રાજકોટઃ રાજકોટમાં લોકોને છેતરવા માટે એક નવો જ કિમિયો અપનાવાયો છે. જેમાં લગ્ન કરનાર યુવક- યુવતીઓને રૂપિયા 25000 ડિપોઝિટ ભરાવીને લગ્ન બાદ તેમને એક લાખ રૂપિયા આપવામાં આવશે. તેવું જણાવવામાં આવ્યું હતું. જો કે લગ્ન થયા બાદ કોઈપણ જાતના પૈસા આ લોકોને આપવામાં આવ્યા ન હતા. અંતે આ લોકો છેતરાયા હોવાનું ભાન થતા મામલો પોલીસ સ્ટેશન સુધી પહોંચ્યો છે. જોકે આ પ્રકારની ઘટના રાજકોટમાં સામે આવતા ચકચાર મચી જવા પામી છે.
આ પણ વાંચોઃ રાજકોટમાં વેપારી પાસેથી મળી 500ની 31 નકલી નોટ, બેન્ક મેનેજરે નોંધાવી પોલીસ ફરિયાદ
સંસ્થાના નામે કાવતરૂઃ રાજકોટના લવ ગાર્ડન પાસે મોટી સંખ્યામાં રીયલ ફ્રેન્ડ ફાઉન્ડેશન નામની સંસ્થાના ભોગ બનેલા સભ્યો એકઠા થયા હતા. એકઠા થયેલા લોકોનું કહેવું હતું કે, રીયલ ફ્રેન્ડ ફાઉન્ડેશન નામની સંસ્થાએ તેમની સાથે છેતરપિંડી કરી છે. આ સંસ્થા જેમના લગ્ન થવાના હોય તેમની પાસેથી રૂપિયા 25000 લગ્ન ચાંદલા સ્વરૂપે લેવામાં આવતા હતા. લગ્ન થઈ ગયા બાદ રૂપિયા એક લાખનો ચેક આપવાની વાત પણ કરવામાં આવતી હતી. એક લાખનો ચેક આપ્યા બાદ તેમાંથી ₹12,500 પાછા આપવાનું પણ કહેવામાં આવતું હતું. જ્યારે વ્યક્તિ ચેક લેવા આવે ત્યારે તેણે અન્ય એક સભ્ય સંસ્થાને ફરજિયાત આપવો પડશે તે પ્રકારનું પણ દબાણ કરવામાં આવતું હતું.
કોર્ટમાં મામલોઃ રિયલ ફ્રેન્ડ ફાઉન્ડેશનના સંસ્થાપકો વિરુદ્ધ ધ્રોલ કોર્ટમાં ચેક બાઉન્સ અંગે કેસ પણ ચાલી રહ્યો હોવાનું છેતરાયેલા લોકો જણાવી રહ્યા છે. છેતરાયેલા લોકોનું કહેવું છે કે, તેઓ જ્યારે સંસ્થાની ઓફિસ પર જતા હતા ત્યારે તેમને કેટલાક ફોટોગ્રાફ્સ બતાવવામાં આવતા હતા. જે ફોટોગ્રાફ્સથી હેપી કસ્ટમર કેટલા છે તેવું આભાસી ચિત્ર પણ ઉભું કરવામાં આવતું હતું. જ્યારે બીજી તરફ લોકોને પણ એક લાલચ જાગી હતી. તેમને ₹25,000નું રોકાણ કરતા એક લાખ રૂપિયા મળી જશે. જેથી લોકો ચાર ગણા રૂપિયા મેળવવાની લાલચમાં 25000 રૂપિયામાં સભ્ય પદ મેળવી લેતા હતા.
આ પણ વાંચોઃ જળ એ જીવન છે પરતું ભાદર ડેમના પાટીયા ઢીલાં છે, ડેમમાંથી પાણી લીકેજ
પોલીસને રજૂઆતઃ આ અંગે રાજકોટ ખાતે રીયલ ફ્રેન્ડ ફાઉન્ડેશનની સંસ્થા સંભાળતી જીજ્ઞાસા પટેલે જણાવ્યું હતું કે, આ ફાઉન્ડેશનમાં એક યોજના હતી કે જેમાં જે દીકરા દીકરીઓના લગ્ન થાય તેમને રૂપિયા એક લાખની સહાય આપવામાં આવશે. જ્યારે આ યોજનામાં નોંધણી સમયે રૂપિયા 25,000 ભરવા પડે છે. તમામ ડોક્યુમેન્ટ લગ્ન બાદના આપો તેમાં તમને એક લાખ રૂપિયા સહાય પેઠે આપવામાં આવે છે. જ્યારે આ યોજનામાં ઘણા લોકોને ચેક સંસ્થા દ્વારા આપવામાં આવ્યા છે.
ફરિયાદ મોટીઃ પરંતુ ચાર ચાર વખત આ ચેક રિટર્ન થયા હોવાની ઘટના સામે આવી છે. જ્યારે આ ઘટનાને લઈને કંપનીના હોદ્દેદારો કંઈ જવાબ આપતા નથી લોકો અહીંયા રાજકોટમાં મને ફોન કરીને આ અંગે પૂછપરછ કરીને માનસિક ત્રાસ આપી રહ્યા છે. જ્યારે આ અંગે ભોગ બનેલા વિજય હિરપરાએ જણાવ્યું હતું કે અમે આજે ભોગ બનેલા લોકો રાજકોટ પોલીસ કમિશનરને રજૂઆત કરવા માટે આવ્યા છીએ. જેમાં જુનાગઢથી સંચાલન થતું રીયલ ફ્રેન્ડ ફાઉન્ડેશન જેમના સંચાલક હરેશભાઈ ડોબરીયા દ્વારા વર્ષ 2019થી એક યોજના બહાર પાડવામાં આવી હતી.
આ પણ વાંચોઃ રાજકોટ જિલ્લામાં સતત બીજા દિવસે મોટી માત્રામાં વિદેશી દારૂ ઝડપાયો
છેત્તરપિંડીનું કાવતરૂઃ જેનું નામ હતું લગ્ન સહાય યોજના જે લોકોના ઘરમાં લગ્ન હોય તેમના લગ્ન થયા બાદ પાંચ મહિના પછી આ સહાયમાં એક લાખ રૂપિયા સંસ્થા તરફથી આપવામાં આવતા હતા. આ સંસ્થા દ્વારા રૂપિયા 25000 પહેલા લેવામાં આવે છે. ત્યારબાદ આ નાણાની ચુકવણી કરવામાં આવે છે. જેમાં શરુઆતમાં સંસ્થા દ્વારા 10 થી 15 લોકોને રૂપિયા એક લાખની સહાય આપ્યા બાદ હજારો લોકો પાસેથી રૂ. 25000 ઉઘરાવીને સંસ્થા દ્વારા છેતરપિંડી કરવામાં આવી છે.
