪಂಗಡಕ್ಕೆ ಮೀಸಲಾತಿಯು 1% ರಿಂದ 2% ಕ್ಕೆ ಏರಲಿದೆ.

ಬಿಹಾರ ಸರ್ಕಾರ ನಡೆಸಿದ ಜಾತಿ ಗಣತಿ ವರದಿಯ ಪ್ರಕಾರ, ರಾಜ್ಯದಲ್ಲಿ ಶೇ. 27.13ರಷ್ಟು ಇತರ ಹಿಂದುಳಿದ ವರ್ಗದವರಿದ್ದಾರೆ. ಶೇ.36ರಷ್ಟು ತೀರಾ ಹಿಂದುಳಿದ ವರ್ಗದವರಿದ್ದಾರೆ. ಅಂದರೆ ಒಟ್ಟು ಶೇ. 63ರಷ್ಟು (13.07 ಕೋಟಿ ಜನರು) ಇತರ ಹಿಂದುಳಿದ ವರ್ಗ ಮತ್ತು ತೀರಾ ಹಿಂದುಳಿದ ವರ್ಗಕ್ಕೆ ಸೇರಿದವರು. ಇದರೊಂದಿಗೆ ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ಪಂಗಡ ಒಟ್ಟಾಗಿ ಶೇ. 21ರಷ್ಟು ಮಂದಿ ಇದ್ದಾರೆ.

ವಿಧಾನಸಭೆಯಲ್ಲಿ ಸಂಸದೀಯ ವ್ಯವಹಾರಗಳ ಸಚಿವ ವಿಜಯ್ ಕುಮಾರ್ ಚೌಧರಿ ಮಂಡಿಸಿದ ವರದಿಯ ಪ್ರಕಾರ, ರಾಜ್ಯದಲ್ಲಿ ಸುಮಾರು 2.97 ಕೋಟಿ ಕುಟುಂಬಗಳು ನೆಲೆಸಿದ್ದು, ಅದರಲ್ಲಿ 94 ಲಕ್ಷಕ್ಕೂ ಹೆಚ್ಚು ಕುಟುಂಬಗಳು ತಿಂಗಳಿಗೆ 6,000 ಅಥವಾ ಅದಕ್ಕಿಂತ ಕಡಿಮೆ ಆದಾಯದಲ್ಲಿ ಬದುಕುತ್ತಿದ್ದಾರೆ. ಅಂದರೆ ಶೇ. 34.13ರಷ್ಟು ಮಂದಿ ಅತಿ ಕಡಿಮೆ ಆದಾಯ ಹೊಂದಿದ್ದಾರೆ.

ಇದನ್ನೂ ಓದಿ: ಮೀಸಲಾತಿ: ಶೇ.50ರಿಂದ 75ಕ್ಕೆ ಹೆಚ್ಚಿಸಲು ಬಿಹಾರ ಸಚಿವ ಸಂಪುಟ ಒಪ್ಪಿಗೆ