গুৱাহাটী, ২৯ অক্টোবৰ: ৰাজ্যৰ উদ্যোগখণ্ডক অগ্ৰাধিকাৰ দিয়াৰ বাবে অসম কেবিনেটে সিদ্ধান্ত লৈছে ৷ সেই অনুসৰি কেবিনেটে দ্যা আছাম উডবেচড ইণ্ডাষ্ট্রিজ প্রমোচন এণ্ড ডেভেলপমেন্ট ৰুলচ-২০২২ত শনিবাৰে অনুমোদন জনায় । একেদৰে বসুন্ধৰা-২ ৰ কাম নৱেম্বৰ মাহৰ পৰা আৰম্ভ কৰাৰো সিদ্ধান্ত লয় অসম কেবিনেটে ।
উল্লেখ্য যে, মুখ্যমন্ত্রী হিমন্ত বিশ্বৰ সভাপতিত্বত শনিবাৰে জনতা ভৱনত ৰাজ্য চৰকাৰৰ সাপ্তাহিক কেবিনেট বৈঠকখন অনুষ্ঠিত হয়(Decision of Cabinet meeting) । কেবিনেট বৈঠকত কেইবাটাও গুৰুত্বপূৰ্ণ সিদ্ধান্ত গ্ৰহণ কৰা হয় । বৈঠকৰ অন্তত কেবিনেটৰ সিদ্ধান্তসমূহ সংবাদমেল যোগে সদৰী কৰে মন্ত্রী জয়ন্ত মল্ল বৰুৱাই ।
কেবিনেটে দ্যা আছাম উডবেচড ইণ্ডাষ্ট্রিজ প্রমোচন এণ্ড ডেভেলপমেন্ট ৰুলচ-২০২২ত অনুমোদন জনাই উডবেচড উদ্যোগৰ উন্নয়নৰ বাবে কেতবোৰ নতুন নিয়ম নিৰ্ধাৰণ কৰে ৷ ইয়াৰ দ্বাৰা অগৰু আৰু প্লাইউডৰ উদ্যোগ লাভৱান হ'ব । আনহাতে কেবিনেটে মিছন বসুন্ধৰা-২ৰ ক্ষেত্রত অনুমোদন জনায় । নৱেম্বৰ মাহৰ পৰা আৰম্ভ হ'ব বসুন্ধৰা-২(Mission Basundhara 2) ৰ কাম কাজ ।
আজিৰ কেবিনেটে এটা গুৰুত্বপূৰ্ণ সংশোধনীও কৰে । ৰাজ্যিক অন্যান্য পিছপৰা শ্ৰেণীৰ(OBC) তালিকাৰ চিৰিয়েল নম্বৰ ১৭ত নেপালী সম্প্ৰদায়সমূহৰ উপজাতিসমূহৰ বিৱৰণ কৰা হৈছিল ৷ তাত 'লিম্বু'ৰ সলনি 'লিহু' হৈ আছিল । যাৰ বাবে লিম্বুসকল নিজৰ অধিকাৰৰ পৰা বঞ্চিত হৈ আছিল । আজিৰ কেবিনেটে ইয়াৰ সংশোধন কৰি লিহুৰ স্থানত তেওঁলোকক লিম্বু কৰে ।
আনহাতে তালিকাত অন্তৰ্ভুক্ত নথকা নেপালী সম্প্ৰদায়ৰ 'ভুজেল' সম্প্ৰদায়ক আজিৰ কেবিনেটে অন্যান্য পিছপৰা শ্ৰেণীৰ তালিকাত অন্তৰ্ভুক্ত কৰে । সেইদৰে অন্যান্য পিছপৰা শ্ৰেণীৰ তালিকাৰ চিৰিয়েল নম্বৰ ১৪ত মৰাণ-মটক সম্প্ৰদায় একেলগে আছিল । আজিৰ কেবিনেটে দুটা সম্প্ৰদায়ক পৃথক পৃথক কৰে । মৰাণ সম্প্ৰদায় চিৰিয়েল নম্বৰ ১৪ ত থাকিব আৰু মটক সম্প্ৰদায় চিৰিয়েল নম্বৰ ৩৩ ত থাকিব । এতিয়াৰে পৰা দুটা সম্প্ৰদায়ে পৃথক পৃথক পৰিচয় লাভ কৰিব ।
লগতে পঢ়ক: Distribution of Appointment Letter: ৬৫৫গৰাকী প্ৰাৰ্থীক নিযুক্তি পত্ৰ প্ৰদান মুখ্যমন্ত্ৰীৰ
