লখিমপুৰ/বিহপুৰীয়া, 24 মে’ : স্বস্তিৰ নিশ্বাস এৰিছে লখিমপুৰবাসীয়ে ৷ জিলাৰ নৱনিযুক্ত আৰক্ষী অধীক্ষক আনন্দ মিশ্ৰই নকল সোণ-নকল টকাৰ বেপাৰীৰ বিৰুদ্ধে হুংকাৰ দিয়াৰ 24 ঘন্টা নৌহওঁতেই জিলাখনৰ বঙালমৰাত অপৰাধী চক্ৰই তন্দ্ৰা হেৰুৱাইছে । যাৰ পৰিণতিত মঙলবাৰে আত্মসমৰ্পণ কৰে এটাৰ পাচত এটাকৈ কেইবাটাও নকল সোণ-নকল টকাৰ বেপাৰীয়ে (Accused Abu Shaheed surrendered at Bongalmora police out post) ৷
মঙলবাৰে বিয়লি লখিমপুৰৰ বঙালমৰা আৰক্ষী চকীত আত্মসমৰ্পণ কৰে নকল সোণৰ বেহাৰ লগত জড়িত আবু শ্বহিদ ওৰফে লম্বু শ্বহিদে । আবু শ্বহিদে আত্মসমৰ্পণ কৰাৰ প্ৰায় এঘণ্টাৰ পিচতে মিজানুৰ ওৰফে মিজু, জাকিৰ, চাহাব উদ্দিন, ছাইদুল ইছলাম নামৰ আন চাৰি অভিযুক্তই আত্মসমৰ্পণ কৰে বঙালমৰা আৰক্ষী চকীত ।
উল্লেখ্য যে, নকল সোণ, জাল নোটৰ অভিকেন্দ্ৰলৈ পৰ্যবসিত হৈ পৰা লখিমপুৰৰ বঙালমৰাত দীর্ঘদিন ধৰি চলি আছিল অপৰাধৰ এখন ক’লা সাম্ৰাজ্য ৷ শেহতীয়াকৈ SI জোনমণি ৰাভাৰ মৃত্যুৰ ঘটনাই পোহৰলৈ আনে এই ক’লা সাম্ৰাজ্যৰ কথা । লখিমপুৰত চলি থকা বিভিন্ন অপৰাধ আৰু এই ক’লা সাম্ৰাজ্য উৎখাত কৰিবলৈ ৰাজ্য চৰকাৰে শেহতীয়াকৈ দায়িত্ব অৰ্পণ কৰিছে আৰক্ষী বিষয়া আনন্দ মিশ্ৰক (Lakhimpur SP Anand Mishra)৷
বেদান্ত মাধৱ ৰাজখোৱাৰ সলনি জিলাখনৰ আৰক্ষী অধীক্ষক হিচাপে ভাৰতীয় আৰক্ষী সেৱাৰ বিষয়া আনন্দ মিশ্ৰক নিয়োগ কৰাৰ পিচতে দেওবাৰে বিয়লি প্ৰায় 8 বজাত লখিমপুৰৰ নতুন আৰক্ষী অধীক্ষক ৰূপে উপস্থিত হয় আনন্দ মিশ্ৰ ৷ আৰক্ষী অধীক্ষকৰ কাৰ্যালয়ত উপস্থিত হৈয়েই অপৰাধ জগত আৰু অপৰাধীক সতৰ্কবাণী শুনাই আৰক্ষী বিষয়াগৰাকীয়ে ৷ আনকি উক্ত দিনা নিশাৰে পৰা জিলাখনৰ বিভিন্ন প্ৰান্তত নকল সোণ আৰু নকল টকাৰ বিৰুদ্ধে অভিযান আৰম্ভ কৰিছিল আৰক্ষী অধীক্ষক আনন্দ মিশ্ৰই ।
এই অভিযানৰ সময়ত নকল সোণৰ লগত জড়িত কেইবাটাও অভিযুক্ত আটক কৰে আৰক্ষী অধীক্ষক আনন্দ মিশ্ৰৰ নেতৃত্বত যোৱা দলটোৱে ৷ ইয়াৰ পাচতে মঙলবাৰে সন্ধিয়া বঙালমৰা আৰক্ষী চকীত আত্মসমৰ্পণ কৰে নকল সোণ আৰু জাল নোট ব্যৱসায়ৰ মাষ্টাৰ মাইণ্ড আবু শ্বহিদ ওৰফে লম্বু শ্বহিদে(Accused Abu Shaheed surrendered at Bongalmora) । গাঁওৰক্ষী বাহিনীৰ সহযোগত বিয়লি 5:30 বজাত আত্মসমৰ্পণ কৰে লম্বু শ্বহিদে ৷
উল্লেখ্য যে, আৰক্ষী অধীক্ষক আনন্দ মিশ্ৰই জিলাখনৰ দায়িত্ব গ্ৰহণ কৰাৰ তিনিটা দিনৰ ভিতৰতে বৰ্তমানলৈকে নকল সোণ, জাল নোটৰ বেহাৰ সৈতে জড়িত 22 জন অভিযুক্তক আটক কৰা হৈছে ৷ আনকি জিলাখনক অপকর্ম তথা অপৰাধী চক্ৰৰ কৱলৰ পৰা মুক্ত কৰা হ’ব বুলি আৰক্ষী অধীক্ষকগৰাকীয়ে স্পষ্ট কৰি দিছে ।
লগতে পঢ়ক : New recruitments in Assam: অহা জুলাই মাহত প্ৰকাশ পাব ২২,৭৬৫ টা পদৰ বাবে বিজ্ঞাপন
