লখিমপুৰ, ধেমাজি, 3 চেপ্টেম্বৰ : বৃহৎ নদী বান্ধৰ বিৰুদ্ধে মাৰ বান্ধি ওলাই আহিছে ৰাজ্যৰ জাতীয় দল-সংগঠন সমূহ ৷ একেদৰেই এই ধাৰা অব্যাহত ৰাখিছে অসম জাতীয়তাবাদী যুৱ ছাত্ৰ পৰিষদেও । নামনি-সোৱশিৰি জল বিদ্যুৎ প্ৰকল্প বন্ধ কৰাৰ দাবীত শুকুৰবাৰে গোগামুখৰ মাজমজিয়াত 'গণ অৱস্থান' কাযসূচী ৰূপায়ন কৰে অসম জাতীয়তাবাদী যুৱ ছাত্ৰ পৰিষদে ৷
জানিব পৰা মতে, ৰাইজৰ তীব্ৰ বিৰোধ স্বত্তেও চৰকাৰ তথা কৰ্তৃপক্ষই নিৰ্মাণ কৰিব বিচৰা নামনি-সোৱণশিৰি জলবিদ্যুৎ প্ৰকল্পৰ পাঁচটাকৈ ডাইভাৰটিং টাৰ্ণেল বৰষুণৰ পানীয়ে ইতিমধ্যে তচনচ কৰিছে । ইয়াৰ ফলত থুনুকা পাহাৰ খহি বিপদ মানি আনিছে প্ৰকল্পটোলৈ । এই কথাক লৈ এতিয়া শংকিত হৈ পৰিছে ৰাইজ তথা বিভিন্ন দল সংগঠন ৷ ইয়াকে লৈ শুকুৰবাৰে বিভিন্ন দল সংগঠনে সাব্যস্ত কৰিলে গণতান্ত্ৰিক প্ৰতিবাদ ৷
ইফালে শুকুৰবাৰে লখিমপুৰত উপায়ুক্তৰ কাৰ্যালয়ৰ সন্মুখত অৱস্থান ধৰ্মঘট কাৰ্যসূচীৰে ৰাইজলৈ নদী বান্ধৰ বিৰুদ্ধে শেষ যুদ্ধ দিবলৈ ৰাইজক আহ্বান জনাইছে জাতীয়তাবাদী যুৱ ছাত্ৰ পৰিষদৰ নেতৃত্বই ।
এই প্ৰতিবাদ যোগে এন এইচ পি চিৰ বিৰুদ্ধে তীব্ৰ ক্ষোভ প্ৰকাশ কৰাৰ উপৰি পূৰ্বতে নদী বান্ধৰ আন্দোলন কৰা এচাম লোকে ৰাজনীতিলৈ গৈ গাদীত বহাৰ পিছত ৰাইজক বঞ্চনা কৰাৰ অভিযোগ তোলে সংগঠনটোৱে ৷ ইয়াৰোপৰি নদী-বান্ধ আন্দোলনত সংগঠনটোৰ নেতৃত্বই প্ৰথম শাৰীত থাকি শ্বহীদ বৰণ কৰিব বুলিও ঘোষণা কৰে প্ৰতিবাদকাৰী সকলে ৷ এতিয়া ৰাজ্যজুৰি ক্ৰমাৎ ব্যাপক ৰূপ ধাৰণ কৰা আন্দোলনটোৱে পৰিৱৰ্তী পৰ্যায়ত কি ৰূপ লয় সেয়া হ’ব লক্ষণীয় ৷
লগতে পঢ়ক : পুনৰ বৃহৎ নদী-বান্ধ নিৰ্মাণৰ বিৰুদ্ধে ব্যাপক প্ৰতিবাদত নামিল আছু
