মাজুলীত উন্নয়নে ঢুকি নোপোৱা এটা অঞ্চল, ১০০ মিটাৰ দৈৰ্ঘৰ বাঁহৰ দলং সাজিলে মহিলাই
মাজুলিৰ পুৰণি চাপৰিত উন্নয়নৰ গংগাৰ নমুনা ।
Published : June 30, 2026 at 5:55 PM IST
মাজুলী: আজিও মাজুলীত যাতায়ত দুৰূহ ! চৰকাৰে যাতায়তৰ ক্ষেত্ৰত উন্নয়নৰ ঢাক-ঢোল বজালেও নদী দ্বীপটোৰ কিছু অঞ্চলত যাতায়তৰ ক্ষেত্ৰত ৰাইজে যমৰ যাতনা ভুগিবলগীয়া হৈ আছে । কেৱল সেয়াই নহয়, বাঁহৰ সাঁকোৰেও ছমাহ পাৰ হ'ব নোৱাৰে নদী ।
আজিও যে ৰাজ্যৰ এনে কিছু অঞ্চল আছে যাক উন্নয়নে চুব পৰা নাই তাৰেই ছবি প্ৰকাশ কৰিছে এনে অঞ্চলৰ যাতায়ত ব্য়ৱস্থাই । এনে দৃশ্য দেখিলেই অনুভৱ কৰিব পাৰি এতিয়াও অতিকৈ ভিতৰুৱা অঞ্চলৰ ৰাইজে কেনেদৰে জীৱন নিৰ্বাহ কৰিবলগীয়া হৈছে ।
এনে এটি অঞ্চল হৈছে মাজুলিৰ পুৰণি চাপৰি । এই অঞ্চলটোত নাই কোনো যাতায়াতৰ সু-ব্যৱস্থা । বাঁহৰ সাঁকোৰে বিদ্যালয়লৈ ল'ৰা-ছোৱালীক অনা-নিয়া কৰে অঞ্চলবাসীয়ে । দীৰ্ঘদিন ধৰি স্থানীয় জনপ্ৰতিনিধিক অনুৰোধ কৰাৰ পিছতো তেওঁলোকৰ পৰা কোনো গুৰুত্ব লাভ নকৰাত পুৰুষৰ সমান্তৰালকৈ মহিলাসকলো ওলাই আহিল ১০০ মিটাৰ দৈৰ্ঘৰ বাঁহৰ দলং নিৰ্মাণৰ কামত ।
এই সন্দৰ্ভত এগৰাকী স্থানীয় ব্য়ক্তিয়ে কয়, "ক'বলৈ দুখেই লাগে, আজি কিমান বছৰে আমি এখন দলং নিৰ্মাণ কৰিবলৈ জনপ্ৰতিনিধিক অনুৰোধ জনাইছো, কোনো সুফল পোৱা নাই । আমি বহুত কষ্ট কৰি আছে । বিদ্য়ালয়লৈ ল'ৰা-ছোৱালী অনা-নিয়া কৰাত অসুবিধা হয় । বিধায়কৰ ওচৰলৈ গৈ আলোচনা কৰিছিলো যদিও তেওঁ দৰ্খাস্ত দিবলৈহে ক'লে । পিছে আজিলৈকে কোনো কামত নাহিল ।"
আন এগৰাকী স্থানীয় মহিলাই অভিযোগ উত্থাপন কৰি কয় যে পুৰণি চাপৰিবাসী বছৰ বছৰ ধৰি চৰকাৰৰ দ্বাৰা অৱহেলিত হৈ আছে । এই অঞ্চলত যাতায়তৰ সু-ব্যৱস্থা নাই । এখন দলঙৰ বাবে বিভিন্ন সময়ত যথেষ্ট অসুবিধাৰ সন্মুখীন হয় পুৰণি চাপৰিবাসী । অঞ্চলটোৰ কাৰোবাৰ বেমাৰ-আজাৰ হ'লেই বিপদৰ সন্মুখীন হ'বলগীয়া হয় ।
স্থানীয় মহিলাগৰাকীয়ে লগতে কয় যে মাজুলীৰ জনপ্ৰতিনিধিগৰাকীক এই সমস্যাৰ কথা অৱগত কৰা হৈছিল যদিও তেওঁ কোনো ধৰণৰ গুৰুত্ব আৰোপ কৰা নাই । এই অঞ্চলৰ ৰাইজে চৰকাৰক তেওঁলোকৰ সমস্যাৰ কথা বুজি অতি সোনকালে এখন পকী দলং নিৰ্মাণ কৰি দিবলৈ আহ্বান জনাইছে ।
