মৰাণ, 21 ছেপ্তেম্বৰ : আন্তঃৰাজ্যিক পাৰ-পত্ৰ প্ৰৱৰ্তনৰ দাবীত অসম জাতীয়তাবাদী যুৱ পৰিষদৰ দুই সদস্যই ৰাজ্যজুৰি আৰম্ভ কৰিছে চাইকেল ৰেলী । অসম জাতীয়তাবাদী যুৱ ছাত্ৰ পৰিষদৰ দুই যুৱকে সমগ্ৰ ৰাজ্যত ২০০০ কিঃমিটাৰ চাইকেল ৰেলী কৰি আন্তঃৰাজ্যিক পাৰ-পত্ৰ প্ৰৰ্ৱতনৰ দাবী জনাই ৰাইজৰ মাজত জনচেতনা সৃষ্টি কৰিছে ।
উল্লেখযোগ্য যে, নলবাৰী জিলাৰ পৰা উলিওৱা এই বৃহৎ চাইকেল ৰেলী ধেমাজি জিলা হৈ বগীবিল দলঙেৰে ডিব্ৰুগড় আহি পোৱাৰ লগে লগে ডিব্ৰুগড় জিলা সমিতি আৰু আঞ্চলিক সমিতিয়ে আদৰণি জনায় । ডিব্ৰুগড় বগীবিল দলঙৰ পৰা যুৱ-ছাত্ৰ পৰিষদৰ কৰ্মী দুজনক ফুলাম গামোচাৰে আদৰণি জনায় ৷
অসম জাতীয় পৰিষদৰ ডিব্ৰুগড় জিলা সমিতিৰ সভাপতি ভবেন সোণোৱাল, উপ-সভাপতি উদয়ন বৰুৱা আৰু সাধাৰণ সম্পাদক প্ৰিয়ব্ৰত গোহাঁয়ে আদৰণি জনাই কয় যে, অসম জাতীয়তাবাদী যুৱ-ছাত্ৰ পৰিষদে সুদীৰ্ঘ ৪০ বছৰ ধৰি অসমত আন্তঃৰাজ্যিক পাৰ-পত্ৰ প্ৰদানৰ বাবে দাবী জনাই আহিছে ।
এই দাবীক ন্যায্যপ্ৰাপ্তিৰ দাবী হিচাপে বৰ্তমান জনসাধাৰণৰ মাজত প্ৰচাৰ কৰাৰ উদ্দেশ্য সুদূৰ নলবাৰী জিলা সমিতিৰ পৰা দুজন পৰিষদৰ সদস্যই ২০০০ কিলোমিটাৰ চাইকেল চলাই ডিব্ৰুগড়ত উপস্থিত হয় ।
আনহাতে যুৱ-ছাত্ৰ পৰিষদৰ এই অবিৰত সংগ্ৰামৰ যাত্ৰাত অসমৰ জাতীয় স্বাৰ্থত সকলো জনসাধাৰণক অংশীদাৰ হ'বলৈ আহ্বান জনাইছে পৰিষদৰ ডিব্ৰুগড় জিলা সমিতিৰ সভাপতি ভৱেন সোণোৱাল আৰু সাধাৰণ সম্পাদক প্ৰিয়ব্ৰত গোহাঁয়ে ।
লগতে পঢ়ক : নদী সংযোগেৰে উত্তৰ-পূৱৰ সৈতে ব্যৱসায়িক সম্পৰ্ক স্থাপন হ’ব বাংলাদেশৰ !
