ನವದೆಹಲಿ : ದೆಹಲಿಯಲ್ಲಿ ಈವರೆಗೆ ಉಚಿತ ವಿದ್ಯುತ್ ಬಿಲ್ ಸಬ್ಸಿಡಿ ಪಡೆಯಲು ಬಹುಪಾಲು ಜನ ಅರ್ಹರಾಗಿದ್ದರು. ಆದರೆ, ಈ ನಿಯಮದಲ್ಲಿ ಈಗ ಬದಲಾವಣೆ ತರಲು ಆಪ್ ಸರ್ಕಾರ ಮುಂದಾಗಿದೆ. ಸಬ್ಸಿಡಿ ನಿಯಮಗಳನ್ನು ಬದಲಿಸಲು ದೆಹಲಿ ಸರ್ಕಾರ ಸಿದ್ಧತೆ ನಡೆಸಿದೆ.
ಈ ಯೋಜನೆಗೆ ಒಪ್ಪಿಗೆ ನೀಡಿದರೆ ಮಾತ್ರ ಸಹಾಯಧನ ದೊರೆಯಲಿದೆಯಂತೆ. ಒಪ್ಪಿಗೆ ನೀಡದಿದ್ದರೆ ಬಳಕೆಗೆ ಅನುಗುಣವಾಗಿ ವಿದ್ಯುತ್ ಬಿಲ್ ಸಂಪೂರ್ಣವಾಗಿ ಪಾವತಿಸಬೇಕಾಗುತ್ತದೆ. ಅಷ್ಟೇ ಅಲ್ಲ, ನೀಡಲಾದ ಅರ್ಜಿಯನ್ನು ತುಂಬದೇ ಬಿಟ್ಟರೂ ಯೋಜನೆಯ ಲಾಭವನ್ನು ಪಡೆಯಲು ಬಯಸುವುದಿಲ್ಲ ಎಂದು ಸರ್ಕಾರ ಪರಿಗಣಿಸುತ್ತದಂತೆ.
ದೆಹಲಿ ಸರ್ಕಾರವು ಗ್ರಾಹಕರಿಗೆ ಈಗ 200 ಯುನಿಟ್‌ಗಳವರೆಗೆ ಸಂಪೂರ್ಣ ಸಬ್ಸಿಡಿ ನೀಡುತ್ತಿದೆ. ಹಾಗೆ 200 ರಿಂದ 400 ಯೂನಿಟ್ ಬಳಕೆ ಮಾಡುವ ಜನರು ಬಿಲ್‌ನ ಶೇ.50ರಷ್ಟು ಹಣ ತುಂಬಬೇಕಿತ್ತು. ಆದರೆ, ಈಗ ನಿಯಮ ಬದಲಾವಣೆ ಆಗಲಿದೆ. ಗ್ರಾಹಕರು ಈ ಫಾರ್ಮ್ ಅನ್ನು ತಮ್ಮ ಹತ್ತಿರದ ವಿದ್ಯುತ್ ಬಿಲ್ ಕೇಂದ್ರಕ್ಕೆ ಸಲ್ಲಿಸಬಹುದು. ಶೀಘ್ರದಲ್ಲೇ ಮೊಬೈಲ್ ಅಪ್ಲಿಕೇಶನ್ ಮತ್ತು ಆನ್‌ಲೈನ್ ಅಪ್ಲಿಕೇಶನ್ ಸೌಲಭ್ಯವನ್ನೂ ಸಹ ಬಿಡುಗಡೆ ಮಾಡಲು ಸರ್ಕಾರ ಮುಂದಾಗಿವೆ.
ದೆಹಲಿಯ ಜನರಿಗೆ ನೀಡುತ್ತಿರುವ ಉಚಿತ ಮತ್ತು ಸಬ್ಸಿಡಿ ವಿದ್ಯುತ್ ಬಗ್ಗೆ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ಮಾತನಾಡಿ, ಅನೇಕ ಜನರು ಸಮರ್ಥರಾಗಿದ್ದಾರೆ, ಉಚಿತ ವಿದ್ಯುತ್ ಬೇಡ ಎಂದು ಅವರೇ ಹೇಳಿದ್ದಾರೆ. ಈ ಹಿನ್ನೆಲೆ ಈಗ ನಾವು ಜನರಿಗೆ ವಿದ್ಯುತ್ ಬಿಲ್‌ನಲ್ಲಿ ಸಬ್ಸಿಡಿ ಬೇಕೇ ಎಂದು ಕೇಳುತ್ತೇವೆ? ಬೇಕು ಎಂದು ಹೇಳಿದರೆ ಕೊಡುತ್ತೇವೆ, ಬೇಡ ಎಂದರೆ ಕೊಡುವುದಿಲ್ಲ.
ಸಬ್ಸಿಡಿ ಕೇಳುವವರಿಗೆ ಮಾತ್ರ ದೆಹಲಿಯಲ್ಲಿ ಅಕ್ಟೋಬರ್ 1 ರಿಂದ ವಿದ್ಯುತ್ ಸಬ್ಸಿಡಿ ನೀಡಲಾಗುವುದು ಎಂದು ವಿವರಿಸಿದರು. ದೆಹಲಿಯಲ್ಲಿ ಸದ್ಯ 27 ಲಕ್ಷ ಗ್ರಾಹಕರು ಉಚಿತ ವಿದ್ಯುತ್ ಸೇವೆ ಪಡೆಯುತ್ತಿದ್ದಾರೆ.
ಇದನ್ನೂ ಓದಿ : ಹಳ್ಳದಲ್ಲಿ ತೇಲಿಬಂದ 7 ಭ್ರೂಣಗಳು: ಹೌಹಾರಿದ ಬೆಳಗಾವಿ ಜನ!
