ভয়ংকৰ জলাশয়ত পৰিণত সমগ্ৰ গুৱাহাটী : নলাত পৰি প্ৰাণ গ'ল মহিলাৰ, স্কুল-কলেজ সকলো বন্ধ
প্ৰায় প্ৰতিটো অঞ্চলে প্ৰভাৱিত । মালিগাঁৱত এগৰাকী মহিলাৰ মৃত্যু ।
Published : April 20, 2026 at 7:43 AM IST
গুৱাহাটী : উত্তৰ-পূবৰ দুৱাৰমুখ গুৱাহাটীত ধাৰাসাৰ বৰষুণৰ ফলত সৃষ্টি হোৱা কৃত্ৰিম বানে ভয়ংকৰ পৰিস্থিতিৰ সৃষ্টি কৰিছে । দেওবাৰে সন্ধিয়াৰে পৰা হোৱা অবিৰত বৰষুণৰ ফলত গুৱাহাটীৰ প্ৰায় প্ৰতিটো অঞ্চলেই কৃত্ৰিম বানৰ কবলত পৰিছে । বেলতলা, হাতীগাওঁ, ৰুক্মিণী গাওঁ, পাঞ্জাবাৰী, ছয়মাইল, গণেশগুৰি, কাহিলীপাৰা, জু-ৰোড, চানমাৰি, গান্ধীবস্তি, আমবাৰী, জি এছ ৰোড, মালিগাঁও, যোৰাবাটকে ধৰি বিভিন্ন অঞ্চলত অভাৱনীয় পৰিস্থিতিৰ সৃষ্টি হয় । একপ্ৰকাৰ স্তব্ধ হৈ পৰে গুৱাহাটী ।
তাৰ মাজতে মালিগাঁৱত শোকাৱহ ঘটনা সংঘটিত হয় । নিশা পায়েল নাথ নামৰ আজাৰাৰ এগৰাকী মহিলা উন্মুক্ত নলাত সোমাই যায় । প্ৰায় ৪ ঘণ্টা ধৰি মহিলাগৰাকী সন্ধানহীন হৈ থাকে । পিছত অচেতন অৱস্থাত মহিলাগৰাকীক উদ্ধাৰ কৰা হয় ।
ততাতৈয়াকৈ তেওঁক হাস্পতালত ভৰ্তি কৰোৱা হয় যদিও চিকিৎসকে মৃত ঘোষণা কৰে । এই ঘটনাক কেন্দ্ৰ কৰি এতিয়া তীব্ৰ প্ৰতিক্ৰিয়াৰ সৃষ্টি হৈছে । বিভাগীয় কৰ্তৃপক্ষই নলাৰ ঢাকনি খুলি থোৱাৰ বাবেই মহিলাগৰাকীয়ে মৃত্যুক আঁকোৱালি ল'লে বুলিও সৰ্বত্ৰে প্ৰতিক্ৰিয়া হৈছে ।
দেওবাৰৰ কৃত্ৰিম বানৰ পৰিস্থিতিৰ প্ৰতি লক্ষ্য ৰাখি অসম চৰকাৰৰ অধীনস্থ কামৰূপ মহানগৰ জিলা প্ৰশাসনে এক জৰুৰী আদেশ জাৰি কৰি ২০ এপ্ৰিলত (সোমবাৰ) সকলো শিক্ষানুষ্ঠান বন্ধৰ ঘোষণা কৰে । জৰুৰী নিৰ্দেশনাত প্ৰশাসনে উল্লেখ কৰিছে যে ১৯ এপ্ৰিলত হোৱা ধাৰাসাৰ বৰষুণৰ ফলত মহানগৰীৰ বিভিন্ন স্থানত পানী জমা হৈ জনজীৱন ব্যাহত কৰিছে ।
এই পৰিস্থিতিত শিক্ষাৰ্থী, শিক্ষক তথা কৰ্মচাৰীৰ সুৰক্ষাৰ কথা বিবেচনা কৰি গুৱাহাটী পৌৰ নিগম এলেকাৰ ভিতৰত থকা সকলো চৰকাৰী আৰু বেচৰকাৰী শিক্ষানুষ্ঠান সোমবাৰে বন্ধ ৰখাৰ সিদ্ধান্ত লোৱা হৈছে ।
কামৰূপ মহানগৰ জিলা দুৰ্যোগ ব্যৱস্থাপনা কৰ্তৃপক্ষৰ অধ্যক্ষ তথা জিলা আয়ুক্তই এই আদেশ জাৰি কৰি নাগৰিকসকলক সাৱধানতা অৱলম্বন কৰিবলৈ আহ্বান জনাইছে । লগতে অতি দৰকাৰী নহ'লে ঘৰৰ বাহিৰলৈ ওলাই নাযাবলৈও পৰামৰ্শ দিছে । ইফালে কৃত্ৰিম বানৰ কবলত পৰা অঞ্চলবোৰত প্ৰশাসনে উদ্ধাৰ আৰু সাহায্যৰ ব্যৱস্থা কৰিছে বুলিও জনোৱা হৈছে ।
উল্লেখ্য যে দেওবাৰে সন্ধিয়া ধাৰাসাৰ বৰষুণৰ পিছতে হোৱা কৃত্ৰিম বানত মহানগৰবাসীৰ মাজত হাহাকাৰ পৰিস্থিতিৰ সৃষ্টি হয় । ঘণ্টা ঘণ্টা ধৰি ৰাজপথত যান-বাহন আবদ্ধ হৈ পৰে । বহু লোক কৰ্মস্থলীতে দুপৰ নিশালৈ আবদ্ধ হৈ থাকিবলগীয়া হয় ।
লগতে পঢ়ক :
জয়-পৰাজয়ৰ অংকত বহিল বিৰোধী শিবিৰ : নিৰ্বাচনোত্তৰ পৰ্যালোচনাত সমবেত সকলো প্ৰাৰ্থী
