চিৰাং, 14 ছেপ্তেম্বৰ : চিৰাঙৰ বাসুগাঁও পৌৰসভা কাৰ্যালয়ৰ সন্মুখত দল-সংগঠন আৰু ৰাইজৰ উত্তাল প্ৰতিবাদী কাৰ্যসূচী । বাসুগাঁও পৌৰসভা গঠনৰ(Basugaon Municipal Board) লগতে পৌৰসভা পৰিচালনা সমিতিৰ সভাপতি পদক কেন্দ্ৰ কৰি সাব্যস্ত কৰা হয় এই প্ৰতিবাদ ৷
বাসুগাঁও পৌৰ এলেকাৰ অন্তৰ্গত লোকক বঞ্চিত কৰি নীতি-বহিৰ্ভূতভাৱে পৌৰ এলেকাটোৰ বাহিৰৰ ব্যক্তি তথা ইউপিপিএল(UPPL) দলৰ কেন্দ্ৰীয় সাধাৰণ সম্পাদক মাউথি ব্ৰহ্ম হাজোৱাৰীক বাসুগাঁও পৌৰসভা পৰিচালনা সমিতিৰ সভাপতি পদত নিযুক্তি দিয়া হয় ৷ এই সিদ্ধান্তৰ বিৰুদ্ধে ক্ষুব্ধ হৈ প্ৰতিবাদৰ লগতে সৰ্বাত্মক বন্ধৰ ঘোষণা কৰে প্ৰতিবাদকাৰীসকলে ৷
বাসুগাঁও পৌৰ এলেকাৰ বাহিৰৰ মানুহক বাসুগাঁও পৌৰসভাৰ সভাপতি হিচাপে কেতিয়াও মানি নলয় পৌৰসভাৰ অন্তৰ্গত ৰাইজে ৷ বাসুগাঁও পৌৰসভাৰ সভাপতি যিকোনো জনগোষ্ঠী বা ৰাজনৈতিক দলৰে নেতা নহওক কিয়, তাত কোনো আপত্তি নাই ৰাইজৰ ৷ কিন্তু তেওঁ বাসুগাঁৱৰ স্থানীয় বাসিন্দাই হ’ব লাগিব । বাসুগাঁও পৌৰসভাৰ বাহিৰৰ মানুহক সভাপতি হিচাপে গ্ৰহণ নকৰে ৰাইজে ৷
উল্লেখ্য যে, চিৰাং জিলাৰ তিনিটা পৌৰসভাৰ দুটাই ইউপিপিএল দলে দখল কৰিছে ৷ গতিকে মিত্ৰতাত থাকি বাসুগাঁও পৌৰসভাখন বিজেপি দলক এৰিব লাগিছিল যদিও সেয়া নকৰাত খোদ বিজেপি কৰ্মীসকলো প্ৰতিবাদমুখৰ হোৱা পৰিলক্ষিত হয় ৷ বিটিআৰৰ(BTR) মুখ্য কাৰ্যবাহী সদস্য প্ৰমোদ বড়োৰ নেতৃত্বত বিটিআৰত চৰকাৰ গঠন কৰাৰ 9 মাহ অতিক্ৰম কৰাৰ পাচতো আজিলৈকে বাসুগাঁও পৌৰসভা পৰিচালনা সমিতি গঠন নকৰাৰ বাবে ৰাইজে তীব্ৰ ক্ষোভ প্ৰকাশ কৰে ।
লগতে পঢ়ক: লখিমপুৰত ৰে’লৱে এমপ্ল’য়িজ ইউনিয়নৰ প্ৰতিবাদ
