মালিকহন্তা ৰামপ্ৰসাদৰ আক্ৰমণত এইবাৰ মাউতৰ মৃত্যু

গোলাঘাট: জিলাখনৰ দেৰগাঁৱত এক শোকাৱহ ঘটনা সংঘটিত হৈছে । পোহনীয়া হাতীৰ আক্ৰমণৰ ফলত থিতাতে নিহত হ'ল এজন মাউত । নিহত মাউতজনৰ নাম প্ৰশান্ত বুলি জানিব পৰা গৈছে । ৰামপ্ৰসাদ নামৰ পোহনীয়া হাতীটোৰ আক্ৰমণত নিহত হয় মাউতজন । সম্প্ৰতি অঞ্চলটোত তীব্ৰ আতংকৰ সৃষ্টি হৈছে ।

জানিব পৰা মতে দেৰগাঁও মলাই কুমাৰ গাঁৱৰ এটা পথৰ দাঁতিত প্ৰশান্তই পোহনীয়া হাতীটোক বাঁহ পাত খুৱাই আছিল । সেই সময়তে উক্ত পথটোৰে ৰামপ্ৰসাদ নামৰ আন এটা পোহনীয়া হাতী আহি আছিল । প্ৰশান্ত নামৰ মাউতজন তলত নামি আহিছিল । কিন্তু তেনে সময়তে হঠাতে ৰামপ্ৰসাদ নামৰ হাতীটোৱে প্ৰশান্তক আক্ৰমণ কৰে । ৰামপ্ৰসাদৰ লগত থকা মাউতজনেও তৰ্কিবই নোৱাৰিলে । মাউতজনে ৰামপ্ৰসাদক নিয়ন্ত্ৰণ কৰাৰ পূৰ্বেই এই ঘটনা সংঘটিত কৰে । ফলত আনটো হাতীৰ মাউত প্ৰশান্ত থিতাতে নিহত হয় । এই ঘটনা সংঘটিত কৰিয়ে আঁতৰি যায় ৰামপ্ৰসাদ । পিছে পিছে মাউতজনে খেদি গৈ ৰামপ্ৰসাদক বঙ্গালগাঁৱৰ এখন হাবিৰ মাজত বান্ধিবলৈ সক্ষম হয় ।

ইফালে ঘটনাৰ খবৰ পোৱাৰ পিছতে উক্ত স্থানত দেৰগাঁও আৰক্ষী আৰু বন বিভাগৰ লোক উপস্থিত হয় । লক্ষণীয় কথাটো হ'ল যে ৰামপ্ৰসাদ নামৰ পোহনীয়া হাতীটোৱে পূৰ্বেও এনে ঘটনা সংঘটিত কৰিছে । বিগত বছৰৰ ছেপ্টেম্বৰ মাহত ৰামপ্ৰসাদৰ আক্ৰমণত মালিক কেশৱ বৰাৰ মৃত্যু হৈছিল । সেই সময়ত ৰামপ্ৰসাদ উন্মাদ হৈ মালিকসহ মাউতক আক্ৰমণ কৰাৰ লগতে বাহন আৰু বহু সা-সম্পত্তিৰো বিস্তৰ ক্ষতি কৰিছিল । বন বিভাগে সেই সময়ত হাতীটোক ট্ৰেংকুলাইজ কৰি নিয়ন্ত্ৰণলৈ আনিছিল । কিন্তু এবছৰ নৌহওঁতেই ৰামপ্ৰসাদৰ আক্ৰমণত আন এগৰাকী লোকৰ মৃত্যু হোৱাৰ পিছতে এতিয়া অঞ্চলটোত তীব্ৰ আতংকৰ সৃষ্টি হৈছে । আৰক্ষী আৰু বন বিভাগে ইতিমধ্যে নিজৰ নিজৰ ধৰণে তদন্তৰ লগতে ব্যৱস্থা গ্ৰহণ কৰিছে ।

আৰক্ষী আৰু বন বিভাগে তদন্ত আৰম্ভ কৰিছে (ETV Bharat)

এই সন্দৰ্ভত বাঁহৰ পাত খাই থকা হাতীটোৰ মালিকে কয়, "ৰামপ্ৰসাদ নামৰ হাতীটোৱে এই পথেৰে আহি আছিল । সেই সময়ত এই স্থানত পূৰ্বৰ পৰা আমাৰ এটা হাতী বাঁহ পাত খাই আছিল । তাৰ পাছত ৰামপ্ৰসাদে এই হাতীটোৰ মাউতজনক আক্ৰমণ কৰে । এই হাতীটোৱে পূৰ্বে নিজৰ মালিককো মাৰিছে । এতিয়া প্ৰশাসন তথা বন বিভাগৰ লগত আলোচনা কৰি কিবা এটা ব্যৱস্থা কৰিব লাগিব ।"

দেৰগাঁৱত পোহনীয়া হাতীৰ আক্ৰমণত মাউতৰ মৃত্যু (ETV Bharat)

অঞ্চলটোৰ লোকসকলেও এই ক্ষেত্ৰত ব্যৱস্থা গ্ৰহণৰ বাবে দাবী জনাইছে । মালিকহন্তা ৰামপ্ৰসাদৰ আক্ৰমণত এইবাৰ মাউতৰ মৃত্যু হ'ল, কিন্তু এইবাৰ ব্যৱস্থা নল'লে পৰৱৰ্তী সময়ত আন কোনো লোক হাতীটোৰ আক্ৰমণৰ বলি হ'ব পাৰে বুলিও ৰাইজে আশংকা কৰিছে ।

লগতে পঢ়ক :

ৰামপ্ৰসাদৰ আক্ৰমণত মালিকৰ মৃত্যু, আহত দুজন