ৰং-বিৰঙী অৰ্কিড আৰু কেকটাছে পুলকিত কৰিব আপোনাক, ক’ত আছে এই মনোৰম উদ্যান ?

গুৱাহাটী: গুৱাহাটীৰ ৰাষ্ট্ৰীয় বিজ্ঞান কেন্দ্ৰৰ দৰ্শনাৰ্থীৰ বাবে সুখবৰ । কিয়নো ৰাষ্ট্ৰীয় বিজ্ঞান কেন্দ্ৰত নতুনকৈ সংযোজিত হ'ব "অৰ্কিড আৰু কেকটাছ উদ্যান"৷ অৰ্কিড উদ্যানত ১২০ তকৈ অধিক প্ৰজাতিৰ অৰ্কিড সংৰক্ষণ কৰাৰ লগতে ৭০ বিধতকৈও অধিক কেকটাছ সংৰক্ষণ কৰা হৈছে । অসমৰ অৰ্কিডৰ লগতে উত্তৰ-পূৰ্বাঞ্চলৰ ছিকিম, অৰুণাচল প্ৰদেশ, মেঘালয়ত পোৱা বিভিন্ন প্ৰকাৰৰ প্ৰায় ৬০ টা প্ৰজাতিৰ অৰ্কিড ইয়াত ৰোপন কৰা হৈছে ৷ আনহাতে, বেংগালুৰু, দাৰ্জিলিং, কালিংপং, থাইলেণ্ডৰ পৰা অনা হৈছে হাইব্ৰীড প্ৰজাতিৰ অৰ্কিড ।

দেশৰ বিভিন্ন প্ৰান্তত থকা ৰাষ্ট্ৰীয় বিজ্ঞান কেন্দ্ৰবোৰৰ ভিতৰত গুৱাহাটী ৰাষ্ট্ৰীয় বিজ্ঞান কেন্দ্ৰত দৰ্শনাৰ্থীৰ বাবে প্ৰথমখন অৰ্কিড উদ্যান আৰু কেকটাছ উদ্যান মুকলি কৰা হ'ব । সোমবাৰে অৰ্থাৎ ১৮ মে'ত আন্তঃৰাষ্ট্ৰীয় সংগ্ৰাহালয় দিৱসৰ লগত সংগতি ৰাখি নতুনকৈ নিৰ্মাণ কৰা অৰ্কিড আৰু কেকটাছ উদ্যানখন দৰ্শনাৰ্থীৰ বাবে মুকলি কৰিব ।

এই সন্দৰ্ভত ৰাষ্ট্ৰীয় বিজ্ঞান কেন্দ্ৰৰ শিক্ষা বিষয়া প্ৰেমধৰ দাসে কয় , ‘‘বিশেষকৈ অসম তথা বৃহত্তৰ উত্তৰ-পূৰ্বাঞ্চলৰ ঐতিহ্য বুলি কোৱা হয় অৰ্কিডক । বিভিন্ন ধৰণৰ অৰ্কিড পোৱা যায় উত্তৰ-পূৰ্বাঞ্চলত । যুৱ-প্ৰজন্ম আৰু শিক্ষার্থীসকলৰ মাজত বৈজ্ঞানিক মানসিকতাৰ প্ৰসাৰ আৰু জনসাধাৰণৰ অংশগ্ৰহণ বৃদ্ধিৰ লক্ষ্যৰে এই পদক্ষেপ গ্ৰহণ কৰা হৈছে । এই উদ্যানখন দর্শনার্থীসকলৰ বিশেষ আকৰ্ষণৰ কেন্দ্ৰবিন্দু হ'ব ৷ কিয়নো ইয়াত উত্তৰ-পূব ভাৰতৰ চহকী উদ্ভিদ, প্ৰাকৃতিক ঐতিহ্যক প্ৰতিফলিত কৰা থলুৱা প্ৰজাতিৰ কপৌফুলৰ (অৰ্কিড) লগতে কিছুমান বিদেশী প্ৰজাতিৰ অৰ্কিডৰো প্ৰদর্শন কৰা হ'ব । ইয়াৰ উপৰিও, প্ৰতিকূল আৰু খৰাং পৰিস্থিতিতো জীয়াই থাকিব পৰা কেকটাছৰ আচৰিত অভিযোজন ক্ষমতাক প্ৰদর্শন কৰা আকৰ্ষণীয় উদ্ভিদৰ এক সংগ্ৰহো ইয়াত দেখিবলৈ পোৱা যাব ।"

এক বিশেষ প্ৰজাতিৰ কপৌফুল (ETV Bharat)

উত্তৰ-পূৰ্বাঞ্চলৰ জলবায়ু কেকটাছৰ বাবে উন্নত নহয়, যদিও বিজ্ঞানসন্মতভাৱে কেকটাছবোৰ ৰখাৰ ব্যৱস্থা কৰা হৈছে এই উদ্যানত । ৰাষ্ট্ৰীয় বিজ্ঞান কেন্দ্ৰৰ প্ৰকল্প সঞ্চালক সুস্মিতা কলিতাই কয়, ‘‘এবছৰীয়া নেৰা নেপেৰা প্ৰচেষ্টাত উদ্যানখন সম্পূৰ্ণ হৈছে । গ্ৰীণ হাউচ আন্তঃগাঁথনিৰে তিনিটা ঘৰৰ ভিতৰত এটাত থলুৱা অৰ্কিড, এটাত হাইব্ৰীড অৰ্কিড আৰু এটাত কেকটাছ আৰু চাকলেন গছবোৰ ৰখা হৈছে ।’’

লগতে পঢ়ক: শত বছৰৰ পাছত দুটা ফৈদ মিলনৰ দিশে অগ্ৰসৰ; কেন’পী ব্ৰীজৰে পাৰ হ’ল গিবন