পাহাৰৰ পৰা খহি পৰা মাটিয়ে লখিমপুৰত এজনৰ প্ৰাণ ল'লে!

লখিমপুৰ: লখিমপুৰৰ অসম অৰুণাচল সীমান্তৱৰ্তী বান্দৰদেৱাত পাহাৰ খহি পৰাৰ ফলত এজন লোকৰ মৃত্যু হয়। পাহাৰৰ কটা মাটি ডাম্পাৰত আনিবলৈ যাওতেই পাহাৰ খহি ডাম্পাৰৰ ওপৰতে পৰাৰ ফলত চালক জনৰ মৃত্যু হয় । লখিমপুৰৰ বান্দৰদেৱাত এই দুৰ্ভাগ্য়জনক ঘটনা সংঘটিত হৈছে।

লখিমপুৰৰ অৰুণাচল সীমান্তৱৰ্তী বান্দৰদেৱাত পাহাৰ খহি বিজু কুটুম নামৰ লোকজনৰ মৃত্যু হয় । লখিমপুৰৰ বান্দৰদেৱাৰ মূল ব্যৱসায়িক অঞ্চলটো দুয়োখন ৰাজ্যৰে সীমা । এই এলেকাতে আছে ৰাজ্যখনৰ ৰাজধানী ইটানগৰ সংযোগী পথৰ প্ৰৱেশ গেট । এই এলেকাৰ কাষতে আজি শোকাবহ ঘটনাটো সংঘটিত হয় । পাহাৰৰ পৰা খহি পৰা মাটিয়ে এজন লোকৰ প্ৰাণ কাঢ়ি লয় ।

সেই এলেকাটোত অৰুণাচলৰ এজন লোকে পাহাৰৰ ৰঙা মাটি কটাই আছিল । কটা মাটিখিনি ডাম্পাৰেৰে কঢ়িয়াই নিয়া হৈছিল । শনিবাৰে পুৱা এনেদৰে পাহাৰ কটা মাটি ডাম্পাৰে আনিবলৈ যোৱাৰ সময়তে ডাম্পাৰতে পাহাৰৰ মাটি খহি পৰে । খহি পৰা মাটিয়ে হেঁচা মাৰি ধৰে চালকজনক । ফলত থিতাতে নিহত হয় চালকজন ।

উল্লেখযোগ্য AR-01-P-4685 নম্বৰৰ ডাম্পাৰখনত পাহাৰৰ ৰঙা মাটি ভৰাই থকাৰ অৱস্থাত ওপৰৰ পৰা পাহাৰৰ মাটি খহি ডাম্পাৰ খনৰ ওপৰত পৰাৰ ফলত এই শোকাবহ ঘটনাটো ঘটে । ঘটনাটোত লখিমপুৰ জিলাৰ পথালি পাহাৰৰ মিলনজ্যোতি গাঁৱৰ প্ৰায় ৪৫ বছৰীয়া বিজু কুটুম নামৰ ডাম্পাৰ চালক জনৰ থিতাতে মৃত্যু হয় ৷

ঘটনা সন্দৰ্ভত ইতিমধ্যে আৰক্ষীয়ে প্ৰয়োজনীয় ব্যৱস্থাসমূহ গ্ৰহণ কৰিছে । জীৱিকাৰ বাবে কাম কৰি থকা অৱস্থাত এনেদৰে বিজু কুটুমে প্ৰাণ হেৰুৱাবলগীয়া হোৱাত অঞ্চলটোত এক শোকাৱহ পৰিৱেশৰ সৃষ্টি হৈছে ।