সোণাৰিত ভয়াবহ বান, নিমিষতে বুৰ গ'ল শতাধিক পৰিয়ালৰ বাসগৃহ
সোণাৰিৰ ভিন্ন স্থানত ভয়ংকৰ বান, চৰাইদেউৰ টিঙালীবাম, বাঁহবাৰী, লেকাম পথাৰ, চফ্ৰাই, বৈৰাগীহাবি, টকলিমৰা, ৰাইদঙীয়া, লালতিপথাৰ বানত প্লাবিত ৷
Published : July 19, 2026 at 8:16 PM IST
ডিব্ৰুগড় : অসমৰ চুবুৰীয়া ৰাজ্য নাগালেণ্ডত হোৱা নেৰানেপেৰা বৰষুণৰ বাবে হাহাকাৰ লাগিছে অসমত । নাগালেণ্ডৰ বৰষুণৰ পানীয়ে বুৰাই পেলালে ঐতিহাসিক চৰাইদেউ জিলাৰ বিভিন্ন অঞ্চল । বিশেষকৈ চৰাইদেউ জিলাৰ সদৰ সোণাৰিত ভয়ংকৰ ৰূপ লৈছে বান পৰিস্থিতিয়ে । নাগালেণ্ডৰ লগতে চৰাইদেউ জিলাখনতো শনিবাৰৰ পৰা হোৱা বৰষুণৰ ফলত টাউকাক নদীৰ জলস্তৰ হঠাৎ উফন্দি উঠিছে ৷
যাৰ বাবে চৰাইদেউৰ টিঙালীবাম, বাঁহবাৰী, লেকাম পথাৰ, চফ্ৰাই, বৈৰাগীহাবি, টকলিমৰা, ৰাইদঙীয়া, লালতিপথাৰ, বেকাদলং, নকছাৰি অঞ্চলত বানে বুৰাই পেলাইছে । ইয়াৰ উপৰিও লেকামজানৰ পানী বাগৰি টিয়কঘাট টিঙালীবাম পথৰ বিভিন্ন অংশ ডুব যোৱাত যাতায়ত ব্যাহত হৈ পৰিছে । ইতিমধ্যে বহু পৰিয়ালৰ বাসগৃহ পানীয়ে বুৰাই পেলোৱাত আশ্ৰয় শিবিৰলৈ ঢাপলি মেলিব লগীয়া হৈছে ।
বানপানীত বিস্তীৰ্ণ কৃষিভূমি ডুব যোৱাৰ ফলত কৃষক ৰাইজৰ মাজত সৃষ্টি হৈছে হাহাকাৰ । হোৰাহোৰে নদীৰ জলস্তৰ বৃদ্ধি পাই থকাত পশুধন আৰু ঘৰৰ সামগ্ৰী সুৰক্ষিত স্থানলৈ স্থানান্তৰ কৰিবলৈ বাধ্য হৈছে বহু পৰিয়ালে । ইতিমধ্যে জিলা প্ৰশাসনে কেইবাটাও আশ্ৰয় শিবিৰৰ ব্যৱস্থা কৰাৰ লগতে বানাক্ৰান্ত ৰাইজক সহায় কৰাৰ বাবে দুৰ্যোগ প্ৰশমন বিভাগেও চেষ্টা অব্যাহত ৰাখিছে ৷ ইফালে বৰ্তমানেও বৰষুণ অব্যাহত থকাত পৰিস্থিতি অধিক অৱনতি ঘটাৰ আশংকা কৰা হৈছে ।
আনহাতে বান পৰিস্থিতি বুজ লোৱাৰ পাছতে বিধায়ক ধৰ্মেশ্বৰ কোঁৱৰে কয়, "পাহাৰ আৰু চৰাইদেউ জিলাৰ বিভিন্ন প্ৰান্তৰত হোৱা বৰষুণৰ বাবে বানপানীৰ কৱলত পৰিছে সোণাৰি সমষ্টি । বৰষুণ দি থাকিলে বানপানীৰ ভয়াবহতা আৰু বৃদ্ধি পোৱাৰ সম্ভাৱনা আছে । বানৰ ফলত বহু লোকৰ ক্ষয়-ক্ষতি হ'ব । পূৰ্বে দহ বছৰৰ আগতে এনেকুৱা বান হৈছিল । ইতিমধ্যে প্ৰশাসনে কেইবাটাও আশ্ৰয় শিবিৰৰ ব্যৱস্থা কৰিছে ।"
বান পৰিস্থিতিক লৈ সোণাৰি আঞ্চলিক পঞ্চায়তৰ সভাপতি কমলজ্যোতি হাজৰিকাই কয়, "তীব্ৰ গতিত বৃদ্ধি পাইছে বান । এইদৰে পানী বৃদ্ধি পাই থাকিলে ডাঙৰ সমস্যা সৃষ্টি হ'ব । যি বিলাক ঠাইত বানপানী হোৱা নাছিল সেই ঠাইত তাৎক্ষণিকভাৱে পানী হৈছে । এই পানী নাগালেণ্ডৰ পৰা আহিছে ৷ বৰ্তমানো নাগালেণ্ডৰ নৈসমূহ বিপদ সীমাৰ ১০ ফুট উচ্চতাত পানী বৈ আছে বুলি জানিব পৰা গৈছে । এনে পৰিস্থিতিত সোণাৰি সমষ্টিত বানৰ ভয়াবহতা আৰু বৃদ্ধি পোৱাৰ সম্ভাৱনা আছে ।"
লগতে পঢ়ক: চিমেন নদীত অবৈধ শিল-বালি খননৰ নিৰপেক্ষ তদন্তৰ দাবী আছুৰ
