જંબુસર, ભરૂચ: જંબુસર તાલુકામાં એક યુવતી સાથે દુષ્કર્મ અને શારીરિક હુમલાની ચકચારી ઘટના બાદ પોલીસ તંત્ર હરકતમાં આવ્યું છે, અને બે આરોપીઓની ધરપકડ કરી છે. ઘટનાની ગંભીરતાને ધ્યાનમાં લઈ જંબુસર પોલીસે BNS (ભારતીય ન્યાય સંહિતા)ની કલમો હેઠળ ગુનો નોંધીને આરોપીઓ સામે કાર્યવાહી શરૂ કરી છે.
પ્રાપ્ત માહિતી મુજબ, દુષ્કર્મ અને મારામારીના આ ગુનામાં મુખ્ય આરોપી તરીકે સફવાન હસન મોલાનું નામ સામે આવ્યું છે. આ ઉપરાંત સફવાનના પિતા હસનઅલી મોલાની પણ ઘટનામાં સીધી સંડોવણી હોવાનું ખુલતા બંનેને પોલીસે ઝડપી લીધા છે. હાલ આરોપીઓને કોર્ટમાં રજૂ કરીને રિમાન્ડની પ્રક્રિયા હાથ ધરવામાં આવી રહી છે.
બીજી તરફ ઘટનામાં પીડિત યુવતીને ગંભીર ઈજાઓ પહોંચતાં તેને તાત્કાલિક સારવાર માટે સુરતની સ્મીમેર હોસ્પિટલ ખસેડવામાં આવી છે. તબીબો મુજબ, હાલ યુવતીની સ્થિતિ ગંભીર છે અને તેની સારવાર ચાલી રહી છે.
જિલ્લા પોલીસ દ્વારા નોંધાયેલી FIRના આધારે તપાસ આગળ ધપાવવામાં આવી રહી છે. પોલીસ તપાસમાં વધુ શખ્સોની સંડોવણી હોવાની શક્યતા જોવામાં આવી રહી છે. જિલ્લા પોલીસ અધિક્ષકના માર્ગદર્શન હેઠળ DYSP પી. એલ. ચૌધરીના નેતૃત્વમાં તપાસ ચાલી રહી છે.
“આ ગુનો અત્યંત ગંભીર પ્રકારનો છે. BNSની કડક કલમો હેઠળ કાર્યવાહી શરૂ કરી છે. જે કોઈ આ ઘટના સાથે સંડોવાયેલો હશે, તેની સામે કાયદેસરની કાર્યવાહી કરવામાં આવશે.” - પી. એલ. ચૌધરી, DYSP
