গোলাঘাট, 14 অক্টোবৰ : ৰাজ্যৰ এখন চিকিৎসালয়ৰ এগৰাকী কৰ্মচাৰীয়ে এগৰাকী নাৰ্ছক যৌন নিৰ্যাতন চলোৱা বুলি উত্থাপিত হৈছে অভিযোগ । গোলাঘাটৰ শ্বহীদ কুশল কোঁৱৰ অসামৰিক চিকিৎসালয়ত সংঘটিত হৈছে এই চাঞ্চল্যকৰ ঘটনা । চিকিৎসালয়খনৰ এগৰাকী চতুৰ্থ বৰ্গৰ কৰ্মচাৰীৰ বিৰুদ্ধে যৌন নিৰ্যাতনৰ এই অভিযোগ উত্থাপন কৰিছে এগৰাকী নাৰ্ছে ।
জানিব পৰা মতে, বুধবাৰে নিশা কৰ্তব্যৰত অৱস্থাতেই নাৰ্ছগৰাকীক কৰ্মস্থলীতে যৌন নিৰ্যাতন চলোৱাৰ অভিযোগ উত্থাপিত হৈছে চতুৰ্থ বৰ্গৰ কৰ্মচাৰী সুৰেশ বড়িৰ বিৰুদ্ধে । উল্লেখযোগ্য যে, নিশা চিকিৎসালয়খনৰ আপাতকালীন কক্ষত নিয়োজিত আছিল নাৰ্ছ গৰাকী সহ অভিযুক্ত সুৰেশ বড়ি । ভুক্তভোগী নাৰ্ছগৰাকীয়ে ঘটনাৰ বিষয়ে গোলাঘাটৰ শ্বহীদ কুশল কোঁৱৰ অসামৰিক চিকিৎসালয়ৰ অধীক্ষকক দাখিল কৰিছে এক লিখিত অভিযোগ ।
এই অভিযোগৰ ভিত্তিতেই গোলাঘাট আৰক্ষীয়ে আটক কৰে অভিযুক্ত চতুৰ্থ বৰ্গৰ কৰ্মচাৰী জনক । সম্প্ৰতি গোলাঘাট আৰক্ষী থানাৰ আলহী হৈছে অভিযুক্ত সুৰেশ বড়ি ৷
লগতে পঢ়ক : গৃহ সমষ্টিৰ পূজা মণ্ডপে-মণ্ডপে মুখ্যমন্ত্ৰী
