নিজ সমষ্টিৰ বাঁহৰ সাঁকো বগাই ৰাইজৰ দুৰ্দশাৰ বুজ ল'লে ফণীভূষণ চৌধুৰীয়ে

অভয়াপুৰী: এনডিএ নেতৃত্বাধীন চৰকাৰখনৰ দিনত ৰাজ্যৰ ৰাস্তা-ঘাট যথেষ্ট উন্নত হৈছে। পকী দলং, উৰণসেতু নিৰ্মাণ হৈছে। কিন্তু বৰ্তমানো এনে কিছু স্থান আছে, য'ত নাই পকী পথ, নদী পাৰাপাৰ হোৱাৰ একমাত্ৰ মাধ্যম হ'ল বাঁহৰ সাঁকো । এইক্ষেত্ৰত যেন বিফল হৈছে চৰকাৰখন ।

এয়া আমি কোৱা কথা নহয়, নিজেই বিপদসংকুল সাঁকো বগাই বিফলতা স্বীকাৰ কৰিলে বৰপেটা লোকসভা সমষ্টিৰ সাংসদ ফণীভূষণ চৌধুৰীয়ে ৷ শীঘ্ৰে সমস্যা সমাধানৰ আশ্বাস দিলে সাংসদগৰাকীয়ে ৷

এয়া অভয়াপুৰীৰ শিঙিমাৰী প্ৰথমখণ্ডৰ উজানপাৰা গাঁৱৰ কথা । দীৰ্ঘদিন ধৰি বিভিন্ন সমস্যাৰে জৰ্জৰিত গাঁওখনৰ বাসিন্দা । বাৰে বাৰে জনপ্ৰতিনিধিৰ ওচৰত প্ৰাৰ্থনা কৰি বিফল হৈ এইবাৰ গাঁওবাসী কাষ চাপিল সাংসদ ফণীভূষণ চৌধুৰীৰ ওচৰত ।

এই সমস্যাৰ বিষয়ে শুনাৰ লগে লগে ৰাইজৰ ওচৰত উপস্থিত হৈ বিপদসংকুল সাঁকোখনেৰে ইপাৰ সিপাৰ হয় সাংসদ ফণীভূষণ চৌধুৰী । স্বীকাৰ কৰে বিফলতাৰ কথা ৷ লগতে সমালোচনা কৰে এই গাঁওখনৰ পূৰ্বৰ সমষ্টি অৰ্থাৎ অভয়াপুৰী দক্ষিণ সমষ্টিৰ বিধায়ক কংগ্ৰেছৰ প্ৰদীপ কুমাৰ সৰকাৰক ৷

ইফালে গাঁওখনত বিজুলী বাতি যোগান নথকাত সাংসদ ফণীভূষণ চৌধুৰীয়ে শক্তিবিভাগৰ উচ্চপদস্থ বিষয়াকো লগত লৈ পৰিদৰ্শন কৰে গাঁওখন । উল্লেখ্য যে কুঁজীয়া নৈৰ সিপাৰে থকা গাঁওখনৰ ৰাইজে বিপদসংকুলভাৱে বাঁহৰ সাঁকো এখনেৰে ইপাৰ সিপাৰ হয় ৷ ছাত্ৰ-ছাত্ৰীয়ো পাৰ হয় এই সাঁকোৰে ৷ বৰ্তমানলৈ সাঁকোৰ পৰা পৰাৰ ৪ জন লোকৰো মৃত্যু হৈছে ৷ ৰাইজে এইবাৰ তেওঁলোকৰ সমস্যা সমাধান হ’ব বুলি আশা ৰাখিছে ৷

ইয়াৰ পিছতে সাংসদগৰাকীয়ে সাংবাদিকৰ আগত আক্ষেপেৰে কয়,"পুৱাৰভাগত কেইগৰাকীমান মহিলা মোৰ ওচৰলৈ গৈছিল । তেওঁলোকৰ যি সমস্যা, সেই সন্দৰ্ভত অৱগত কৰিছিল, তেওঁলোকে দুই-চাৰিখন ফটোও লৈ গৈছিল । মই ভাবিলোঁ, এবাৰ নিজেই গৈ চাই অহাটো ভাল হ'ব ।"

তেওঁ পুনৰ কয়,"আহি যিটো দেখিলোঁ,এইটো আচলতে আমাৰ কাৰণে অতি দুৰ্ভাগ্যজনক । আমি জনপ্ৰতিনিধি হিচাপে দায়িত্ব পালন কৰিছোনে নাই ? নিজকে নিজে প্ৰশ্ন কৰিছোঁ । গাঁওখনৰ সমস্যা সমাধানৰ বাবে পূৰ্বে কোনো এজন জনপ্ৰতিনিধিয়ে সুচিন্তা নকৰাটো কিমান পৰিতাপৰ কথা ।"