অসম-নাগালেণ্ডৰ জাতীয় সংগঠনৰ মাজত বৈঠক, অবৈধ পাহাৰ খনন বন্ধ কৰাৰ হুংকাৰ

শিৱসাগৰ : নাগালেণ্ডত পাহাৰ খননৰ বাবে অসমত হোৱা ভয়াবহ বান আৰু অসম-নাগালেণ্ড সীমা সমস্যাৰ সন্দৰ্ভত দুয়োখন ৰাজ্যৰ জাতীয় সংগঠনৰ মাজত এক বৈঠক অনুষ্ঠিত হয় ৷

শনিবাৰে শিৱসাগৰৰ ব্ৰহ্মপুত্ৰ হোটেলত অনুষ্ঠিত বৈঠকত উপস্থিত আছিল সদৌ টাই আহোম ছাত্র সন্থা, কন্যাক ইউনিয়ন, কন্যাক ষ্টুডেণ্ট ইউনিয়ন আৰু কন্যাক এনএছকেৰ প্ৰতিনিধিসকল ৷

উক্ত বৈঠকতে অসম-নগালেণ্ডৰ সীমা সমস্যা, সাংস্কৃতিক আদান-প্ৰদানৰ লগতে শেহতীয়া বান সম্পৰ্কেও আলোচনা হয় । বিশেষকৈ নাগালেণ্ডত হোৱা খনিজ খননৰ ফলত সৃষ্টি হোৱা ভয়াবহ পৰিস্থিতিৰ সম্পৰ্কে সংগঠনৰ নেতৃত্বৰ মাজত বিশদ আলোচনা হয় ৷ ইফালে নদীবান্ধৰ ফলত শেহতীয়া বান হোৱা নাই বুলি কন্যাক সংগঠনৰ তৰফৰ স্পষ্টকৈ প্ৰকাশ কৰিছে ৷

ইয়াৰ বিপৰীতে নগালেণ্ডত হোৱা অবৈধ কয়লা আৰু শিলখননৰ বাবে ভয়াবহ বান সৃষ্টি হৈছিল বুলি কন্যাক সংগঠনে সহমত পোষণ কৰে ।

কন্যাক সংগঠনৰ প্ৰতিনিধিয়ে কয়, "খনিজ সম্পদ নাগালেণ্ডৰ, কিন্তু খনন নগা লোকে নকৰে । অসমকে ধৰি বিভিন্ন ৰাজ্যৰ ঠিকাদাৰে খনন কৰি অসমৰ মাজেৰে এই কয়লা-শিল-বালি আদি পৰিবহণ কৰা হয় । এনে খনন সকলো বৈধ আৰু বৈজ্ঞানিক পদ্ধতিৰে কৰা নহয় । যাৰ বাবে ভয়াবহ প্ৰাকৃতিক দুৰ্যোগ দেখা দিছে ।"

তেওঁলোকে লগতে কয়,"অসম-নাগালেণ্ডৰ লোকৰ মাজত যাতে এক অশান্তিৰ পৰিৱেশ সৃষ্টি কৰিব নোৱাৰে তাৰ বাবে নগা জনসাধাৰণ আৰু অসমীয়া ৰাইজ সজাগ হ'ব লাগিব । যাৰ বাবে আজিৰ পৰ্যালোচনা সভাত আটাছু আৰু কন্যাক সংগঠনে যুটীয়া ভাৱে নাগালেণ্ড আৰু অসম চৰকাৰক এনে অবৈধ খনন আৰু পৰিবহনক লৈ স্মাৰক পত্ৰ প্ৰদান কৰি অবৈধ খনন-পৰিবহনক লৈ ব্যৱস্থা গ্ৰহণৰ চেষ্টা কৰিব ।"

বৈঠকত লগতে এই কথাও উল্লেখ কৰা হয় যে, নাগালেণ্ডৰ খনিজ সম্পদ কোনো চৰকাৰৰ নহয়, বৰঞ্চ নগা জনগনৰ । এই সম্পদ সংবিধানৰ ৩৭১ অনুচ্ছেদৰ দ্বাৰা নগা জনগনক অধিকাৰ দিয়া হৈছে । গতিকে নগা ৰাইজৰ সৈতে একত্ৰিত হৈ এই সমূহ কেনেকৈ ৰোধ কৰা যাব সেই সন্দৰ্ভত আলোচনা কৰা হয় বুলি তেওঁলোকে মন্তব্য কৰে ।

লগতে পঢ়ক: অসম-মেঘালয় সংকট মোচনৰ চেষ্টা: গুৱাহাটীত মন্ত্ৰী অতুল বৰা-মেঘালয়ৰ উপ-মুখ্যমন্ত্ৰীৰ বৈঠক