ৰুণীখাতা ফৰেষ্ট ৰেঞ্জ কাৰ্যালয়ত উত্তেজনা : আৰক্ষী-অৰ্ধসামৰিক বাহিনীৰ ফ্লেগ মাৰ্চ
বনাঞ্চল বেদখলৰ অভিযোগত ২৫ গৰাকী লোকক আটক কৰাৰ পিছতে চিৰাঙৰ ৰুণীখাতা ফৰেষ্ট ৰেঞ্জ কাৰ্যালয় ঘেৰাও স্থানীয় ৰাইজৰ ।
Published : April 17, 2026 at 12:31 PM IST
|Updated : April 17, 2026 at 1:14 PM IST
তেজপুৰ : চিৰাঙৰ ভাৰত-ভূটান সীমান্তৰ ৰুণীখাতা ফৰেষ্ট ৰেঞ্জ কাৰ্যালয়ত উত্তেজনাময় পৰিস্থিতি । কাৰ্যালয়ত তীব্ৰ প্ৰতিবাদ স্থানীয় ৰাইজৰ । শতাধিক উত্তেজিত আদিবাসী পুৰুষ-মহিলাই লণ্ডভণ্ড কৰিলে কাৰ্যালয়ৰ আচবাব ।
কাৰ্যালয়ৰ চৌহদত থকা কেইবাখনো বাহনত উত্তেজিত লোকে অগ্নিসংযোগ কৰে । প্ৰতিবাদকাৰীয়ে কাৰ্যালয়ৰ সামগ্ৰী উলিয়াই লৈ যায় আৰু ১২৭ নং ভাৰত-ভূটান সংযোগী ৰাষ্ট্ৰীয় ঘাইপথ অৱৰোধ কৰে ।
উল্লেখ্য যে বনাঞ্চলত বেদখলৰ অভিযোগত ২৫ গৰাকী লোকক আটক কৰাৰ লগতে মহিলাক দুৰ্ব্যৱহাৰ কৰাৰ অভিযোগত লোকসকলে প্ৰতিবাদী কাৰ্যসূচী ৰূপায়ণ কৰে । প্ৰতিবাদৰ মাজতে কাৰ্যালয়ত লোকসকলে শিলগুটি নিক্ষেপ কৰে । য'ত কেবাজনো আৰক্ষী আহত । ইয়াতে ক্ষান্ত নাথাকি প্ৰতিবাদকাৰীসকলে কাৰ্যালয়ৰ চৌহদত থকা কেবাখনো বাহনত অগ্নিসংযোগ কৰে । কেৱল এয়াই নহয় বন বিভাগৰ কাৰ্যালয়টোৰ পৰা প্ৰতিবাদকাৰীয়ে ৪ টাকৈ অস্ত্ৰ লৈ যোৱাৰো অভিযোগ উঠিছে ।
পৰিস্থিতি নিয়ন্ত্ৰণৰ বাবে আৰক্ষীয়ে লাঠিচালনা কৰাৰ লগতে শূন্যলৈ গুলীচালনা কৰিবলৈ বাধ্য হয় । পৰিস্থিতি এতিয়াও উত্তেজনাময় হৈ থকা বুলি জানিব পৰা গৈছে ।
সমগ্ৰ ঘটনা সন্দৰ্ভত চিৰাঙৰ বন সংমণ্ডল বিষয়া কুঞ্জন বসুমতাৰীয়ে ইটিভি ভাৰতক কয়, "চৰকাৰী নিয়ম অনুসৰি নতুনকৈ বন ভূমি বেদখল কৰাৰ অভিযোগ উত্থাপিত হোৱাৰ পিছত অভিযান আৰম্ভ কৰা হৈছিল । তেতিয়া হঠাৎ এই ঘটনা ৰহস্যৰ আৱৰ্তত সোমাই পৰে । প্ৰতিবাদকাৰীয়ে বন বিভাগৰ কাৰ্যালয়ৰ পৰা ৪ টাকৈ অস্ত্ৰ লুটি লৈ যায়, ব্যক্তিগত আৰু চৰকাৰী বাহন জ্বলাইও দিয়ে ।
ইফালে আৰক্ষী আৰু প্ৰতিবাদকাৰীৰ মাজত সংঘৰ্ষ অব্যাহত আছে বুলি জানিব পৰা গৈছে । প্ৰতিবাদকাৰীৰ শিলাবৰ্ষণত কেইবাজনো আৰক্ষী আহত হৈছে, য'ত এজন গুৰুতৰভাৱে আহত হয় । অঞ্চলটোত আৰক্ষী, অৰ্ধসামৰিক বাহিনী মোতায়েন কৰা হৈছে ।
আৰক্ষী-অৰ্ধসামৰিক বাহিনীৰ ফ্লেগ মাৰ্চ
শেহতীয়া খবৰ অনুসৰি অগ্নিগৰ্ভা ৰুণীখাতাত আৰক্ষী আৰু অৰ্ধসামৰিক বাহিনীয়ে ফ্লেগ মাৰ্চ কৰিছে । ইতিমধ্যে কেবাটাও অতিৰিক্ত বাহিনীও মোতায়েন কৰা হৈছে । এই সন্দৰ্ভত জ্যেষ্ঠ আৰক্ষী অধীক্ষক নোমল মাহাত্তাই ইটিভি ভাৰতক কয় যে অতিৰিক্ত বাহিনীৰ ৰেপিড একচন ফৰ্চ, চিআৰপিএফ আৰু আৰক্ষীৰ বেটেলিয়নে ৰাজপথত ফ্লেগ মাৰ্চ কৰি শান্তি শৃংখলা ঘূৰাই অনাৰ প্ৰয়াস কৰিছে । তেওঁ লগতে নিশ্চিত কৰিছে যে বৰ্তমান পৰিস্থিতি নিয়ন্ত্ৰণত আছে । এই ঘটনাত আৰক্ষীৰ ৮ গৰাকী জোৱান আঘাতপ্ৰাপ্ত হয় আৰু এগৰাকী জোৱান গুৰুতৰভাৱে আহত বুলিও তেওঁ উল্লেখ কৰে ।
আনহাতে চিৰাঙৰ বন বিভাগৰ প্ৰাধিকাৰী কুঞ্জন বসুমতাৰীয়ে জনায় যে এই ঘটনাত বন বিভাগৰ ৫ গৰাকী লোক গুৰুত্বৰভাৱে আঘাতপ্ৰাপ্ত হৈছে । প্ৰতিবাদকাৰীয়ে ৪ টা অস্ত্ৰ জ্বলাই দিছে আৰু মুঠ ৮ খন বাহন জ্বলাই দিছে । ইয়াৰ ভিতৰত ৩ খন বাহন বন বিভাগৰ আৰু ৫ খন ব্যক্তিগত মটৰ চাইকেল বুলিও তেওঁ উল্লেখ কৰে । বসুমতাৰীয়ে লগতে কয় যে বন বিভাগৰ ৰুণীখাতাত ৪ টা .৩১৫ বন্দুক জ্বলাই দিয়াৰ উপৰিও এটা ৩০৩ ৰাইফল আৰু যথেষ্ট পৰিমাণৰ গোলাবাৰুদ অন্তৰ্ধান হৈছে ।
লগতে পঢ়ক :
মাৰ্ঘেৰিটা চাহ বাগিচাত চৰকাৰী ভূমি পট্টাক কেন্দ্ৰ কৰি উত্তপ্ত পৰিস্থিতি
