বিশ্বনাথত আনন্দৰাম বৰুৱা বঁটা প্ৰদান

বিশ্বনাথ,২৮ফেব্ৰুৱাৰী: বৃহস্পতিবাৰে বিশ্বনাথত অসম চৰকাৰৰ মাধ্যমিক শিক্ষা বিভাগ আৰু বিশ্বনাথ জিলা প্ৰশাসনৰ উদ্যোগত ২০১৮ বৰ্ষৰ আনন্দৰাম বৰুৱা বঁটা প্ৰদান কৰা হয় ।

বিশ্বনাথ মহাবিদ্যালয়ৰ প্ৰেক্ষাগৃহত আয়োজিত এই অনুষ্ঠানত মুখ্য অতিথিৰূপে অংশগ্ৰহণ কৰে অসম চৰকাৰৰ হস্ততাঁত, বস্ত্ৰ, ৰেচম আৰু সংখ্যালঘু উন্নয়ন বিভাগৰ মন্ত্ৰী ৰঞ্জিত দত্তই। এই অনুষ্ঠানত ভাষণ প্ৰসংগত তেওঁ কয় যে শিক্ষাৰ বাবে প্ৰয়োজনীয় সকলোধৰণৰ সা-সুবিধা আৰু আন্তঃগাঁথনি প্ৰদানেৰে ৰাজ্য চৰকাৰখনে উপযুক্ত মানৱ সম্পদ গঢ়াৰ ওপৰত নিৰন্তৰ গুৰুত্ব প্ৰদান কৰি আহিছে। লগতে চৰকাৰৰ বিভিন্ন অভিলাষী আঁচনিৰ বিষয়ে আলোকপাত কৰি মন্ত্ৰীগৰাকীয়ে বৰ্তমানৰ চৰকাৰখনে লোকসেৱা আয়োগৰ সংস্কাৰৰ বাবে গ্ৰহণ কৰা ব্যৱস্থাৱলীৰ ফলস্বৰূপেই ছাত্ৰ-ছাত্ৰীৰ হেৰোৱা আস্থা পুনৰ ঘূৰি আহিছে বুলিও মন্তব্য কৰে ।

সভাত স্থানীয় বিধায়ক প্ৰমোদ বৰঠাকুৰে ভাষণ দি পণ্ডিত আনন্দৰাম বৰুৱাৰ জীৱন আৰু কৰ্মৰাজিৰ বিষয়ে ব্যাখ্যা কৰে। তেওঁ আনন্দৰাম বৰুৱা বঁটা লাভ কৰা শিক্ষাৰ্থীসকলক অভিনন্দন জনাই এই মহান অসম সন্তানগৰাকীৰ আদৰ্শেৰে অনুপ্ৰাণিত হৈ জীৱনত আগবাঢ়ি যাবলৈ ছাত্ৰ-ছাত্ৰীসকলক আহ্বান জনায়।

উল্লেখ্য যে হাইস্কুল শিক্ষান্ত পৰীক্ষা, হাইমাদ্ৰাছা, সংস্কৃত পৰীক্ষাত ৭৫ শতাংশ বা ততোধিক নম্বৰ লাভ কৰা বিশ্বনাথ জিলাৰ মুঠ ৪২২ গৰাকী কীৰ্তিমানে ২০১৮ বৰ্ষৰ আনন্দৰাম বৰুৱা বঁটা লাভ কৰিবলৈ সক্ষম হৈছে।