মহানগৰীৰ ভয়ংকৰ অগ্নিকাণ্ড; ১১ ঘণ্টাৰ পিছতো নিৰ্বাপন হোৱা নাই জুই

গুৱাহাটী : গুৱাহাটী মহানগৰীত সংঘটিত হৈছে ভয়ংকৰ অগ্নিকাণ্ড । মহানগৰীৰ এ বি চিস্থিত ছ’হম এম্পোৰিয়া (Sohum Emporia)ত সংঘটিত হৈছে এই ভয়ংকৰ অগ্নিকাণ্ড । অট্টালিকাটোৰ ছটা মহলাতে চানি ধৰিছে জুয়ে । অগ্নিকাণ্ডত ভস্মীভূত কোটি-কোটি টকাৰ সামগ্ৰী । অৱশ্যে এই অগ্নিকাণ্ডত বৰ্তমানলৈ কোনো লোক হতাহত হোৱাৰ তথ্য লাভ কৰা হোৱা নাই ৷

মঙলবাৰৰ মাজনিশা প্ৰায় ১২.৩৫ বজাত এই অগ্নিকাণ্ড সংঘটিত হয় । বৰ্তমানো অট্টালিকাটো ক’লা ধোঁৱাই চানি ধৰি আছে । অগ্নিকাণ্ডৰ সম্ভেদ লাভ কৰাৰ পাছতেই অগ্নিনিৰ্বাপক বাহিনীৰ বাহন ঘটনাস্থলীত উপস্থিত হয় ৷ কিন্তু অগ্নিনিৰ্বাপক বাহিনীৰ কেইবাখনো বাহনে জুই নিৰ্বাপনৰ বাবে নিশাৰ পৰা অহৰহ চেষ্টা কৰি আছে যদিও বৰ্তমানলৈ জুই নুমুৱাবলৈ সক্ষম হোৱা নাই ।

অগ্নিনিৰ্বাপক বাহিনীৰ সূত্ৰই সদৰী কৰা অনুসৰি, নিশা প্ৰায় ১২.৩৫ অগ্নিনিৰ্বাপক বাহিনীলৈ এই অগ্নিকাণ্ড সংঘটিত হোৱাৰ খবৰ আহিছিল । ঘটনাৰ খবৰ লাভ কৰাৰ লগে লগে ঘটনাস্থলীত উপস্থিত হৈছিল অগ্নিনিৰ্বাপক বাহিনীৰ লোক । নিশাৰ পৰাই অহৰহভাৱে জুই নুমাবলৈ চেষ্টা অব্যাহত ৰাখিছে অগ্নিনিৰ্বাপক বাহিনীয়ে কিন্তু ১১ ঘণ্টাৰ পাছতো অগ্নিনিৰ্বাপক বাহিনীৰ লোকে জুই নিৰ্বাপন কৰিবলৈ সক্ষম হোৱা নাই ।

মহানগৰীৰ Sohum Emporiaত অগ্নিকাণ্ড (ETV Bharat Assam)

সূত্ৰটোৱে প্ৰকাশ কৰা মতে নিশা গুৱাহাটীৰ লগতে আন ঠাইৰ পৰা অহা ২৫ খনকৈ অগ্নি নিৰ্বাপক বাহিনীৰ বাহনে জুই নুমাবলৈ চেষ্টা অব্যাহত ৰাখিছিল । পুৱাৰ ভাগত আৰু বিভিন্ন ঠাইৰ পৰা অগ্নি নিৰ্বাপক বাহিনীৰ বাহন আহিছে । তদুপৰি এই অগ্নিকাণ্ড সূত্ৰপাত ক’ৰ পৰা বা কেনেদৰে হৈছে সেইয়া বৰ্তমান পৰ্যন্ত জানিব পৰা হোৱা নাই ।

উল্লেখ্য যে, ছ’হম এম্পোৰিয়াত শ্বপিং মলৰ লগতে আছে ভাৰতীয় ষ্টেট বেংকৰ কেইবাটাও শাখা ।