যোৰহাট, 25 জানুৱাৰী: সমাগত গণৰাজ্য দিৱস (74th Republic Day) ৷ মাজত মাত্ৰ কেইটামান ঘন্টা ৷ গণৰাজ্য দিৱসক লৈ দেশ তথা ৰাজ্যজুৰী চলিছে ব্যাপক প্ৰস্তুতি ৷ ৰাজ্যৰ অন্যান্য প্ৰান্তৰ লগতে যোৰহাটো চলিছে দিৱসটি উদযাপনৰ ব্যাপক প্ৰস্তুতি ৷ যোৰহাট কছাৰী ময়দানত গণৰাজ্য দিৱস উদযাপন বাবে সম্পূৰ্ণৰূপে সাজু হৈছে জিলা প্ৰশাসন ৷
ইফালে আৰক্ষীকে ধৰি সেনা, অৰ্ধসামৰিক বাহিনীৰ জোৱানসকলে শেষবাৰৰ বাবে কৰিছে পেৰেডৰ আখৰা (Republic Day celebrations in Jorhat) । সমান্তৰালকৈ গণৰাজ্য দিৱসৰ কাৰ্যসূচীৰ বাবে সজাই পৰাই তোলা হৈছে যোৰহাটৰ কছাৰী ময়দান (Jorhat Kachari maidan) । মঙলবাৰে অন্তিম প্ৰস্তুতিমূলক পেৰেডত কেন্দ্ৰীয় ঔদ্যোগিক সুৰক্ষা বাহিনী, চি আৰ পি এফ, আৰক্ষী, হোম গাৰ্ড আদি বাহিনীৰ জোৱানসকলৰ লগতে স্কাউট-গাইড, এন চি চি আৰু শিক্ষাৰ্থীসকলে অংশগ্ৰহণ কৰে (Independence day Parade) ।
মঙলবাৰে গণৰাজ্য দিৱসৰ শেষ প্ৰস্তুতিমূলক পেৰেডৰ কাৰ্যসূচীৰ তদাৰক কৰে যোৰহাটৰ আৰক্ষী অধীক্ষক মোহন লাল মিনা, উপায়ুক্ত অশোক কুমাৰ বৰ্মনে । এইবাৰ যোৰহাট কছাৰী ময়দানৰ গণৰাজ্য দিৱসৰ মূল পতাকা উত্তোলন কৰিব ৰাজ্যৰ বন মন্ত্ৰী চন্দ্ৰমোহন পাটোৱাৰীয়ে । আনহাতে গণৰাজ্য দিৱসত যাতে দুস্কৃতিকাৰীয়ে কোনো অ প্ৰীতিকৰ পৰিস্থিতিৰ সৃষ্টি কৰিব নোৱাৰে তাৰ প্ৰতি লক্ষ্য ৰাখি সীমামূৰীয়া অঞ্চলৰ লগতে যোৰহাটৰ বিভিন্ন প্ৰান্তত নাকা তালাচী গঢ়ি তোলা হৈছে বুলি জানিবলৈ দিয়ে আৰক্ষী অধীক্ষকগৰাকীয়ে ।
উল্লেখযোগ্য যে এইবাৰৰ ৭৪ সংখ্যক গণৰাজ্য দিৱসৰ কাৰ্যসূচী বৰ্জনৰ বাবে আলফা (স্বাধীন)কে ধৰি উত্তৰ পূৱৰ কেইবাটাও বিদ্ৰোহী সংগঠনে জনাইছে আহ্বান । এনে পৰিপেক্ষিতত বিদ্ৰোহী সংগঠনকে ধৰি যিকোনো কূটাঘাটকাৰীয়ে যাতে কোনো অপ্ৰীতিকৰ পৰিস্থিতিৰ সৃষ্টি কৰিব নোৱাৰে তাৰ বাবে সমগ্ৰ অসমৰ লগতে উজনি অসমতো নিৰাপত্তা ব্যৱস্থা অধিক কটকটীয়া কৰি তোলা হৈছে । আনহাতে নিৰাপত্তাৰ দিশটো পৰ্যালোচনা কৰিবলৈ আইন শৃংখলাৰ বিশেষ আৰক্ষী সঞ্চালক প্ৰধান জি.পি সিঙে ডিব্ৰুগড়ত বাহৰ পাতি নিজেই কৰি গৈছে তদাৰক ।
শান্তিপূৰ্ণভাবে ৰাইজে স্বতস্ফুতভাৱে গণৰাজ্য দিৱসৰ সকলো কাৰ্যসূচীতে অংশগ্ৰহণ কৰাৰ স্বাৰ্থত স্পৰ্শকাতৰ স্থানসমূহত নিৰাপত্তা ব্যৱস্থাৰ দিশত কোনো ক্ৰটি ৰাখিব বিচৰা নাই গৃহ বিভাগে । মুঠৰ ওপৰত উলহ-মালহেৰে গণৰাজ্য দিৱস উদযাপনৰ বাবে সাজু হৈছে যোৰহাট জিলা প্ৰশাসন আৰু সাজু যোৰহাট কছাৰী ময়দান ৷
লগতে পঢ়ক: Republic day 2023: খানাপাৰাত গণৰাজ্য দিৱসৰ প্ৰস্তুতি পৰ্যবেক্ষণ DGP ভাস্কৰজ্যোতি মহন্তৰ
