નવી દિલ્હી : મેડિકલ ક્ષેત્રમાં અનુસ્નાતક અભ્યાસક્રમોમાં પ્રવેશ માટે લેવામાં આવનારી NEET PG 2025 પરીક્ષા હવે નિર્ધારિત તારીખે યોજાશે નહીં. નેશનલ બોર્ડ ઓફ એક્ઝામિનેશન ઇન મેડિકલ સાયન્સ (NBEMS) દ્વારા સોમવારના રોજ સત્તાવાર રીતે પરીક્ષા મુલતવી રાખવાની જાહેરાત કરવામાં આવી છે. સુપ્રીમ કોર્ટના નિર્દેશ બાદ આ નિર્ણય લેવામાં આવ્યો છે, જેમાં પરીક્ષા એક જ શિફ્ટમાં લેવાનો આદેશ આપવામાં આવ્યો હતો.
NEET PG 2025 પરીક્ષા મુલતવી : NEET PG 2025 પરીક્ષા હવે નિર્ધારિત તારીખે યોજાશે નહીં. NBE દ્વારા જારી કરાયેલા નોટિફિકેશનમાં કહેવામાં આવ્યું છે કે, કોર્ટે ખાતરી કરવા કહ્યું છે કે પરીક્ષા સંપૂર્ણ પારદર્શિતા, સુરક્ષિત કેન્દ્રો અને યોગ્ય માળખાગત સુવિધા સાથે લેવામાં આવે. અગાઉ આ પરીક્ષા 15 જૂન, 2025 ના રોજ બે શિફ્ટમાં યોજાવાની હતી.
એક જ શિફ્ટમાં પરીક્ષા લેવામાં આવશે : NBE એ સ્પષ્ટતા કરી છે કે હવે એક જ શિફ્ટમાં પરીક્ષા લેવા માટે ટૂંક સમયમાં નવી પરીક્ષા તારીખ જાહેર કરવામાં આવશે. પરીક્ષા માટે વધુ પરીક્ષા કેન્દ્રો અને માળખાગત સુવિધાઓની વ્યવસ્થા કરવામાં આવી રહી છે.
સુપ્રીમ કોર્ટના નિર્દેશ બાદ લેવાયો નિર્ણય : અગાઉ, ઘણા ઉમેદવારો અને ડોકટરોએ NEET PG પરીક્ષાની તારીખ અને ફોર્મેટ અંગે સ્પષ્ટતાની માંગ કરી હતી. સુપ્રીમ કોર્ટમાં દાખલ કરાયેલી અરજીમાં (WP 456/2025) પણ આ મુદ્દો ઉઠાવવામાં આવ્યો હતો કે બે શિફ્ટમાં પરીક્ષા લેવાથી રેન્કિંગ અને ન્યાયીપણા પર અસર પડી શકે છે.
