মহানগৰীৰ পদপথৰ খুচুৰা দোকানবোৰ সুৰক্ষিত কৰা হ'ব খিলঞ্জীয়াৰ বাবে

গুৱাহাটী : গুৱাহাটী মহানগৰীৰ পদপথৰ খুচুৰা দোকানবোৰত চলিব খিলঞ্জীয়াৰ প্ৰভুত্ব । চলিত বৰ্ষৰ আগষ্ট মাহৰ পৰা ছেপ্টেম্বৰ মাহৰ ভিতৰত এক জৰীপৰ ভিত্তিত অচিনাকি তথা বহিৰাগত লোকৰ হাতত থকা খুচুৰা দোকানসমূহক নাকী লগোৱাৰ ব্যৱস্থা কৰিব অসম চৰকাৰে । যোৱা ১৩ জুন তাৰিখে ৰাজ্যিক বিজেপিৰ মুখ্য কাৰ্যালয় অটল বিহাৰী বাজপেয়ী ভৱনত অনুষ্ঠিত হোৱা মিডিয়া কনক্লেভত উক্ত কথা সদৰী কৰিছিল অসমৰ মুখ্যমন্ত্রী ড৹ হিমন্ত বিশ্ব শর্মাই ।

দেওবাৰে ৰাজ্যিক বিজেপিৰ মুখ্য কার্যালয়ত এক সংবাদমেল সম্বোধন কৰি দলৰ জ্যেষ্ঠ মুখপাত্র ব্রজেন মহন্তই নৱনিযুক্ত এনডিএ চৰকাৰৰ এই অভিনৱ পদক্ষেপক আদৰণি জনায় ।

উল্লেখযোগ্য যে, গুৱাহাটীত প্রায় ১ লাখতকৈও অধিক লোকে সম্পূর্ণ অবৈধভাৱে পদপথসমূহ দখল কৰি ব্যৱসায় চলাই আহিছে । এইসকল লোকৰ ৮০ শতাংশতকৈও অধিক লোক অচিনাকি অথবা বহিৰাগত । এই অচিনাকি তথা বহিৰাগত লোকসকলে দৈনিক হাজাৰ হাজাৰ টকাৰ ব্যৱসায় কৰে অথচ চৰকাৰলৈ এটকাও কৰ প্রদান নকৰে । গুৱাহাটী মহানগৰীৰ অধিকাংশ বাসিন্দা খিলঞ্জীয়া হোৱাৰ বিপৰীতে ব্যৱসায়-বাণিজ্যসমূহ ক্রমে অচিনাকি আৰু বহিৰাগত লোকৰ হাতলৈ গৈছে ।

কোনোধৰণৰ নীতি-নির্দেশনা নমনাকৈ এই অচিনাকি আৰু বহিৰাগত লোকসকলে যধে-মধে পদপথসমূহ দখল কৰি সমগ্ৰ গুৱাহাটীতে এক অস্বাস্থ্যকৰ পৰিৱেশৰ সৃষ্টি কৰাৰ লগতে ব্যৱহৃত সামগ্রীসমূহে নলা-নর্দমা বন্ধ কৰি পেলোৱাৰ ফলত কৃত্রিম বানৰো সৃষ্টি হোৱা দেখা গৈছে । লগতে যধে-মধে স্থাপন কৰা এই দোকানসমূহে ব্যাপক যান-জঁটৰো সৃষ্টি কৰে । গতিকে এই লোকসকলক নাকী লগাই এক ব্যৱস্থিত প্ৰক্ৰিয়াৰ মাজেৰে কেৱল খিলঞ্জীয়া লোকেহে গুৱাহাটীত ব্যৱসায় কৰাৰ পৰিৱেশ সৃষ্টি কৰিবলৈ জৰীপৰ ব্যৱস্থা কৰা হ'ব বুলি মুখপাত্র গৰাকীয়ে সদৰী কৰে ।

ইতিমধ্যে মুখ্যমন্ত্রী ড৹ হিমন্ত বিশ্ব শর্মাই পদপথৰ ব্যৱসায়সমূহক সংগঠিত কৰি নৱনির্মিত উৰণসেতুসমূহৰ লগতে প্রশাসনে নির্দিষ্ট কৰি দিয়া অন্যান্য ঠাইত কেৱল খিলঞ্জীয়াৰ বাবেহে ব্যৱসায়ৰ অনুমতি প্রদানৰ কথা ঘোষণা কৰিছে । আনহাতে, যোৱা ১৩ জুন তাৰিখে অসমৰ চৰকাৰৰ তৃতীয়খন কেবিনেটত ১৮ বছৰ ঊৰ্ধৰ লোকৰ বাবে আধাৰকাৰ্ডৰ বাবে নামভর্তি নিষিদ্ধকৰণৰ সিদ্ধান্ত গ্রহণ কৰে । অসম চৰকাৰৰ এই পদক্ষেপকো ৰাজ্যিক বিজেপিয়ে আদৰণি জনায় ।

অসমৰ সুৰক্ষা, খিলঞ্জীয়াৰ অধিকাৰ আৰু ভৱিষ্যত ৰক্ষাৰ ক্ষেত্ৰত অসম চৰকাৰৰ এই সিদ্ধান্ত ঐতিহাসিক আৰু সাহসী পদক্ষেপ বুলি মুখপাত্ৰগৰাকীয়ে সংবাদ মাধ্যমৰ আগত ব্যক্ত কৰে । এই পদক্ষেপৰ জৰিয়তে অসমলৈ দৈনিক প্ৰব্ৰজন কৰি থকা পূর্ববংগীয় তথা বহিৰাজ্যৰ লোকসকলে আধাৰ পঞ্জীয়নৰ জৰিয়তে ৰাজ্য চৰকাৰৰ বিভিন্ন সুবিধাসমূহ ভোগ কৰি থকাৰ বাট বন্ধ হ'ব ।

অদূৰ ভৱিষ্যতে ৰাজ্যৰ ব্যৱসায়-বাণিজ্য, চাকৰি তথা অন্যান্য সকলো ক্ষেত্ৰতে অসমৰ খিলঞ্জীয়া ৰাইজেহে সুবিধা লাভ কৰিব । খিলঞ্জীয়া ৰাইজৰ স্বাৰ্থ সুৰক্ষিত কৰিবলৈ বিজেপিৰ নেতৃত্বাধীন এনডিএ চৰকাৰে কোনোধৰণৰ আপোচ নকৰে বুলিও মুখপাত্ৰগৰাকীয়ে মত ব্যক্ত কৰে । মুঠৰ ওপৰত অসমৰ খিলঞ্জীয়া লোকৰ ভৱিষ্যত সুৰক্ষিত কৰিবলৈ বদ্ধপৰিকৰ এনডিএ চৰকাৰ ৷

উল্লেখ্য যে, এই সংবাদমেলত বিজেপি দলৰ আন দুগৰাকী মুখপাত্র বনেন্দ্ৰ কুমাৰ মুছাহাৰী আৰু প্ৰাঞ্জল কলিতাও উপস্থিত থাকে ।

লগতে পঢ়ক: লজ্জাজনক ঘটনা, ধনদাবী গোচৰত পুনৰ জাতীয় সংগঠনৰ চাৰি সদস্যক গ্ৰেপ্তাৰ আৰক্ষীৰ