নেশ্যনেল ডেস্ক,২০ নৱেম্বৰ : উত্তৰকাশীৰ চিল্কিয়াৰা সুৰংগত আৱদ্ধ শ্ৰমিকসকলক উদ্ধাৰৰ বাবে অভিযান অব্যাহত আছে । দুৰ্ঘটনাৰ আজি নৱম দিন । ৪১ জন শ্ৰমিক এতিয়াও আৱদ্ধ হৈ আছে সুৰংগটোত । যাৰ বাবে শ্ৰমিকসকলৰ পৰিয়ালৰ সমস্যা বৃদ্ধি পাবলৈ ধৰিছে । শ্ৰমিকসকলৰ অৱস্থা জানিবলৈ চিল্কিয়াৰাত ইতিমধ্যে উপস্থিত হৈছে পৰিয়ালৰ লোকসকল । এনে পৰিস্থিতিত উত্তৰাখণ্ড চৰকাৰে সেই পৰিয়ালৰ লোকসকলৰ ব্যয় বহন কৰাৰ সিদ্ধান্ত লৈছে । ইয়াৰ লগতে, উত্তৰাখণ্ড চৰকাৰে শ্ৰমিকসকলৰ পৰিয়ালক সাক্ষাতৰ বাবে আৰু তেওঁলোকৰ পৰিস্থিতিৰ বুজ ল'বলৈ উত্তৰকাশীলৈ তিনিজনীয়া বিষয়াৰ এটা দল প্ৰেৰণ কৰাৰ সিদ্ধান্ত লৈছে ।

চৰকাৰে লোৱা সিদ্ধান্ত অনুসৰি চৰকাৰে আৱদ্ধ শ্ৰমিকসকলৰ পৰিয়ালৰ আগমন, থকা, খাদ্য আৰু ভ্ৰমণৰ ব্যয় বহন কৰিব । একে সময়তে, আৱদ্ধ শ্ৰমিকসকলক উদ্ধাৰৰ বাবে চলি থকা সাহায্য আৰু উদ্ধাৰ অভিযানৰ বিষয়েও শ্ৰমিকসকলৰ গৃহ ৰাজ্যসমূহৰ বিষয়াসকলক তথ্য প্ৰদান কৰা হ'ব । আইএএছ ড০ নীৰজ খাইৰৱাল আৰু এছডিএম শৈলেন্দ্ৰ ইতিমধ্যে আৱদ্ধ শ্ৰমিকসকলৰ পৰিয়ালৰ সৈতে সমন্বয় ৰখাৰ বাবে দায়িত্ব দিয়া হৈছে ।

মুখ্যমন্ত্ৰী ধামীয়ে এই সন্দৰ্ভত কৈছে যে চিল্কিয়াৰা সুৰংগত আৱদ্ধ শ্ৰমিকসকলক উদ্ধাৰৰ কাম দ্ৰুত গতিত চলি আছে । এনে পৰিস্থিতিত, যদি সুৰংগটোত আৱদ্ধ শ্ৰমিকসকলৰ পৰিয়ালে তেওঁলোকৰ অৱস্থাৰ বিষয়ে জানিব বিচাৰিবলৈ আহে তেন্তে চৰকাৰে তেওঁলোকৰ সকলো খৰচ বহন কৰিব । জ্যেষ্ঠ বিষয়াসকলক ইয়াৰ দায়িত্ব দিয়া হৈছে । একে সময়তে, শ্ৰমিকসকলৰ গৃহ ৰাজ্যসমূহক উদ্ধাৰৰ বিষয়ে অৱগত কৰিবলৈ ঘটনাস্থলীলৈ তিনিগৰাকী বিষয়া প্ৰেৰণ কৰা হৈছে । তেওঁলোকে সকলো তথ্য প্ৰদান কৰাৰ লগতে নিৰ্দিষ্ট নিৰ্দেশনা দিব ।

মুখ্যমন্ত্ৰী ধামীৰ মতে সুৰংগটোত উদ্ধাৰ কাৰ্যৰ লগতে শ্ৰমিকসকলৰ অৱস্থা জানিবলৈ অহা পৰিয়ালবোৰৰ সৈতে উন্নত সমন্বয় স্থাপন কৰা হৈছে আৰু প্ৰতি মুহূৰ্তৰ তথ্য প্ৰদান কৰা হৈছে । ইফালে দুৰ্ঘটনাৰ পাছতে উত্তৰকাশীত এটা আৰক্ষী নিয়ন্ত্ৰণ কক্ষও স্থাপন কৰা হৈছিল । য'ৰ পৰা আৱদ্ধ শ্ৰমিকসকলৰ পৰিয়ালক প্ৰতিটো আপডেট দিয়া হৈছে ।

আইএএছ বিষয়া ড০ নীৰজ খাইৰৱালক কেন্দ্ৰীয় প্ৰতিষ্ঠান, সংস্থা আৰু বিশেষজ্ঞৰ এটা দলৰ সৈতে সমন্বয়ৰ দায়িত্ব দিয়া হৈছে । এছডিএম শৈলেন্দ্ৰ সিং নেগীক ইতিমধ্যে ব্যৱস্থাসমূহৰ তত্বাৱধানৰ বাবে ঘটনাস্থলীলৈ প্ৰেৰণ কৰা হৈছে । মুখ্যমন্ত্ৰী ধামীৰ নিৰ্দেশত গড়ৱালৰ আয়ুক্ত বিনয় শংকৰ পাণ্ডেয়ে হৰিদ্বাৰ এছডিএম মনীষ সিং, ডিএছঅ' তেজবল সিং আৰু ৰুদ্ৰপ্ৰয়াগৰ ডিপিএঅ' অখিলেশ মিশ্ৰক দলত অন্তৰ্ভুক্ত কৰাৰ নিৰ্দেশ দিছে । এই তিনিগৰাকী বিষয়াই আৱদ্ধ শ্ৰমিকসকলৰ পৰিয়ালৰ বাবে খাদ্য, বাসস্থান আৰু পৰিবহণৰ ব্যৱস্থাৰ লগতে উদ্ধাৰ অভিযানৰ ব্যৱস্থাৰ পৰ্যালোচনা কৰিব ।

লগতে পঢ়ক :চিল্কিয়াৰা সুৰংগৰ উদ্ধাৰ অভিযানৰ প্ৰগতিৰ প্ৰতিবেদন বিচাৰিছে পিএমঅ'ৰ বিশেষজ্ঞ দলে