જૂનાગઢ: આજે વિશ્વ ચકલી દિવસ છે. ઘર ઘરના પક્ષી તરીકે જાણીતી અને માનીતી ચકલીબેન આજે સિમેન્ટના જંગલની વચ્ચે પોતાનું અસ્તિત્વ ગુમાવી રહી છે. આ નાનકડી પક્ષીઓની જાતિ આજે વિશ્વમાંથી લુપ્ત થવાના આરે ઉભી છે. પરિણામે ચકલીને લુપ્ત થવાથી બચાવવા માટે એક વૈશ્વિક અભિયાન શરૂ કરવામાં આવ્યું છે.
આ વૈશ્વિક અભિયાનમાં જૂનાગઢના ચકલી પ્રેમી પણ જોડાયા છે અને તેમને ખૂબ સારી સફળતા મળી રહી છે. જૂનાગઢમાં સાત વર્ષના ચકલી બચાવો અભિયાન દરમિયાન આજે 10,000 થી 15,000 ચકલીઓનું એક આખું જંગલ ઊભું થયું છે જે ખરા અર્થમાં ચકલી દિવસની ઉજવણીને સાર્થક બનાવે છે.
આજે વિશ્વ ચકલી દિવસ: એક સમયે ઘર ઘરના પક્ષી તરીકે જાણીતી અને માનીતી થયેલી ચકલીની સંખ્યા એટલી હદે ઘટવા માંડી છે કે ચકલીઓને બચાવવા માટે ચકલી દિવસના રૂપમાં વિશેષ ઉજવણી કરવાની સમગ્ર વિશ્વને ફરજ પડી રહી છે. ચકલી લુપ્ત થતી બચાવી શકાય તે માટે દર વર્ષે 20 મી માર્ચના દિવસે વિશ્વ ચકલી દિવસની ઉજવણી થાય છે.
આ દિશામાં કાર્ય કરતાં જૂનાગઢના ચકલી પ્રેમીઓને ચકલી બચાવો અભિયાન અંતર્ગત ખૂબ સારી કહી શકાય તેવી સફળતા પ્રાપ્ત થઈ છે. છેલ્લા 5-7 વર્ષના સમયમાં એક ચોક્કસ વિસ્તારમાં ચકલીઓની સંખ્યામાં નોંધપાત્ર વધારો થયો છે જેની પાછળ 8-10 ચકલી પ્રેમીઓની મહેનત જોવા મળે છે.
દરરોજ ચણ અને પાણી નાખી કર્યો ચકલીની સંખ્યામાં વધારો: જૂનાગઢ શહેરની બહાર નીકળતા જ ખલીલપુર ગામના પાટીયા પાસે છેલ્લા 5-7 વર્ષથી ચકલીઓને બચાવવા માટે એક વિશેષ અભિયાન શરૂ થયું છે. અહીં પરસોતમ પોશિયા, સુરેશ મોણપરા, ડાયાભાઈ કટારા અને કારાભાઈ સોજીત્રા સહિત 8 થી 10 મિત્રો છે તેઓ ચકલીઓને બચાવવા માટે કર્યો કરી રહ્યા છે.
ચકલીઓ માટે વિશેષ વ્યવસ્થા: આ 8 થી 10 ચકલી પ્રેમી મિત્રો દરરોજ સવાર અને સાંજના સમયે ચકલીઓ માટે ચોખા, બાજરી, મગ સહિત ધાન્યોની ચણ નાખવાની સાથે દિવસમાં બે વખત ચોખ્ખું અને ઠંડુ પાણી ચકલીઓને મળી રહે તે માટે વિશેષ વ્યવસ્થા કરે છે.
ચકલીઓ માટે કરવામાં આવેલ આ વિશેષ વ્યવસ્થાને પગલે આજે તેનું પરિણામ નજર સમક્ષ જોવા મળી રહ્યું છે. આજથી પાંચ-સાત વર્ષ પૂર્વે ખૂબ જ જુજ માત્રામાં જોવા મળતી ચકલીઓની સંખ્યામાં આજે ખૂબ જ નોંધપાત્ર વધારો થયો છે. એક સમયે જે વિસ્તારમાં ચકલીઓનું જંગલ આજે જોવા મળે છે, ત્યાં પાંચ વર્ષ પૂર્વે માત્ર જાળી જાખરા જોવા મળતા હતા.
આ તફાવત અને ચકલીઓની સંખ્યામાં વધારા પાછળ 7-8 ચકલી પ્રેમીઓની મહેનત છે, તેમની આ મહેનત બાદ આજે 8000 થી 10,000 ચકલીઓનું આખું અસ્તિત્વ ઊભું થયું છે જે આજના ચકલી દિવસની ઉજવણીને વિશેષ બનાવે છે.
આ પણ વાંચો:
