સેલવાસ : જિલ્લાના અમલી ખાતે પૂજા વ્યુ સોસાયટીમાંથી રિઝર્વ બટાલિયનના જવાનના બાથરૂમમાંથી ભાનુ પ્રતાપ સિંઘ નામના કોલેજીયન યુવકનો મૃતદેહ મળી આવ્યો હતો. મૃતક યુવક કરવડ કોલેજ ખાતે અભ્યાસ કરતો હતો અને પીપરીયામાં પોતાના પરિવાર સાથે રહેતો હતો.
મળતી વિગતો મુજબ મૃતક યુવકનો મૃતદેહ જે ઘરમાંથી મળ્યો છે, તે ઘરની યુવતી સાથે તે પ્રેમસંબધમાં હતો. જેને લઇને થોડા સમય પહેલા યુવક સાથે યુવતીના પિતાએ ઘરે બોલાવી મારકૂટ કરી હતી અને તેને હોસ્પિટલમાં ભર્તી કરવો પડ્યો હતો.
તે વખતે યુવક અને યુવતી બંનેના પિતા રિઝર્વ બટાલિયનના ફોરેસ્ટમાં જવાન હતા, તે સમયે સમગ્ર મામલાને આપસી સમજૂતીથી સુલઝાવ્યો હતો. જે બાદ બુધવારે અચાનક યુવકનો મૃતદેહ યુવતીના ઘરના બાથરૂમમાંથી મળી આવતા યુવકને ઘરે બોલાવી હત્યાના ઇરાદાથી ગળુ દબાવી મોતને ઘાટ ઉતાર્યા હોવાની પ્રાથમિક તપાસમાં સામે આવ્યું છે. આ સાથે યુવકને એસિડ પણ પીવડાવ્યું હોય અને તે જ એસિડની બોટલ તેના હાથમાં રાખી હોવાનું યુવકના પરિવારે જણાવ્યું હતું.
પરિવારના જણાવ્યા મુજબ તેમનો દીકરો વહેલી સવારે પાંચ વાગ્યે તેમના ઘરેથી કોઈનો ફોન આવ્યા બાદ ઘરમાંથી બહાર નીકળ્યો હતો. જે બાદ તેનો મૃતદેહ યુવતીના ઘરે જ મળી આવ્યો હતો. તેમનો મૃતદેહ અહીંયા કઈ રીતે પહોંચ્યો અને માતા-પિતાને જાણ કર્યા વગર જ હોસ્પિટલમાં મોકલી દેવાયો હોવાથી પરિવારને હત્યાની શંકા સેવી રહી છે. જોકે સમગ્ર મામલે પોલીસે તપાસ હાથ ધરી છે. જેમાં હજુ સુધી કોઈની ધરપકડ કરવામાં આવી નથી.
