ફેબ્રુઆરી 2018માં લેવાયેલી GPSCની પરીક્ષામાં એક હજારથી વધુ પરીક્ષાર્થીઓએ ભાગ લીધો હતો. જેમાં ટોપ ટ્વેન્ટીમાં સુરતના ત્રણ પરીક્ષાર્થીઓ ઝળક્યા છે. સુરતના અંકિત ગોહિલે રાજ્યમાં પ્રથમ ક્રમાંક મેળવ્યો છે. આગામી સમયમાં તે ટ્રેનિંગ પૂર્ણ કર્યા બાદ ડેપ્યુટી કલેક્ટર તરીકે સેવા આપનાર છે. પુત્રના આ પરિણામ બાદ પરિવાર પણ ભાવુક થયો છે.
સુરતના અડાજણ વિસ્તારમાં રહેતા અને પોલીસ વિભાગમાં PSI તરીકે ફરજ બજાવતા પિયુષ ગોહિલના પુત્ર અંકિત ગોહિલે GPSCની પરીક્ષામાં સમગ્ર ગુજરાતમાં પ્રથમ ક્રમાંક મેળવ્યો છે. રાજ્યભરમાં જાહેર કરાયેલા GPSCના પરિણામોમાં સુરત શહેરના બે યુવાનોએ ટોપ ટેનમાં સ્થાન મેળવ્યું છે.
જ્યારે ટોપ વીસમાં સુરતના ત્રણ પરીક્ષાર્થીઓએ સ્થાન પ્રાપ્ત કર્યું છે. એક હજાર કરતા વધુ પરીક્ષાર્થીઓએ આ પરીક્ષામાં ભાગ લીધો હતો. જેમાં અંકિત ગોહિલે ઝળહળતુ પરિણામ મેળવી ડેપ્યુટી કલેક્ટરની પોસ્ટ માટેના દ્વાર ખોલી નાખ્યા છે. આગામી બે વર્ષમાં ડેપ્યુટી કલેક્ટરની ટ્રેનિંગ લીધા બાદ તે ગુજરાત સરકારમાં ડેપ્યુટી કલેક્ટર તરીકેની ફરજ બજાવશે. અંકિતના આ પરિણામને પગલે ઘરમાં હર્ષની લાગણી જોવા મળી રહી છે. પરિવારે અંકિતને મીઠાઈ ખવડાવી શુભેચ્છા પાઠવી છે. જ્યારે પુત્રના આ પરિણામથી ભાવુક બનેલી માના આંખમાં આસું જોવા મળ્યાં હતા.
અંકિતે જણાવ્યું કે પરિણામ પાછળ તેના મામાનો મોટો ફાળો છે. માતા-પિતાએ પણ ખૂબ સહકાર આપ્યો છે. તેમજ તેણે આ સિદ્ધિ મેળવવા માટે સોશિયલ મીડિયાથી પણ અંતર જાળવ્યું હતુ. ત્યારે તે હવે ડેપ્યુટી કલેક્ટરની સાથે યુપીએસસની પણ તૈયારીઓ કરશે.
