স্পৰ্টছ ডেস্ক, ২০ নৱেম্বৰ : এদিনীয়া ক্ৰিকেট বিশ্বকাপ ২০২৩ ৰ ফাইনেলত দেওবাৰে ভাৰতীয় দলটো অষ্ট্ৰেলিয়াৰ হাতত ৬ উইকেটত পৰাজিত হয় । এই বিজয়ৰ পাচত অষ্ট্ৰেলিয়াৰ বেটছমেন মিচেল মাৰ্শৰ এখন ফটোৱে সামাজিক মাধ্যমত ব্যাপক প্ৰতিক্ৰিয়াৰ সৃষ্টি কৰিছে । ফটোখনক লৈ সামাজিক মাধ্যমত ব্যাপক ট্ৰ'ল হৈছে আৰু অনুৰাগীসকলকো ক্ষোভিত কৰি তুলিছে । কিন্তু কি আছে এই ফটোখনত ।

আচলতে বিশ্বকাপৰ ট্ৰফী প্ৰতিগৰাকী খেলুৱৈৰ উপৰিও অনুৰাগীৰ বাবে মহান সম্পদ স্বৰূপ । ট্ৰফী জয়ী হোৱাৰ পাচত সচৰাচৰ খেলুৱৈসকলক ট্ৰফীটোক চুম্বন কৰা দেখা যায় । এই ট্ৰফীটোতে এটা দলৰ পাৰদৰ্শিতা, এগৰাকী খেলুৱৈৰ কষ্ট আৰু অনুৰাগীসকলৰ আস্থা জড়িত হৈ থাকে । কিন্তু অষ্ট্ৰেলিয়াৰ খেলুৱৈগৰাকীয়ে ট্ৰফীটোক অপমান কৰাৰ অভিযোগ উত্থাপন হৈছে ।

অষ্ট্ৰেলিয়াৰ বিজয়ৰ পাচত খেলুৱৈসকলে উদযাপন কৰা দেখা গৈছিল । বিশ্বকাপৰ ট্ৰফীটো সেই সময়ত ড্ৰেছিং ৰুমত ৰখা হৈছিল । সেই সময়তে বিশ্বকাপৰ ট্ৰফীটোৰ সৈতে বেটছমেন মিচেল মাৰ্শে তোলা এখন ফটো ভাইৰেল হৈছে । তাৰকা বেটছমেন মিচেল মাৰ্শে ট্ৰফীৰ ওপৰত ভৰি থৈ বহি থকা দেখা গৈছে । এই সময়ছোৱাত, তেওঁৰ শাৰীৰিক ভাষাৰ পৰা অহংকাৰ ভাব স্পষ্টভাৱে দেখা গৈছে । তেওঁক হাতৰ মুঠি এটা বিয়েৰৰ বটল লৈ থকাও দেখা গৈছে ।

ফটোখনৰ পৰা এটা কথা স্পষ্ট যে মাৰ্শে সুৰাপান কৰি আছিল । তেওঁলোকে এইটোও পাহৰি গৈছিল যে এইটো এটা বিশ্বকাপ ট্ৰফী আৰু সকলোৱে ইয়াক সন্মান কৰা উচিত । ফটোখনত মাৰ্শৰ সৈতে অষ্ট্ৰেলিয়ান দলৰ সহযোগী কৰ্মচাৰীকো দেখা গৈছে । দলৰ বাকী খেলুৱৈসকলও তেওঁলোকৰ ওচৰত আছিল, কিন্তু কোনেও তেওঁক এনে কৰাত বাধা দিয়া নাছিল । যিটোৱে সকলোৱে আচৰিত কৰি তুলিছে ।

ফটোখনক লৈ সামাজিক মাধ্যমত ব্যাপক প্ৰতিক্ৰিয়াৰ সৃষ্টি কৰিছে । মিচেল মাৰ্শক বহুলোকে সমালোচনা কৰিছে । একপ্ৰকাৰ অনুৰাগীসকলে বিশ্বকাপৰ ট্ৰফীৰ এই অপমান সহ্য কৰিব পৰা নাই । যাৰ বাবে সামাজিক মাধ্যমত অনুৰাগীসকলে হতাশা ব্যক্ত কৰিছে । বহুলোকে এক্সত মিচল মাৰ্শক গুণ্ডা বুলি অভিহিত কৰিছে ।

এগৰাকী লোকে X ত লিখিছে যে এয়া অষ্ট্ৰেলিয়াৰ ক্ৰিকেটাৰ মিচেল মাৰ্শ আৰু এই ফটোখন অধিনায়ক পেট কামিন্সে শ্বেয়াৰ কৰিছে । গুজৰাটৰ হোটেলত পৰ্যটকসকলক বিয়েৰ পৰিৱেশন কৰিব পাৰি বুলি তেওঁ উদ্বেগো প্ৰকাশ কৰিছে ।

লগতে পঢ়ক : ৰোহিতৰ অশ্ৰুসিক্ত নয়ন, ভাবুক কোহলী, কান্দোনত ভাগি পৰা চিৰাজক শান্ত্বনা বুমৰাহৰ