ইন্টাৰনেশ্যনেল ডেস্ক, 16 ছেপ্টেম্বৰ : বৃহস্পতিবাৰে বাকিংহাম পেলেচে ঘোষণা কৰে যে সোমবাৰে লণ্ডনৰ ৱেষ্টমিনষ্টাৰ এবেত এক ঘণ্টাজোৰা গাম্ভীৰ্যপূৰ্ণ অনুষ্ঠানৰ দ্বাৰা ৰাষ্ট্ৰীয় মৰ্যাদাৰে ৰাণীৰ অন্ত্যেষ্টিক্ৰিয়া সম্পন্ন কৰা হ'ব । উক্ত অনুষ্ঠানৰ সমাপ্তিত ৰাণী দ্বিতীয় এলিজাবেথক তেওঁৰ প্ৰয়াত স্বামী প্ৰিন্স ফিলিপৰ কাষতে সমাধিস্থ কৰা হ'ব (Queen Elizabeth II to be buried with husband Philip) । উল্লেখ্য, ব্ৰিটেইনৰ আটাইতকৈ দীঘলীয়া সময় ৰাজত্ব কৰা ৰাণীৰ ৰাষ্ট্ৰীয় অন্ত্যেষ্টিক্ৰিয়া সোমবাৰে স্থানীয় সময় অনুসৰি পুৱা ১১ বজাত আৰম্ভ হ'ব আৰু দুই মিনিটৰ ৰাষ্ট্ৰীয় মৌনতাৰে সমাপ্ত হ'ব (Queen Elizabeth II funeral ceremony) ।
অন্ত্যেষ্টিক্ৰিয়াৰ দিনা স্থানীয় সময় অনুসৰি পুৱা ৮ বজাত ৱেষ্টমিনষ্টাৰ এবেৰ দুৱাৰ মুকলি হ'ব । তাত ভাৰতৰ ৰাষ্ট্ৰপতি দ্ৰৌপদী মূৰ্মুকে (Droupadi Murmu attend funerel of British Queen) ধৰি প্ৰায় ৫০০ বিশ্ব নেতাৰ সৈতে প্ৰায় ২,০০০ অতিথিৰ বাবে আসনৰ ব্যস্থা কৰা হৈছে । উক্ত দিনটোৰ বাবে প্ৰস্তুত কৰা পৰিকল্পনা অনুযায়ী, বিদেশী ৰাজপৰিয়ালকে ধৰি সকলো ৰাষ্ট্ৰ প্ৰধান আৰু বিদেশৰ চৰকাৰী প্ৰতিনিধিসকল এক কেন্দ্ৰীয় স্থানত একত্ৰিত হ'ব আৰু তাৰ পৰা সামূহিক ব্যৱস্থাৰে এবেলৈ লৈ যোৱা হ'ব ।
এই বছৰৰ আৰম্ভণিতে ৰাণীৰ জন্মদিনৰ সন্মানত স্বীকৃতি লাভ কৰা প্ৰায় 200 জন লোকেও তাত যোগদান কৰিব । তাৰে ভিতৰত আছে কোভিড-19 মহামাৰীৰ সময়ত অসাধাৰণ অৱদান আগবঢ়োৱা আৰু স্বেচ্ছাসেৱী লোকসকল । বাকিংহাম পেলেচে এই কথা জনাইছে ।
এবেৰ পৰা ৰাণীৰ কফিনটো ছেইণ্ট জৰ্জ চেপেলত এটা সেৱাৰ বাবে উইণ্ডছৰ কেচেললৈ প্ৰেৰণ কৰা হ'ব । য'ত ৰজা তৃতীয় চাৰ্লছ আৰু ৰাজপৰিয়ালৰ আন জ্যেষ্ঠ সদস্যসকলে এটা ব্যক্তিগত সমাধি সেৱাত অংশগ্ৰহণ কৰিব । সোমবাৰে সন্ধিয়া কিং জৰ্জ ষষ্ঠ মেম'ৰিয়েল চেপেলত বিগত এপ্ৰিল মাহত মৃত্যু হোৱা প্ৰিন্স ফিলিপৰ সৈতে তেওঁৰ কফিনটো দেখা যাব ।
ৰাণীৰ কফিনটো ৱেষ্টমিনষ্টাৰ হলত ৰখা হ'ব য'ত হাজাৰ হাজাৰ ৰাইজে তেওঁক শ্ৰদ্ধা জনাবলৈ ঘণ্টাৰ পিছত ঘণ্টা ধৰি শাৰী পাতি আছে । বাকিংহাম পেলেচে জনোৱা মতে, ৰাণীৰ চাৰি সন্তান ৰজা চাৰ্লছ তৃতীয়, ৰাজকুমাৰী ৰয়েল এনি, ডিউক অব য়ৰ্ক এণ্ড্ৰিউ আৰু আৰ্ল অব ৱেছেক্স এডৱাৰ্ডে শুকুৰবাৰে স্থানীয় সময় অনুসৰি সন্ধিয়া ৭.৩০ বজাত ৰাণীৰ কফিনৰ চাৰিওফালে ১৫ মিনিট সময় ধৰি থাকিব ।
সোমবাৰে স্থানীয় সময় অনুসৰি পুৱা 6.30 বজাত দৰ্শনাৰ্থীৰ বাবে বন্ধ হ'ব । তাৰ পিছত ৰাষ্ট্ৰীয় অন্ত্যেষ্টিক্ৰিয়াৰ প্ৰস্তুতি আৰম্ভ হ'ব । কফিনটো শোভাযাত্ৰাৰে ৰয়েল নেভিৰ ৰাষ্ট্ৰীয় বন্দুকবাহনলৈ লৈ যোৱা হ'ব । ৰজা চাৰ্লছ আৰু তেওঁৰ পুত্ৰ, প্ৰিন্স উইলিয়াম আৰু হেৰীয়ে কফিনটোৰ পিছে পিছে যাব । তাৰ পৰা কফিনটো সেৱাৰ বাবে এবেলৈ লৈ যোৱা হ'ব ।
তাত সেৱাৰ শেষত কফিনটো ৰজা, ৰাণী আৰু ৰাজপৰিয়ালৰ সদস্যসকলে অনুসৰণ কৰিব । জ্যেষ্ঠ ৰাজকীয়সকলে পুনৰ মধ্য লণ্ডনৰ এবেৰ পৰা ৱেলিংটন আৰ্কলৈ শোভাযাত্ৰাত অংশগ্ৰহণ কৰিব । ৱেলিংটন আৰ্কৰ পৰা কফিনটো প্ৰায় 40 কিলোমিটাৰ দূৰত্বৰ বাৰ্কশ্বায়াৰৰ উইণ্ডছৰলৈ লৈ যোৱা হ'ব ।
উইণ্ডছৰত উপস্থিত হোৱাৰ পিছত আন এটা শোভাযাত্ৰাৰে ৰাণীৰ ঘৰুৱা আৰু প্ৰাসাদৰ কৰ্মচাৰীৰ প্ৰায় 800 সদস্যৰ সেৱাৰ বাবে উইণ্ডছৰ কেচেল ইষ্টেটৰ ছেইণ্ট জৰ্জ চেপেলৰ ভিতৰলৈ কফিনটো লৈ যাব । স্থানীয় সময় অনুসৰি আবেলি 4 বজাত কফিনটো ৰয়েল ভল্টত নমাই দিয়া হ'ব ।
ৰাণীৰ পাইপাৰে এটা বিলাপ বজাব আৰু কেণ্টাৰবাৰীৰ আৰ্কবিশ্বপে আশীৰ্বাদ দিব আৰু অন্ত্যেষ্টিক্ৰিয়াৰ ৰাজহুৱা দিশটোৰ সমাপ্তি চিহ্নিত কৰি ৰাষ্ট্ৰীয় সংগীত গাব । চূড়ান্ত সমাধি সেৱা ৰাজপৰিয়ালৰ বাবে সম্পূৰ্ণব্যক্তিগত হ'ব । স্থানীয় সময় অনুসৰি সন্ধিয়া 7.30 বজাত অনুষ্ঠিত হ'ব এই সেৱা আৰু উইণ্ডছৰৰ ডীনৰ দ্বাৰা ই পৰিচালিত হ'ব ।
লগতে পঢ়ক :ৰাণী এলিজাবেথৰ অন্ত্যেষ্টিক্ৰিয়াত উপস্থিত থাকিব ৰাষ্ট্ৰপতি দ্ৰৌপদী মূৰ্মু
