ডিফু, 24 ছেপ্তেম্বৰ : অপৰাধ আৰু অপৰাধীৰ বিৰুদ্ধে অসম আৰক্ষীয়ে শূণ্য সহনশীলতা দেখুৱালেও এতিয়াও সম্পূৰ্ণ অপৰাধ মুক্ত হৈ উঠা নাই ৰাজ্য ৷ এতিয়াও ৰাজ্যৰ ভিন্ন প্ৰান্তত গিজগিজাই আছে ড্ৰাগছ মাফিয়াকে ধৰি চোৰাং ব্যৱসায়ী ৷ অসম-নাগালেণ্ডৰ কাৰ্বি আংলং জিলা সীমান্তক ড্ৰাগছ মাফিয়াই কঠোৰ নিৰাপত্তাৰ মাজতো ড্ৰাগছৰ সৰৱৰাহৰ বাবে নিৰাপদ ক’ৰিডৰ হিচাপে ব্যৱহাৰ কৰি আহিছে ৷
ইয়াৰ মাজতে বৃহস্পতিবাৰে খটখটী থানাৰ অন্তৰ্গত খটখটী SBI ব্ৰাঞ্চৰ সন্মুখত চলোৱা নিয়মীয়া চালাচীত প্ৰায় 5 কিলোগ্ৰাম গাঞ্জা জব্দ কৰা হয় ৷ ডিমাপুৰৰ পৰা কাৰ্বি আংলং অভিমুখে আহি থকা AS12AC3477 নম্বৰৰ এখন বাছত চলোৱা তালাচীত এজন যাত্ৰীৰ পৰা গাঞ্জাখিনি উদ্ধাৰ কৰে আৰক্ষীয়ে ৷
ধৃত সৰৱৰাহকাৰীজন গোলাঘাটৰ পোণাকণ শইকীয়া বুলি চিনাক্ত কৰা হৈছে ৷ আৰক্ষীয়ে ধৃত পোনাকনক জেৰা অব্যাহত ৰাখিছে ৷
উল্লেখ্য যে, অসমক নিচামুক্ত কৰাৰ মুখ্যমন্ত্ৰীৰ ঘোষণাৰ পিছতে সমগ্ৰ ৰাজ্যতে নিচাজাতীয় সামগ্ৰীৰ বিৰুদ্ধে সৰৱ হৈ পৰিছিল অসম আৰক্ষী ৷ ইতিমধ্যে কেইবাগৰাকীয়ো ড্ৰাগছ সৰৱৰাহকাৰী আৰক্ষীৰ জালত পৰাৰ লগতে আৰক্ষীৰ এনকাউন্টাৰত আহত হৈছে বহু কেইগৰাকী ৷ কিন্তু ইয়াৰ পিছতো ৰাজ্যত চলি থকা ড্ৰাগছৰ ৰমৰমীয়া ব্যৱসায়ে ইয়াকে সূচায় যে মুখ্যমন্ত্ৰীৰ এই সপোন সাৰ্থক হ’বলৈ এতিয়াও বহুদূৰ বাট ৷
লগতে পঢ়ক : গৰুখুটিৰ ঘটনাৰ পিছত মুখ্যমন্ত্ৰীৰ নিৰ্দেশত গ্ৰেপ্তাৰ কেমেৰামেন বিজয় বনিয়াক
