- જાફરાબાદ અને રાજુલામાં ચાર ચાર ઈંચ વરસાદ
- ધાતરવડી-2 ડેમના 12 દરવાજા ખોલવામા આવ્યા
- જાફરાબાદ બંદર પર 3 નંબરનું સિગ્નલ લગાવાયું
અમરેલી: રાજ્યમાં ભારે વરસાદની આગાહી વચ્ચે અમરેલી જિલ્લામાં ગુરુવારે ભારે વરસાદ વરસ્યો હતો. અમરેલી જિલ્લામાં ગુરુવારે સવારે 6 થી બપોર 2 વાગ્યા સુધીમાં જાફરાબાદ અને રાજુલામાં ચાર ચાર ઈંચ વરસાદ વરસી ચૂક્યો છે. જિલ્લામાં ધોધમાર વરસાદના કારણે અનેક વિસ્તારોમાં પાણી ભરાવાની સમસ્યા સર્જાઈ છે.
તાલુકા પ્રમાણે વરસાદ
| તાલુકા | વરસાદ |
| જાફરાબાદ | 109 મિમી |
| રાજુલા | 102 મિમી |
| લાઠી | 31 મિમી |
| બાબરા | 29 મિમી |
| ખાંભા | 27 મિમી |
| સાવરકુંડલા | 16 મિમી |
| લીલિયા | 13 મિમી |
| અમરેલી | 08 મિમી |
| ધારી | 04 મિમી |
રાજુલા તાલુકાના ના ધાતરવડી-2 ડેમ ઓવરફ્લો થયો
રાજુલાનો ધાતરવડી-2 ડેમ ઓવરફ્લો થતા 12 દરવાજા ખોલવામા આવ્યા હતા. જેના કારણે હિંડોરણાની ધાતરવડી નદીમાં ઘોડાપૂરની સ્થિતિ સર્જાઈ છે. તંત્ર દ્વારા નીચાણમાં આવતા હિંડોરણા, ખાખબાઈ, વડ, ભેરાઈ, રામપરા, લોઠપુર, છતડીયા સહિત ગામડાને એલર્ટ કરી દેવાયા છે. આ ઉપરાંત સુરવો ડેમના 3 દરવાજા 3 ફૂટ ખોલવામા આવતા નદી કાંઠા વિસ્તારમાં આવતા ગામોને એલર્ટ કરવામા આવ્યા છે.
આ પણ વાંચો : "ગુલાબ" બાદ હવે અરબ સાગરમાં બની રહ્યુ છે ચક્રવાતી તોફાન "શાહીન"
રાયડી ડેમના 4 દરવાજા 1 ફૂટ ખોલવામાં આવ્યાંઅમરેલી જિલ્લામાં અવિરત વરસાદ ખાંભાના ગ્રામ્ય વિસ્તારમાં મુશળધાર વરસાદના કારણે રાયડી ડેમના 4 દરવાજા 1 ફૂટ ખોલવામાં આવ્યાં છે. જેથી નિચાણ વાળા નાગેશ્રી, ચોત્રા, મીઠાપુર જેવા કેટલાક ગામોને એલર્ટ કરવામાં આવ્યાં છે.
લાઠી ની ગાગડીય નદીના પુલ પર બાઈક સવાર ફસાયો
જિલ્લામાં ધોધમાર વરસાદના પગલે નદીઓમાં પૂરની સ્થિતિ સર્જાતા કોઝવે પરથી પાણી પસાર થઈ રહ્યા છે. ત્યારે લાઠીના ગાગડીયા નદીના પુલ પર એક વૃદ્ધ બાઈક સાથે ફસાયા હતા. સ્થાનિક લોકોનું ધ્યાન પડતા વૃદ્ધની મદદે આવ્યા હતા અને વૃદ્ધને પાણીના પ્રવાહ વચ્ચેથી બચાવી લીધા હતા.
આ પણ વાંચો : 24 કલાકમાં જૂનાગઢમાં ભારે વરસાદની આગાહી
અમરેલીના જાફરાબાદ બંદર પર 3 નંબરનું સિગ્નલ લગાવાયું
ગુલાબ વાવાઝોડાની અસરના પગલે અમરેલી સહિતના દરિયાકાંઠાના જિલ્લાઓમાં ધોધમાર વરસાદ વરસી રહ્યો છે. ત્યારે અમરેલી જિલ્લાના જાફરાબાદ બંદર પર 3 નંબરનું ભયસૂચક સિગ્નલ લગાવી દેવામા આવ્યું છે.
