- ફિશ એક્સપોર્ટ કરતાં યુનિટોને મદદનો પ્રયાસ
- કેન્દ્ર સરકાર દ્વારા ફિશરીઝ એક્સપોર્ટ યુનિટોને અપગ્રેડેશનની મદદ
- સેન્ટ્રલ ઇન્સ્ટિટ્યૂટ ઓફ ફિશરીઝ રિસર્ચ સંસ્થા એક્સપોર્ટ યુનિટો સાથે MOU થયાં
ગીર સોમનાથઃ કોરોનાની મહામારી વચ્ચે દેશમાં આંતરરાષ્ટ્રીય એક્સપોર્ટ ઉદ્યોગને ભારે મુશ્કેલીઓનો સામનો કરવો પડી રહ્યો છે. વિશેષરૂપે ફિશ એક્સપોર્ટ કરતા નાના એક્સપોર્ટરોના કન્ટેઇનર ચાઇના સહિતના દેશોમાં રિજેક્ટ થવાના અને હોલ્ડ પર મુકાયાના ઘણા બનાવો સામે આવ્યાં છે. ત્યારે કેન્દ્રસરકાર આ સીફૂડ એક્સપોર્ટરોની મદદે આગળ આવી છે. કેન્દ્ર સરકારની રિસર્ચ સંસ્થા સેન્ટ્રલ ઇન્સ્ટિટ્યૂટ ઓફ ફિશરીઝ રિસર્ચ સંસ્થા એક્સપોર્ટ યુનિટો સાથે MOU કરીને પોતાની ટેકનોલોજી અને લેબ રિસર્ચ દ્વારા ફિશરીઝ એક્સપોર્ટ યુનિટોને યોગ્ય સાધન સાથે લેબોરેટરી સ્થાપિત કરવામાં મદદ કરશે. આંતરરાષ્ટ્રીય માનાંકો પ્રમાણેની ટેસ્ટિંગ કરવા માટે એક્સપોર્ટ યુનિટોના સ્ટાફને ટ્રેઈનિંગ પણ આપવામાં આવશે. જેથી આંતરરાષ્ટ્રીય સીફૂડ એક્સપોર્ટમાં રિજેક્શન ન થાય અને એક્સપોર્ટની ગુણવત્તા સુધરી શકે.
ભારતના સી ફૂડની વિશ્વસનીયતા વધશે
કોરોના કાળની શરૂઆતથી જ દેશની એક્સપોર્ટ ઇન્ડસ્ટ્રીઝ ભારે પરેશાનીનો સામનો કરી રહી છે. યુરોપિયન દેશોમાં એક્સપોર્ટ કરાયેલ ખાદ્ય પદાર્થો અને સી ફૂડ ઇન્ડસ્ટ્રીઝ આ સમસ્યાથી સૌથી વધુ અસરગ્રસ્ત થઈ છે. ત્યારે કેન્દ્રસરકારના સંંશોધન એકમ " સેન્ટ્રલ ઇન્સ્ટિટ્યૂટ ઓફ ફિશરીઝ રિસર્ચ" (cift) હવેથી પોતાની અદ્યતન ટેકનોલોજીનો લાભ ખાનગી નાના ફિશ એક્સપોર્ટર યુનિટોને આપવા માટે આગળ આવી છે. Cift ના ડિરેક્ટર રવિશંકર દ્વારા વેરાવળ cift સંસ્થાન ખાતે ખાનગી ફિશ એક્સપોર્ટરો સાથે મિટિંગ કરીને તેમની સાથે સંંશોધન સંબંધિત mou પર હસ્તાક્ષર કર્યા હતાં. જેથી ભારતીય એક્સપોર્ટની ગુણવત્તા સુધરે, રિજેક્શન અટકે અને વિશ્વમાં ભારતના સીફૂડ તરફ વિશ્વસનીયતા વધારી શકાય.
નાનામોટા ફિશ એક્સપોર્ટર યુનિટ સમગ્ર દેશમાંથી સીફૂડ એક્સપોર્ટ કરતા હોય છે. વિશેષરૂપે ગુજરાતમાં ફિશરીઝ એક્સપોર્ટનું પ્રમાણ ખૂબ વધારે જોવા મળે છે. ત્યારે નાનામોટા બંદરો પર આવેલ આવા ખાનગી એક્સપોર્ટર પ્લાન્ટને કેન્દ્ર સરકારની આંતરરાષ્ટ્રીયસ્તરની રિસર્ચ ઇન્સ્ટિટ્યૂટનું માર્ગદર્શન એ કોરોનાકાળમાં સંઘર્ષ કરતી ફિશરીઝ એક્સપોર્ટ ઇન્ડસ્ટ્રીઝ માટે સંજીવની સાબિત થશે.
આ પણ વાંચોઃ રાજ્યના સી ફુડ એક્સપોર્ટર્સની હાલત કફોડી
આ પણ વાંચોઃ વર્લ્ડ ફિશરીઝ ડે: પોરબંદરમાં માછીમારોની સ્થિતિ અને જળસીમાની સુરક્ષા અંગે ETVનો અહેવાલ