যোৰহাট, 4 আগষ্ট : বৃহস্পতিবাৰে জলসম্পদ বিভাগৰ মন্ত্ৰী পীযুষ হাজৰিকা উপস্থিত হয় যোৰহাট জিলাৰ মৰিয়নী সমষ্টিৰ অন্তৰ্গত আমগুৰিৰ হাতীমুৰীয়াত (Pijush Hazarika in Jorhat) ৷ আমগুৰিৰ হাতীমুৰীয়াত উপস্থিত হৈ মন্ত্ৰীগৰাকীয়ে জাঁজী নদীয়ে সৃষ্টি কৰা বান-খহনীয়াৰ পৰিস্থিতি বুজ লয় (Pijush Hazarika visited Flood effected area of Jorhat) ৷ লগতে কাষৰীয়া অঞ্চলটোক খহনীয়াৰ পৰা ৰক্ষা কৰিবলৈ স্থায়ী প্ৰতিৰোধৰ কামৰ বাবে প্ৰয়োজনীয় ব্যৱস্থা ল’বলৈ বিভাগীয় অভিযন্তাক নিৰ্দেশ প্ৰদান কৰে ।
ইতিমধ্যে বিভাগৰ অস্থায়ী প্ৰতিৰোধ ব্যৱস্থাৰে অঞ্চলটোত খহনীয়া ৰোধ কৰি ৰখা হৈছে । মন্ত্ৰীগৰাকীয়ে স্থানীয় ৰাইজৰ সৈতেও আলাপ কৰি স্থায়ী প্ৰতিৰোধৰ কাম কৰা হ’ব বুলি কথা দিয়ে ৷ অঞ্চলটোক খহনীয়াৰ পৰা বচাবলৈ বিভাগীয়ভাৱে সম্পূৰ্ণ প্ৰয়াস কৰা হ’ব বুলি উল্লেখ কৰে মন্ত্ৰীগৰাকীয়ে ৷
ইয়াৰ পাচত মন্ত্ৰীগৰাকীয়ে যোৰহাটৰ নিমাতীঘাটত উপস্থিত হৈ ব্ৰহ্মপুত্ৰৰ খহনীয়া ৰোধৰ বাবে বিভাগে বিগত সময়ত পাৰ্কুপাইন আৰু জিঅ' বেগৰ সহায়ত কৰা কাম পৰিদৰ্শন কৰে ৷ উল্লেখযোগ্য যে, বিগত সময়ত ব্যাপকভাৱে খহনীয়াত ক্ষতি হোৱা নিমাতীঘাটত মন্ত্ৰী হাজৰিকাই জিঅ’ বেগ আৰু পাৰ্কুপাইনৰ সহায়ত প্ৰতিৰোধৰ কাম কৰিবলৈ নিৰ্দেশ দিছিল ।
মন্ত্ৰীগৰাকীৰ নিৰ্দেশত বিভাগে প্ৰায় 4.5 কোটি টকা ব্যয়েৰে পাৰ্কুপাইন আৰু জিঅ’ বেগৰ সহায়ত খহনীয়া ৰোধৰ কাম কৰি সফলতা লাভ কৰিছিল । মন্ত্ৰীগৰাকীয়ে আজি লক্ষ্য কৰে যে বিগত সময়ত অঞ্চলটোত খহনীয়া ৰোধ হোৱাৰ লগতে প্ৰায় 50 মিটাৰ অংশত প্ৰায় 10 ফুট উচ্চতাৰ বালিৰ তৰপ বহি নদীখন মথাউৰিৰ পৰা কিছু আঁতৰি গৈছে ।
পাৰ্কুপাইনৰ কামৰ এনে সফলতা দেখি মন্ত্ৰীগৰাকীয়ে পৰৱৰ্তী সময়ত গোটেই ৰাজ্যখনতে ব্ৰহ্মপুত্ৰৰ খহনীয়া ৰোধৰ বাবে ব্যাপকভাৱে পাৰ্কুপাইন ব্যৱহাৰৰ ওপৰত গুৰুত্ব দিব বুলি পৰিদৰ্শনৰ সময়ত প্ৰকাশ কৰে । উল্লেখ্য যে দুয়োটা স্থানতে মন্ত্ৰীগৰাকীক আজিৰ পৰিদৰ্শনৰ সময়ত মৰিয়নী সমষ্টিৰ বিধায়ক ৰূপজ্যোতি কুৰ্মী আৰু জলসম্পদ বিভাগৰ অভিযন্তাসকলে সংগ দিয়ে ৷
লগতে পঢ়ক : Flood in Assam 2022: দৰঙৰ বান বিধ্বস্ত অঞ্চল পৰিদৰ্শন মুখ্যমন্ত্ৰী ড৹ শৰ্মাৰ
