গুৱাহাটী,১৫ মাৰ্চ : ৰাজ্যজুৰি অব্যাহত আছে বঁটা বিতৰ্ক (Assam state film award 2023 controversy ) । সোমবাৰে কলাক্ষেত্ৰত বিভিন্ন শিতানত প্ৰদান কৰা হৈছিল অষ্টম অসম ৰাজ্যিক চলচ্চিত্ৰ বঁটা । শ্ৰেষ্ঠ নেপথ্য কণ্ঠশিল্পীৰ শিতানত ২০১৮ বৰ্ষৰ বঁটা লাভ কৰিছিল কণ্ঠশিল্পী নাহিদ আফ্ৰিনে (Nahid Afrin Ansari receives the Assam film awards) । এই বঁটা প্ৰদানৰ পিছতে সৃষ্টি হৈছিল বিতৰ্কৰ । কাৰণ নাহিদ আফ্ৰিনক যিটো গীতৰ বাবে বঁটাটো প্ৰদান কৰা হৈছে, সেই গীতটো নাহিদে গোৱা নাছিল, গাইছিল ৰূপজ্যোতি দেৱীয়েহে ।

‘নিজানৰ গান’ ছবিখনৰ ‘নীলাতে লুকা-ভাকু’ গীতটোৰ বাবে নাহিদক এই বঁটা প্ৰদান কৰা হৈছিল । অৱশ্যে এই সন্দৰ্ভত নাহিদ আফ্ৰিনে ইতিমধ্যে স্পষ্টীকৰণ দিছে । কিন্তু বিষয়টোকলৈ ৰাজ্যজুৰি অব্যাহত আছে প্ৰতিক্ৰিয়া ।

অসম বিধানসভাৰ বাজেট অধিৱেশনৰ বুধবাৰে চতুৰ্থ দিনা এই সন্দৰ্ভত সংবাদ মাধ্যমৰ আগত প্ৰতিক্ৰিয়া প্ৰকাশ কৰে সাংস্কৃতিক মন্ত্ৰী বিমল বড়াই । সমগ্ৰ ঘটনাটো স্পষ্ট কৰি তেওঁ কয় যে বঁটাসমূহ প্ৰদান কৰাৰ বাবে চলচ্চিত্ৰ জগতখনৰে জড়িত ব্যক্তিৰে এখন পেনেল গঠন কৰা হয় । আনহাতে বঁটাৰ বাবে চলচ্চিত্ৰৰ বিজ্ঞাপন যোগে মনোনয়ন বিচৰা হয় । সেই অনুসৰি প্ৰযোজক-পৰিচালকে বিভিন্ন শিতানৰ বাবে মনোনয়ন দি প-পত্ৰ পূৰণ কৰি প্ৰেৰণ কৰে ।

বিতৰ্ক হোৱা ছবিখনৰ গানৰ প্ৰসংগত তেওঁ কয় যে ‘নিজান গানৰ’ ছবিখনৰ প্ৰযোজক-পৰিচালকে এখন প্ৰ-পত্ৰত ‘ফিমেল প্লেবেক চিংগাৰ’ হিচাপে নাহিদ আফ্ৰিনৰ নাম মনোনয়ন কৰিছিল । তাৰ ওপৰত ভিত্তি কৰি জুৰী সদস্য সকলে বঁটা প্ৰদান কৰে । তেওঁ স্পষ্ট কৰি কয় যে প্ৰযোজক আৰু পৰিচালকে মনোনয়ন দিয়া নাহিদ আফ্ৰিনকে বঁটাটো প্ৰদান কৰা হৈছে । কিন্তু ভুলতে 'নীলাতে লুকা-ভাকু' গানটো ব্ৰেকেটত উল্লেখ কৰা হ'ল । এইটো এটা মানৱ ভুল ।

'নীলাতে লুকা-ভাকু' এই গানটো দ্বৈত কণ্ঠৰ । এই গীতটো যদিও ভাল গান কিন্তু জুৰীয়ে ইয়াক নিৰ্বাচিত কৰিব নোৱাৰে । কাৰণ ছবিখনৰ প্ৰযোজক-পৰিচালকে নাহিদ আফ্ৰিনৰ নামটো মনোনিত কৰি থৈছে । যাৰ বাবে বঁটাটো নাহিদ আফ্ৰিনকে দিয়া হৈছে । মানুহৰ দ্বাৰা হোৱা এটা ভুলক লৈ ইমান হৈ-চৈ নকৰি ইমানতে সামৰা উচিত বুলি তেওঁ কয় ।

লগতে পঢ়ক : State film award 2023 Nahid Afrin controversy: বিধানসভা চৌহদত অসম ৰাজ্যিক চলচ্চিত্ৰ বঁটা বিতৰ্ক