ৰৌতা, 27 জুলাই : ধোঁৱাচাঙত উঠিছে কেন্দ্ৰীয় চৰকাৰৰ জল জীৱন মিছন (Jal jeevan mission) আঁচনি । একাংশ অসাধু বিষয়া-ঠিকাদাৰৰ বাবে সোণৰ কণী দিয়া হাঁহত পৰিণত হৈছে জনস্বাস্থ্য কাৰিকৰী বিভাগ(public health engineering department)ৰ পানী যোগান আঁচনিসমূহ । সমগ্ৰ দেশৰ প্ৰতিখন ঘৰত 2024 চনৰ ভিতৰত বিশুদ্ধ খোৱা পানী যোগান ধৰাৰ লক্ষ্যৰে প্ৰধানমন্ত্ৰী নৰেন্দ্ৰ মোডীয়ে(PM Narendra Modi) জল জীৱন মিছন নামৰ এক অভিলাষী আঁচনিৰ শুভাৰম্ভ কৰিছিল । কিন্তু উক্ত আঁচনিখন ৰূপায়ণৰ নামত সম্প্ৰতি ব্যাপক দুৰ্নীতি-অনিয়ম সংঘটিত হোৱাৰ অভিযোগ উত্থাপন হৈছে ।
অভিযোগ অনুসৰি ওদালগুৰি জিলাৰ ৰৌতা থানাৰ অন্তৰ্গত পানীখাইতি গাঁৱত জল জীৱন মিছন আঁচনিৰ অধীনত প্ৰায় 43 লাখ টকা ব্যয় সাপেক্ষে পানী যোগান আঁচনিৰ মেৰামতিৰ কাম আৰম্ভ হৈছিল । কিন্তু প্ৰাৰম্ভিক অৱস্থাতে এই কামত ব্যাপক দুৰ্নীতি-অনিয়ম সংঘটিত কৰাৰ তথ্য পোহৰলৈ আহিছে । নিৰ্মাণৰত অৱস্থাতে জহি-খহি গৈছে বৃহৎ পানী যোগান আঁচনিখনৰ টেংকী । প্ৰায় 50 ফুট উচ্চতাত 30 হাজাৰ লিটাৰৰো অধিক পানী সঞ্চয়ৰ বাবে টেংকি বহুওৱাৰ উদ্দেশ্যে নিৰ্মাণৰ কাম চলি থকা অৱস্থাতে বৃহৎ ফাঁট মেলা পৰিলক্ষিত হৈছে ।
লগতে পঢ়ক : মিজো দুৰ্বৃত্তৰ আক্ৰমণ : পুৱাই শিলচৰত উপস্থিত মুুখ্যমন্ত্ৰী হিমন্ত বিশ্ব শৰ্মা
অতি নিম্নমানৰ বালি-চিমেণ্ট ব্যৱহাৰ কৰাৰ বাবেই নিৰ্মীয়মান আঁচনিখন জহি-খহি যোৱাৰ অভিযোগ কৰিছে স্থানীয় ৰাইজে । জনস্বাস্থ্য কাৰিকৰী বিভাগ নামৰ বিয়াগোম বিভাগটোৰ জ্ঞাতসাৰেই এনেদৰে অনিয়মেৰে কাম চলি আছে বুলিও ক্ষোভ উজাৰে সৰ্বসাধাৰণ ৰাইজে ৷ আনহাতে, প্ৰায় 30 হাজাৰ লিটাৰৰো অধিক পানীৰ বহন ক্ষমতা সহিব নোৱাৰি উক্ত স্থানত ভয়ংকৰ দুৰ্ঘটনা ঘটাৰ আশংকা প্ৰকাশ কৰিছে ৰাইজে ।
ইয়াৰ পাছতো কিন্তু কাণসাৰ নাই বিভাগীয় কৰ্তৃপক্ষৰ ৷ এই সন্দৰ্ভত উচিত তদন্তৰে বিহিত ব্যৱস্থা লোৱাৰ দাবী উত্থাপন কৰিছে স্থানীয় ৰাইজে ৷ ইয়াৰোপৰি জিলা উপায়ুক্তৰ প্ৰত্যক্ষ হস্তক্ষেপৰ জৰিয়তে এই আঁচনিৰ কাম জনতাৰ উন্নয়নৰ বাবে সঠিকভাৱে ৰূপায়ণ কৰাৰ দাবী জনাইছে ৰাইজে ৷
লগতে পঢ়ক : অসম-মিজোৰাম সীমান্তত শ্বহীদ আৰক্ষী জোৱানক শেষ শ্ৰদ্ধাঞ্জলি জ্ঞাপন মুখ্যমন্ত্ৰীৰ