ডিফু, 6 ডিচেম্বৰ : চিপিআই(এম এল) দলৰ উদ্যোগত ডিফুৰ ছেমছনছিং ইংতি স্মৃতি উদ্যানত ধৰ্ণা কাৰ্যসূচী ৰূপায়ণ কৰে ৷ বাবৰি মছজিদ ধ্বংস হোৱা ২৭ বছৰৰ পিছতো উক্ত ঘটনাৰ সৈতে জড়িত থকা কোনো দোষীয়ে বৰ্তমানলৈ শাস্তি লাভ নকৰাৰ বাবে শুক্ৰবাৰে চিপিআই (এমএল) ৰ কেইবাটাও সহযোগী সংগঠনৰ কৰ্মী সকলে প্ৰতিবাদী কাৰ্যসূচী ৰূপায়ণ কৰে ৷
দলটোৰ নেতা ৰবি কুমাৰ ফাংচ'ই শাসকীয় বিজেপি দলক কঠোৰ ভাষাৰে সমালোচনা কৰে ৷ বাবৰি মছজিদ ধ্বংসৰ ঘটনাই ২৭ বছৰ অতিক্ৰম কৰাৰ পিচতো এই আক্ৰমণৰ লগত জড়িত দোষীক শাস্তি প্ৰদান নকৰাটো লজ্জাজনক বিষয় বুলি মন্তব্য কৰে নেতাগৰাকীয়ে ৷ অসম তথা কাৰ্বি আংলঙত বসবাস কৰি থকা বিভিন্ন ভাষা-ভাষী ধৰ্মাৱলম্বী লোক সকলৰ মাজত বিভেদৰ ভাৱ সৃষ্টি কৰাৰ প্ৰক্ৰিয়া এতিয়াও অব্যাহত আছে বুলি অভিযোগ কৰাৰ লগতে ভাৰতৰ দৰে এখন ধৰ্ম নিৰপেক্ষ দেশত বিজেপিৰ ধৰ্ম বিদ্বেষী তৎপৰতা শীঘ্ৰ বন্ধ কৰাৰো দাবী জনায় নেতা গৰাকীয়ে ৷
ইয়াৰোপৰি চিপিআই (এমএল) ৰ ভগ্নী সংগঠন ৰূপে খ্যাত কাৰ্বি আংলং জিলাৰ মহিলা সংগঠন কেএনচিএৰ শীৰ্ষ নেত্ৰী প্ৰতিমা ইংহিপীয়ে কয়, বাবৰি মছজিদৰ ধ্বংসকাৰী দোষীয়ে শাস্তি নোপোৱাটো অতি দুখজনক কথা ৷ ৰাষ্ট্ৰজুৰি 'কেব' আৰু 'এনআৰচি' বিজেপিয়ে ষড়যন্ত্ৰ ক্ৰমে জাপি দিব বিচাৰিছে যিটো আমি কোনো কৰাণতে সম্ভৱ হ'বলৈ নিদিওঁ বুলি হুংকাৰ দিয়ে কে এন চি এৰ সাধাৰণ সম্পাদিকা প্ৰতিমা ইংহিপীয়ে ৷
আৰু পঢ়ক : মৃত্যুদণ্ড অথবা যাবজ্জীৱন কাৰাদণ্ড
