১২২ বছৰে দৈৰ ব্যৱসায় কৰা এটা পৰিয়ালে ৰক্ষা কৰিছে সুস্বাদুৰ পৰম্পৰা
১০০০ লিটাৰতকৈও অধিক দৈ বিক্ৰীৰ বাবে সাজু কৰিছে প্ৰাণজিৎ দাসে ।
Published : January 11, 2026 at 2:41 PM IST
বৰপেটা : অসমীয়াৰ ভোগৰ উৎসৱ ভোগালী বিহুলৈ মাজত মাত্ৰ এদিন ৷ ভোগালী বিহু বুলি ক'লেই মনলৈ আহে সৰভোগৰ এঠা দৈৰ কথা ৷ বিহুৰ সময়ত সৰভোগৰ ম'হৰ এঠা দৈ নহ'লেই নহয় ৷ সৰভোগৰ দৈ মানেই যেন এক আৱেগ !
সেই আৱেগক সৰভোগৰ প্ৰতিখন দৈ-ক্ৰীমৰ বিপণিয়ে যুগ যুগ ধৰি সন্মান জনাই আহিছে । সৰভোগৰ একোখন বিপণিয়ে শতিকাও অতিক্ৰম কৰিছে । শতিকাজুৰি তেওঁলোকে সৰভোগৰ দৈৰ মৰ্যাদাও ৰক্ষা কৰি আহিছে ।
শতিকা গৰকা তেনে এখন বিপণি হ'ল সৰভোগৰ পিকু ষ্টোৰ । বৰ্তমান এইখন বিপণিৰ গৰাকী হ'ল প্ৰাণজিৎ দাস । পূৰ্বে মানাহ অভয়াৰণ্যত ম'হৰ খুটি থকা প্ৰাণজিৎ দাসৰ পিতৃয়ে এই দোকানখন আৰম্ভ কৰিছিল । তাৰ পাছত উত্তৰসূৰী হিচাপে এতিয়া প্ৰাণজিৎ দাসে সেইখন চলাই আছে । সৰভোগৰ দৈ, ক্ৰীম, ঘিউ আদিৰ মান যিদৰে তেওঁৰ পিতৃয়ে বহন কৰিছিল, তাৰ ব্যতিক্ৰম হ'বলৈ দিয়া নাই প্ৰাণজিৎ দাসেও । সেয়হে বছৰ বছৰ ধৰি তেওঁৰ বিপণিলৈ ঢপলিয়াই আহে ৰাজ্যৰ বিভিন্ন প্ৰান্তৰ ক্ৰেতা ।
সৰভোগৰ দৈৰ শদিয়াৰ পৰা ধুবুৰীলৈ বিশেষ চাহিদা আছে ৷ সেয়েহে শদিয়াৰ পৰা ধুবুৰীলৈ সৰভোগৰ দৈৰ ক্ৰেতাও আছে ৷ মানাহ অভায়ৰণ্যত থকা ম'হৰ বাথানসমূহৰ পৰা বিশেষকৈ গাখীৰ আনে সৰভোগৰ দৈ প্ৰস্তুত কৰা ব্যৱসায়ীসকলে ৷
মানাহ অভায়ৰণ্যৰ খুটিৰ গাখীৰৰ ঘনত্ব বেছি বাবে এই গাখীৰৰ পৰা উন্নত মানৰ দৈ প্ৰস্তুত হয় বুলি প্ৰাণজিৎ দাসে জানিবলৈ দিয়ে ৷ তেওঁ পদূলিমুখত উপস্থিত হোৱা ভোগালী বিহুৰ বাবে এইবাৰো পূৰ্ণোদ্যমে সাজু হৈছে । এইবাৰ তেওঁ ১০০০ লিটাৰতকৈও অধিক দৈ বিক্ৰীৰ বাবে সাজু হৈছে ।
এই সন্দৰ্ভত প্ৰাণজিৎ দাসে কয়, "আমাৰ দোকানখন ১২২ বছৰ ধৰি চলি আছে । আমি বৰপেটাৰ মানুহ । বৰপেটীয়া মানুহ বাবে দেউতাই সৰুৰে পৰাই ব্য়ৱসায় কৰিছিল । এইবাৰ ১০০০ লিটাৰমান কৰিছো ।"
বিহু উপলক্ষে প্ৰাণজিৎ দাসে মাটিৰ পাত্ৰৰ লগতে বাঁহৰ চুঙাৰ দৈ, ক্ৰীম, ঘি আদি প্ৰস্তুত কৰিছে ৷ অৱশ্যে তেওঁ জনাই যে কেবল বিহু বুলিয়েই নহয়, গোটেই মাঘ মাহটোত দৈৰ পৰ্যাপ্ত বিক্ৰী অব্যাহত থাকে । এইবাৰ প্ৰতি কিলোগ্ৰাম দৈৰ মূল্য ২০০ টকা, ক্ৰীমৰ মূল্য ৮০০ টকা আৰু ঘিউৰ ১১০০ টকা বুলি প্ৰাণজিৎ দাসে জানিবলৈ দিয়ে ।
