ইণ্টাৰনেশ্যনেল ডেস্ক,১৭ ছেপ্টেম্বৰ : লণ্ডনৰ ৱেষ্টমিনষ্টাৰ হলত হাজাৰ হাজাৰ লোকে ৰাণী দ্বিতীয় এলিজাবেথক শেষ শ্ৰদ্ধাঞ্জলি জ্ঞাপন কৰিছে । দেশ বিদেশৰ বহু বিশিষ্ট অতিথিও উপস্থিত হৈ ৰাণী দ্বিতীয় এলিজাবেথৰ কফিনত শ্ৰদ্ধাঞ্জলি জ্ঞাপন কৰিছে । কিন্তু ইয়াৰ মাজতে এক অপ্ৰীতিকৰ ঘটনা সংঘটিত হয় ।
শান্তি শৃংখলাভাৱে হাজাৰ হাজাৰ লোকে শ্ৰদ্ধাঞ্জলি জ্ঞাপন কৰি থকাৰ মাজতে কফিনৰ ফালে এজন লোকে দৌৰি আহে । যাৰ বাবে এক বিশৃংখল পৰিৱেশৰ সৃষ্টি হয় । পৰৱৰ্তী সময়ত মেট্ৰ'পলিটান আৰক্ষীয়ে লোকজনক গ্ৰেপ্তাৰ কৰে (Man arrested at Queens tribute ceremony)।
আৰক্ষীয়ে জনোৱা মতে শুকুৰবাৰে নিশা সংঘটিত হৈছে এই ঘটনা । ব্ৰিটেইনৰ পাব্লিক অৰ্ডাৰ এক্টৰ অধীনত লোকজনত গ্ৰেপ্তাৰ কৰা হৈছে আৰু জিম্মাত লোৱা হৈছে । প্ৰয়াত ৰাণীৰ কফিনৰ ওচৰতে ওখ স্থানত ইম্পেৰিয়েল মুকুট আৰু অন্যান্য ৰাজকীয়ৰ সামগ্ৰী ৰখা হৈছিল । প্ৰত্যক্ষদৰ্শীয়ে অভিযোগ কৰা মতে লোকজনে সেই দিশত দৌৰি গৈছিল ।
মেট্ৰ' আৰক্ষীয়েও এক বিবৃতিযোগে এই কথা প্ৰকাশ কৰিছে । আনকি বুধবাৰৰ পৰা BBCত চলি থকা শ্ৰদ্ধাঞ্জলি অনুষ্ঠানো এই ঘটনাৰ সময়ত কিছু সময়ৰ বাবে বন্ধ হৈ গৈছিল । জানিব পৰা মতে ঘণ্টা ঘণ্টা ধৰি বহু লোকে ৰাণীক শেষ শ্ৰদ্ধা জনাবলৈ শাৰী পাতি আছে ।
টেমছ নদীৰ সমীপৰ ৮ কিলোমিটাৰৰো বেছি দীঘল শাৰীটোত বিশ্বৰ বহু বিশিষ্ট ব্যক্তিক দেখা গৈছে । তেওঁলোকৰ ভিতৰত বিশ্ব বিখ্যাত ফুটবলাৰ ডেভিদ বেকহামকো দেখা গৈছে (David Beckham Queens tribute ceremony)। শুকুৰবাৰে, ৰজা তৃতীয় চাৰ্লছৰ সৈতে তেওঁৰ ভাই-ভনী ৰাজকুমাৰী এনি আৰু প্ৰিন্স এণ্ড্ৰিউ আৰু এডৱাৰ্ডে শ্ৰদ্ধাঞ্জলি অনুষ্ঠানত ভাগ লৈছিল ।
উল্লেখ্য যে সোমবাৰে স্থানীয় সময় অনুসৰি পুৱা ৬.৩০ বজাত দৰ্শনাৰ্থীৰ বাবে শ্ৰদ্ধাঞ্জলি অনুষ্ঠান বন্ধ কৰি দিয়া হ'ব । তাৰ পাছত ৰাষ্ট্ৰীয় অন্ত্যেষ্টিক্ৰিয়াৰ প্ৰস্তুতি আৰম্ভ হ'ব । কফিনটো শোভাযাত্ৰাৰে ৰয়েল নেভিৰ ৰাষ্ট্ৰীয় বন্দুকবাহনলৈ লৈ যোৱা হ'ব ।
ৰজা চাৰ্লছ আৰু তেওঁৰ পুত্ৰ, প্ৰিন্স উইলিয়াম আৰু হেৰীয়ে কফিনটোৰ পিছে পিছে যাব । তাৰ পৰা কফিনটো সেৱাৰ বাবে এবেলৈ লৈ যোৱা হ'ব । তাত সেৱাৰ শেষত কফিনটো ৰজা, ৰাণী আৰু ৰাজপৰিয়ালৰ সদস্যসকলে অনুসৰণ কৰিব । জ্যেষ্ঠ ৰাজকীয়সকলে পুনৰ মধ্য লণ্ডনৰ এবেৰ পৰা ৱেলিংটন আৰ্কলৈ শোভাযাত্ৰাত অংশগ্ৰহণ কৰিব ।
ৱেলিংটন আৰ্কৰ পৰা কফিনটো প্ৰায় ৪০ কিলোমিটাৰ দূৰত্বৰ বাৰ্কশ্বায়াৰৰ উইণ্ডছৰলৈ লৈ যোৱা হ'ব । চূড়ান্ত সমাধি সেৱা ৰাজপৰিয়ালৰ বাবে সম্পূৰ্ণ ব্যক্তিগত হ'ব । স্থানীয় সময় অনুসৰি সন্ধিয়া ৭.৩০ বজাত অনুষ্ঠিত হ'ব এই সেৱা আৰু উইণ্ডছৰৰ ডীনৰ দ্বাৰা ই পৰিচালিত হ'ব ।
লগতে পঢ়ক :ব্ৰিটেইনৰ প্ৰবাসী ভাৰতীয়সকলৰ ৰাণীৰ মৃত্যুত শোক প্ৰকাশ
