સુરત: સુરતના ડાયમંડ ઉદ્યોગમાં છેલ્લાં અઢી વર્ષથી મંદીની સ્થિતિ જોવા મળી રહી છે. આ ઉદ્યોગના 50 વર્ષના ઇતિહાસમાં આ સૌથી લાંબી મંદી નોંધાઈ છે. 2024-25માં નેચરલ ડાયમંડનું એક્સપોર્ટ માત્ર 1.12 લાખ કરોડ રહ્યું છે. આ આંકડો ગત વર્ષની સરખામણીએ 20 હજાર કરોડ ઓછો છે.
વર્ષ 2023-24માં 1.31 લાખ કરોડનું એક્સપોર્ટ થયું હતું. ચાઈનામાં છેલ્લા બે વર્ષથી ડાયમંડ જ્વેલરીને બદલે ગોલ્ડ જ્વેલરીની માંગ વધી છે. નોંધનીય છે કે વર્ષ 2021-22માં કોરોના દરમિયાન 1.80 લાખ કરોડનું રેકોર્ડ એક્સપોર્ટ થયું હતું.
સુરતમાં 5 હજાર જેટલા કટ એન્ડ પોલિશના કારખાના આવેલા છે. નેચરલ ડાયમંડની માંગ ઘટી છે, પરંતુ લેબગ્રોન ડાયમંડની માંગમાં સતત વધારો થઈ રહ્યો છે. લેબગ્રોન ડાયમંડના ઓછા ભાવ અને વધતી માંગે સુરતની ડાયમંડ ઇન્ડસ્ટ્રીને મોટો ટેકો આપ્યો છે.
અમેરિકા-યુરોપમાં આર્થિક મંદીને કારણે ગ્રાહકો 20,000 રૂપિયાથી સસ્તી જ્વેલરી તરફ વળ્યા છે. ચીનમાં કોરોના બાદની આર્થિક મંદીએ લોકોને સોનાની તરફેણ કરતા કર્યા છે. 2024-25માં લેબગ્રોન ડાયમંડનું 10,717 કરોડનું એક્સપોર્ટ થયું, જે ગત વર્ષ કરતાં 7.7 ટકા ઓછું છે. યુવા પેઢી લેબગ્રોન હીરાને તેની કિફાયતી કિંમત અને પર્યાવરણ અનુકૂળતાને કારણે વધુ પસંદ કરે છે. G7 દેશોના રશિયન હીરા પરના પ્રતિબંધની પણ અસર જોવા મળી છે.
દિનેશ નાવડિયા, ચેરમેન, IDI એ જણાવ્યું હતું કે યુક્રેન-રશિયા, ઈઝરાયેલ-હામસ યુદ્ધ ઉપરાંત અમેરિકાના લોકો સસ્તી જ્વેલરી ખરીદી રહ્યા છે, જેથી નેચરલ ડાયમંડનું એક્સપોર્ટ ઘટ્યું છે. ખાસ કરીને તેઓ 250 ડોલર (અંદાજે 20 હાજર રૂપિયા)ની અંદરની જ્વેલરી પસંદ કરે છે. છતાં આગામી વર્ષમાં નેચરલ ડાયમંડની ડિમાન્ડ વધી શકે છે.
