ধুবুৰী, 16 অক্টোবৰ : ধুবুৰীৰ অয়ৰাণ জংলা অঞ্চলৰ সমীপৰ ব্ৰহ্মপুত্ৰৰ বুকুত এগৰাকী কিশোৰীক উদ্ধাৰ কৰিব গৈ এগৰাকী মহিলা সলিল সমাধি ৷ প্ৰাপ্ত তথ্য অনুসৰি, অয়ৰাণ জংলা প্ৰথম খণ্ড গাঁৱৰ আফছানা খাতুন নামৰ এগৰাকী চৈধ্য বছৰীয়া কিশোৰী গা ধুবলৈ গৈ ব্ৰহ্মপুত্ৰৰ সোঁতত উটি যায় ।
এই ঘটনা প্ৰত্যক্ষ কৰি ৰূপচান্দ আলীৰ পত্নী তথা কিশোৰী গৰাকীৰ খুৰীয়েক আমিনা খাতুনে উদ্ধাৰ কৰিবলৈ যায় । কিন্তু কিশোৰী গৰাকীক উদ্ধাৰ কৰিবলৈ গৈ আমিনা খাতুন নিজেও সন্ধানহীন হৈ পৰে ব্ৰহ্মপুত্ৰৰ বুকুত । ইপিনে এই ঘটনা কিছু দূৰৰ পৰা প্ৰত্যক্ষ কৰি নুৰ আলম নামৰ এজন যুৱকে কিশোৰী আৰু মহিলা গৰাকীক উদ্ধাৰ কৰিবলৈ চেষ্টা চলাই ।
যুৱকজনে কিশোৰী গৰাকীক উদ্ধাৰ কৰিবলৈ সক্ষম হয় যদিও মহিলা গৰাকীক উদ্ধাৰ কৰিবলৈ সক্ষম নহয় ৷ তাৰ পিছৰ পৰাই সন্ধানহীন হৈ পৰে মহিলা গৰাকী । খবৰ পাই স্থানীয় ৰাইজে নাও, জাল আদি বিভিন্ন প্ৰচেষ্টাৰে উদ্ধাৰ অভিযান চলায়ো উদ্ধাৰ কৰিবলৈ সক্ষম নহয় ৷ পাচত ঘটনা সংক্ৰান্তত স্থানীয় ৰাইজে আৰক্ষী আৰু এছ ডি আৰ এফ বাহিনীক খবৰ দিয়ে ৷
খবৰ লাভ কৰিয়ে এছ ডি আৰ এফৰ এটা দল ঘটনাস্থলীত উপস্থিত হৈ উদ্ধাৰ অভিযান আৰম্ভ কৰে ৷ স্থানীয় লোকৰ সহযোগত এছ ডি আৰ এফৰ দলটোৱে অভিযান চলাই সন্ধিয়া ভাগত উদ্ধাৰ কৰে মহিলা গৰাকীৰ মৃতদেহ ৷
লগতে পঢ়ক: ৰাজনৈতিক দলৰ পিছে পিছে ঘূৰে সদৌ অসম ছাত্ৰ সন্থা : বিমল বৰা
