ডিফু, ৭ ডিচেম্বৰ : কাৰ্বি আংলং জিলাৰ ডিফুৰ ছেমছনছিং মেম'ৰিয়েল ইংতি পাৰ্কৰ সন্মুখত জিলাখনৰ বিভিন্ন সামাজিক সংগঠনে যুটীয়াভাবে ধৰ্ণা কাৰ্যসূচী ৰূপায়ণ কৰিছিল ৷ ডিফু চিকিৎসা মহাবিদ্যালয় আৰু চিকিৎসালয়ৰ বাবে তৃতীয় আৰু চতুৰ্থ বৰ্গৰ সাক্ষাৎকাৰ পুনৰ অনুষ্ঠিত কৰি থলুৱা পাহাৰীয়া জনজাতি আৰু কাৰ্বি আংলঙৰ খিলঞ্জীয়া নিবনুৱাক চাকৰিত নিযুক্তি প্ৰদানৰ এশ শতাংশ সংৰক্ষণ দাবীত অনিৰ্দিষ্টকালীন অৱস্থান ধৰ্ণা কাৰ্যসূচী ৰূপায়ন কৰিছিল ৷
সংগঠন সমূহৰ নেতৃবৰ্গই শনিবাৰে প্ৰতিবাদ স্থলীতে এক সংবাদমেল সম্বোধন কৰি ধৰ্ণা কাৰ্যসূচী সাময়িক ভাবে স্থগিত কৰা হ'ল বুলি ঘোষণা কৰে ৷ কেএছএৰ সভাপতি বিজয় বে'ই কয় যে, ইতিমধ্যে সংগঠন সমূহৰ প্ৰতিবাদৰ বিষয়বস্তু সন্দৰ্ভত জিলা উপায়ুক্তই ৰাজ্য চৰকাৰলৈ এক পত্ৰ প্ৰেৰণ কৰিছে ৷ শুকুৰবাৰে কাৰ্বি আংলং স্বায়ত্ত শাসিত পৰিষদৰ মুখ্যকাৰ্যবাহী সদস্য তুলিৰাম ৰংহাঙ সংগঠন সমূহৰ সৈতে আলোচনাত মিলিত হয় ৷ ইতিমধ্যে স্বাস্থ্যমন্ত্ৰী ডা: হিমন্ত বিশ্ব শৰ্মাই সংগঠন সমূহৰ নেতৃবৰ্গক গুৱাহাটীত আলোচনাৰ বাবে আমন্ত্ৰণ জনাইছে বুলিও কয় বিজয় বে'ই ৷
উল্লেখ্য যে, মন্ত্ৰীৰ সৈতে হ'বলগীয়া আলোচনাত সন্তুষ্ট হ'লে অনিৰ্দিষ্টকালীন ধৰ্ণা প্ৰত্যাহাৰ কৰিব আৰু আলোচনাত অসন্তুষ্ট হ'লে পুনৰ পৰহিৰ পৰা অনিৰ্দিষ্টকালীন ধৰ্ণা চলিব বুলি কয় ৷ ইয়াৰোপৰি সংগঠন সমূহৰ নেতৃবৰ্গই কাইলৈ হ'বলগীয়া আলোচনাত কাৰ্বি আংলং স্বায়ত্ত শাসিত পৰিষদৰ কৰ্তৃপক্ষই ইতিবাচক সঁহাৰি দি স্থানীয় নিবনুৱা যুৱক-যুৱতীক কৰ্ম সংস্থাপনৰ বাট মুকলি কৰিব বুলি আশাবাদী বুলি মন্তব্য কৰে প্ৰতিবাদকাৰীয়ে ৷
আৰু পঢ়ক : ভাৰত-জাপান সন্মিলনৰ বাবে ন ৰূপত সজাই তোলা হৈছে মহানগৰী