গুৱাহাটী, ২০ ছেপ্টেম্বৰ : "সাধাৰণতে বিদ্যুতে বন্তি জ্বলায় । অসম বিজেপিৰ বিদ্যুতে অসমৰ ৰাইজক জ্বলাই আছে ।" এই মন্তব্য অসম জাতীয় পৰিষদৰ সাধাৰণ সম্পাদক জগদীশ ভূঞাৰ । মঙলবাৰে অসম জাতীয় পৰিষদৰ মুখ্য কাৰ্যালয়ত শেহতীয়াকৈ বিদ্যুতৰ মাচুল বৃদ্ধি প্ৰসংগত সংবাদমেল সম্বোধন কৰি জগদীশ ভূঞাই (AJP GS Jagadish Bhuyan press conference) কয় যে বিদ্যুতৰ সমস্যাই ভয়াৱহ ৰূপ ধাৰণ কৰিছে । স্বয়ং অসমৰ মুখ্যমন্ত্ৰীয়ে স্বীকাৰ কৰিছে যে ডিজিটেল মিটাৰ ব্যৱহাৰৰ পিছত মাচুল বাঢ়িছে (AJP press conference on electricity bill hike) ।
কিন্তু এই কথাটো ইমান সহজ আৰু সৰল নহয় বুলি মন্তব্য জগদীশ ভূঞাৰ । আচলতে APDCL-ত বিদ্যুৎ যোগান, মিটাৰ ক্ৰয় আৰু সংযোগ, বিল প্ৰস্তুতকৰণ এনে বিষয়বোৰত দীৰ্ঘদিনৰে পৰা সংঘটিত হৈ থকা অনিয়ম আৰু দুৰ্নীতিৰ পৰিণতি এতিয়া ৰাইজে ভোগ কৰি আছে । মিটাৰ সংযোগ আৰু বিল প্ৰস্তুতকৰণৰ ক্ষেত্ৰত ২০০৭-০৮ চনৰ পৰাই উক্ত অনিয়মসমূহ সংঘটিত হ'বলৈ আৰম্ভ হয় (AJP slammed BJP govt on electricity bill hike) । ২০২০ চনত, কোভিডৰ ভৰপক সময়ত চৰকাৰী সামগ্ৰী ক্ৰয়ৰ ক্ষেত্ৰত চৰকাৰে আৰোপ কৰা শিথিলতাৰ সুযোগ লৈ অতি সন্তর্পণে APDCL-ত কিছুমান অনিয়ম সংঘটিত হয় ।
২০২০ চনৰ অক্টোবৰত APDCL-এ ৩ লাখ ডিজিটেল মিটাৰ ক্ৰয়ৰ বাবে বিজ্ঞাপন প্ৰকাশ কৰে । নিবিদা লাভ কৰে ANVIL Cable নামৰ এটা প্ৰতিষ্ঠানে । ঠিকাৰ মূল্য আছিল ১০৮ কোটি টকা । এই Anvil Cable নামৰ প্ৰতিষ্ঠানটো কোনো মিটাৰ উৎপাদনকাৰী প্ৰতিষ্ঠান নহয় । তেওঁলোকে crystal মিটাৰ নামৰ এটা কোম্পানীৰ পৰা মিটাৰ ক্ৰয় কৰিছে । তেওঁলোক হৈছে মধ্যভোগী ।
তেনে ক্ষেত্ৰত দেশত ইমানকেইটা মিটাৰ উৎপাদনকাৰী প্ৰতিষ্ঠান থকাৰ পিছতো মিটাৰ উৎপাদন কৰাৰ অভিজ্ঞতা নথকা কোম্পানীটোক কিয় দায়িত্ব দিয়া হ'ল বুলি প্ৰশ্ন কৰে অসম জাতীয় পৰিষদৰ সাধাৰণ সম্পাদকগৰাকীয়ে । আনহাতে, Anvil Cable-এ লগোৱা মিটাৰ কিমান ত্ৰুটিমুক্ত সেই পৰীক্ষা কোনে, ক'ত আৰু কিমানটা মিটাৰ পৰীক্ষা কৰি কৰিছিল তাৰ তথ্য ৰাজহুৱা কৰিব লাগে বুলিও মন্তব্য কৰে জগদীশ ভূঞাই । তেওঁ লগতে কয় যে APDCL RAPDRP (Restructured Accelerated Power Development and Reform Program) নামৰ এখন আঁচনি আছে ।
ইয়াৰ অধীনত গুৱাহাটীৰ ছয়মাইলত APDCL-ৰ মাটিত APDCL-ৰ টকাৰে ৩৫০ কোটি টকা ব্যয় কৰি ডাটা চেণ্টাৰ স্থাপন কৰা হৈছিল । উক্ত চেণ্টাৰটোৱে উত্তৰ-পূৰ্বাঞ্চলৰ সাতোখন ৰাজ্যক সেৱা আগবঢ়ায় । ডাটা চেণ্টাৰটোৰ কাম হৈছে ৰাজ্যৰ ৬৫ লাখ বিদ্যুৎ গ্ৰাহকৰ তথ্য জমা ৰখা । উক্ত তথ্যৰ ভিত্তিত সমগ্র বিল ব্যবস্থা পৰিচালিত হয় । ২০১৯-২০ চনত APDCL-এ গ্ৰাহকৰ এই সমগ্র তথ্য নিজা ডাটা চেণ্টাৰত ৰখাৰ পৰিৱৰ্তে SAI Future নামৰ দিল্লীৰ এটা কোম্পানীৰ i cloud ভাড়াত লৈ জমা কৰে । তেওঁলোকক ৩ বছৰৰ বাবে বছৰি ৪ কোটিকৈ টকা দিয়াৰ চুক্তি কৰা হয় ।
৩৫০ কোটি টকা ব্যয় কৰি নিজা ডাটা চেণ্টাৰ স্থাপনৰ পিছতো বাহিৰা কোম্পানীৰ ডাটা চেণ্টাৰ কিয় ব্যৱহাৰ কৰিবলগীয়া হ'ল বুলিও প্ৰশ্ন উত্থাপন কৰে অজাপৰ সাধাৰণ সম্পাদকগৰাকীয়ে । ইয়াৰ বিপৰৰীতে উত্তৰ-পূবৰ বাকী ৬ খন ৰাজ্যই APDCL-ৰ ডাটা চেণ্টাৰটোকে ব্যৱহাৰ কৰি থকা বুলি তেওঁ জানিবলৈ দিয়ে । উল্লেখযোগ্য যে APDCL-ৰ ডাটা চেণ্টাৰটো পৰিচালনাৰ বাবে ১৫০ গৰাকী IT Engineer-ক নিযুক্তি দিয়া হৈছিল । কিন্তু সেইসকলক ডাটা চেণ্টাৰৰ সলনি অন্য কামত ব্যৱহাৰ কৰি থকা হৈছে বুলি তেওঁ অভিযোগ কৰে ।
ইয়াৰ আঁৰৰ ৰহস্য কি বুলি উল্লেখ কৰি তেওঁ মন্তব্য কৰি তাত আন এটা বিত্তীয় অনিয়ম চকুত পৰা বুলি আঙুলিয়াই দিয়ে জগদীশ ভূঞাই । আনহাতে, APDCL-ৰ যিটো ব্যৱস্থাৰ অধীনত বিদ্যুতৰ বিল প্ৰস্তুত কৰা হয় তাক ARMS (APDCL Revenue Management System)ৰ অধীনত পৰিচালনা কৰা হয় । এই ARMS ব্যৱস্থাটো চলাবৰ কাৰণে এটা software ব্যৱহাৰ কৰা হয়, যাৰ নাম e-suvidha । এই Software-টো artificial intelligence based software । এই Software-টো APDCL-ক যোগান দিছে সিংঘাল উদ্যোগ নামৰ এটা কলকাতাৰ প্ৰতিষ্ঠানে ।
জগদীশ ভূঞাই প্ৰকাশ কৰা মতে, সিংঘাল উদ্যোগক APDCL-এ এই ঠিকা প্ৰদান কৰে ২০২০ চনৰ কোভিডৰ সময়ত । কিন্তু e-suvidha software-টো APDCL-এ ক্ৰয় কৰিছে নে ভাড়ালৈ লৈছে সেইটো স্পষ্ট নহয় বুলি দাবী কৰে জগদীশ ভূঞাই । তাৎপর্যপূর্ণভাৱে সিংঘাল উদ্যোগৰ লগত হোৱা চুক্তিত এইটো স্পষ্টকৈ উল্লেখ আছে যে e-subidha software-ৰ intellectual property right সিংঘাল উদ্যোগৰ হাততে থাকিব ।
অর্থাৎ অসমৰ ৬৫ লাখ বিদ্যুৎ গ্ৰাহকৰ যাৱতীয় তথ্য এটা বাহিৰা ব্যক্তিগত কোম্পানীৰ হাতত জমা থাকিব, যাৰ নিৰাপত্তা সন্দেহৰ আৱৰ্তত বুলি তেওঁ দাবী কৰে । সেয়েহে অসম জাতীয় পৰিষদে মিটাৰ ক্ৰয়, i cloud ভাড়ালৈ লোৱা, নিজা ডাটা চেণ্টাৰ ব্যৱহাৰ নকৰা আৰু e-subidha software-ৰ নিৰ্ভৰযোগ্যতা তথা সিংঘাল উদ্যোগৰ সৈতে হোৱা চুক্তিত সংঘটিত সম্ভাৱ্য অনিয়মৰ CBI তদন্তৰ দাবী জনায় ।
লগতে পঢ়ক :বিজেপি চৰকাৰে কৰ বৃদ্ধিৰে অসমৰ ৰাইজৰ ভৱিষ্যত অন্ধকাৰাচ্ছন্ন কৰি তুলিছে : লুৰীণজ্যোতি
