ইণ্টাৰনেশ্যনেল ডেস্ক,১০ মাৰ্চ : ৰাছিয়া আৰু ইউক্ৰেইনৰ মাজত যুদ্ধ (Russia Ukraine War) অব্যাহত আছে । প্ৰায় দুসপ্তাহ ধৰি চলি থকা এই যুদ্ধৰ কেতিয়া অন্ত পৰিব তাক লৈ এতিয়া বিশ্ববাসী চিন্তিত । ইয়াৰ মাজতে ইউক্ৰেইন পক্ষই ৰাছিয়াৰ সেনা বাহিনীৰ বিৰুদ্ধে শক্তিশালী ৰূপত থিয় দিয়াৰ ফলত সামৰিক অভিযান কিছু মন্থৰ হোৱা দেখা গৈছে । কিন্তু এই যুদ্ধত ৰাসায়নিক বা পাৰমাণৱিক অস্ত্ৰ ব্যৱহাৰৰ আশংকা কৰিছে বিশ্বৰ বিভিন্ন দেশে ।
শেহতীয়াকৈ ৰাছিয়াই দাবী কৰিছিল যে ইউক্ৰেইনত ৰাসায়নিক আৰু পাৰমাণৱিক অস্ত্ৰৰ পৰীক্ষাগাৰ চলাই থকা হৈছে । ৰাছিয়াৰ অভিযোগ নস্যাৎ কৰিছে আমেৰিকা যুক্তৰাষ্ট্ৰই । আমেৰিকাৰ মতে ৰাছিয়াই হে ইউক্ৰেইনত ৰাসায়নিক অস্ত্ৰ ব্যৱহাৰ কৰাৰ সম্ভাৱনা আছে (Russia may use chemical weapons in Ukraine)। আমেৰিকা যুক্তৰাষ্ট্ৰ প্ৰশাসনে ৰাজহুৱাভাৱে সতৰ্ক কৰি দিছে যে ৰাছিয়াই ইউক্ৰেইনত ৰাসায়নিক তথা পাৰমাণিক অস্ত্ৰ ব্যৱহাৰ কৰিব পাৰে ।
উল্লেখ্য যে শেহতীয়াকৈ ৰাছিয়াৰ বৈদেশিক মন্ত্ৰালয়ৰ মুখপাত্ৰ মাৰিয়া জাখাৰোভাই কোনো উপযুক্ত প্ৰমাণ অবিহনে ইউক্ৰেইনৰ ভূখণ্ডত ৰাসায়নিক আৰু পাৰমাণৱিক অস্ত্ৰৰ পৰীক্ষাগাৰ চলাই থকাৰ অভিযোগ উত্থাপন কৰিছিল ।
ইয়াৰ পাছতে আমেৰিকা যুক্তৰাষ্ট্ৰৰ হোৱাইট হাউচৰ প্ৰেছ সচিব জেন পাচাকীয়ে ৰাছিয়াৰ এই দাবীক অযুক্তিকৰ বুলি অভিহিত কৰে । তেওঁ কয় যে এয়া ৰাছিয়াৰ ষড়যন্ত্ৰ । ৰাছিয়াই ইউক্ৰেইনৰ বিৰুদ্ধে এনে ধৰণৰ গণধ্বংসৰ অস্ত্ৰ ব্যৱহাৰ কৰি নিজৰ আধাৰশিলা স্থাপন কৰাৰ এয়া এক প্ৰচেষ্টাৰ অংশ হ'ব পাৰে ।
ইউক্ৰেইনৰ ওপৰত পূৰ্বপৰিকল্পিত আৰু অপ্ৰৰোচিত আক্ৰমণক ন্যায়সঙ্গত কৰাৰ বাবে ৰাছিয়াৰ এয়া এক স্পষ্ট কৌশল বুলিও দাবী কৰে আমেৰিকাই । বুধবাৰে টুইটযোগে হোৱাইট হাউচৰ প্ৰেছ সচিব জেন পাচাকীয়ে এই কথা প্ৰকাশ কৰে । তেওঁ উল্লেখ কৰা মতে ৰাছিয়াই বিভিন্ন ধৰণৰ মিছা দাবী কৰিছে আৰু চীনে ইয়াক সমৰ্থন জনাইছে ।
মিছা অজুহাত লৈ ইউক্ৰেইনত পাৰমাণিক আক্ৰমণৰ বাবে ৰাছিয়াই চেষ্টা চলাব পাৰে । সেয়ে আমেৰিকাই বিশ্ববাসীক এই ক্ষেত্ৰত সতৰ্ক হৈ থাকিবলৈ আহ্বান জনায় । ইফালে পেন্টাগনৰ প্ৰেছ সচিব জন কাৰ্বিয়ে বুধবাৰে ৰাছিয়াৰ দাবীক "মালাৰ্কিৰ এটা গোট" বুলি অভিহিত কৰিছে ।
এইখিনিতে উল্লেখ কৰিব লাগিব যে ৰাছিয়াই পুটিনৰ শত্ৰু যেনে এলেক্সি নাভালনি আৰু প্ৰাক্তন গুপ্তচৰ ছেৰ্গেই স্ক্ৰিপালৰ বিৰুদ্ধে হত্যাৰ চেষ্টা কৰাৰ আগতে ৰাসায়নিক অস্ত্ৰ ব্যৱহাৰ কৰিছিল । আনকি ৰাছিয়াই চিৰিয়াৰ আসাদ চৰকাৰকো সমৰ্থন কৰে, যিয়ে এক দশক ধৰি চলি থকা গৃহযুদ্ধত তাৰ লোকসকলৰ বিৰুদ্ধে ৰাসায়নিক অস্ত্ৰ ব্যৱহাৰ কৰি আহিছে ।
লগতে পঢ়ক :ৰাছিয়াত ব্যৱসায় বন্ধ কৰিলে পেপচিকো, কোকাকোলা, ষ্টাৰবাকছে
